Xalq öz liderinə inanır və güvənir

"Prezident İlham Əliyev tərəfindən 2024-cü ilin 7 fevralında növbədənkənar prezident seçkilərinin keçirilməsi haqqında imzalanmış sərəncam mühüm önəm kəsb edir. Bu bir reallıqdır ki, müstəqil Azərbaycan tarixində ilk dəfə olaraq seçkilər bütün ölkə ərazisində keçiriləcək. 44 günlük Vətən müharibəsi və 2023-cü ilin sentyabrında keçirilən antiterror tədbirləri nəticəsində ərazi bütövlüyümüzün və suverenliyimizin tam bərpası həm regionda, həm də ölkəmizdə yeni reallıqlar yaradıb. Məhz bu kontekstdə növbədənkənar prezident seçkiləri ərazi bütövlüyümüzün və suverenliyimizin təsbiti hesab edilir".

Mövzu ilə bağlı "Azərbaycan" qəzetinə danışan Milli Məclisin deputatı Məlahət İbrahimqızı deyib ki, ölkəmizin 2020-ci ildə 44 günlük Vətən müharibəsi ilə ərazi bütövlüyünü bərpa etməsi Prezident İlham Əliyevin uğurlu siyasi iradəsi və diplomatik bacarığının nəticəsidir: "İkinci Qarabağ savaşında ölkəmizin beynəlxalq birlik tərəfindən tanınan, qəbul edilən ərazilərinin Ermənistan tərəfindən işğalına son qoyuldu. 30 ilə yaxın Azərbaycan ərazilərini işğalda saxlayan təcavüzkar düşmən döyüş meydanında məğlub edildi və kapitulyasiya aktına imza atmalı oldu. 2023-cü ilin 19-20 sentyabr tarixlərində isə lokal antiterror tədbirləri ilə Azərbaycanın bütün ərazisində konstitusiya quruluşu, suverenliyimiz tam təmin edildi. Separatizm yuvası darmadağın olundu və separatçılığın kökü kəsildi. Artıq yeni bir reallıq yaranıb ki, bu da daha mütərəqqi və konseptual ideyaların ardıcıllıqla icrasını təşviq edir".

Deputat qeyd edib ki, seçkilərə qalib xalq kimi qatılmaq ciddi əhəmiyyətə malikdir. Bu mənada gələn il keçiriləcək prezident seçkilərini haqlı olaraq Zəfər seçkisi də adlandırırlar.

Prezident, Müzəffər Ali Baş Komandan İlham Əliyevin xalqa verdiyi sözlərə hər zaman tam əməl etdidiyini vurğulayan Məlahət İbrahimqızı vurğulayıb: "Artıq şanlı üçrəngli bayrağımız Xankəndidə, Şuşada, Xocalıda, Laçında, Kəlbəcərdə, Cəbrayılda, Zəngilanda, Füzulidə və digər rayonlarda şərəflə dalğalanır. Növbədənkənar seçkilərin keçirilməsi dünyada qəbul olunmuş siyasi təcrübədir. Növbəti seçkilər bəzi hallarda təxirə salınır, bəzi hallarda isə vaxtından əvvəl keçirilir. Məhz bu kontekstdə seçkilər növbədənkənar keçirildiyindən vətəndaşlarımız siyasi iradələrini sadəcə olaraq vaxtından əvvəl ifadə edəcəklər".

Məlahət İbrahimqızı, həmçinin bu seçkilərin keçirilməsini Prezident, Müzəffər Ali Baş Komandan İlham Əliyevin özünə inamının və xalqın siyasi dəstəyinə əminliyinin ən bariz göstəricisi adlandırıb. Bildirib ki, xalqına qalibiyyət yaşadan Müzəffər Ali Baş Komandan Azərbaycanın bu gün regionda tam müstəqil siyasət yürüdən bir ölkə kimi tanınmasını təmin edib. Bunu qorumaqdan ötrü Azərbaycanın qələbəsini həzm edə bilməyən dövlətlərin təxribatlarının qarşısını almaq üçün siyasi sistemin gücləndirilməsi strateji əhəmiyyət kəsb edir.

Deputat vurğulayıb ki, bu seçkilər də tam şəffaf və demokratik prinsiplərə uyğun keçiriləcək: "Heç bir ictimai dəstəyi olmayan qüvvələr üçün isə bu seçkiyə qatılmaq indidən acı məğlubiyyət fonunda görünür. Amma hər zaman xalqın yekdil dəstəyi ilə əhatə olunmuş Prezident İlham Əliyev bu seçkinin də qalibi olmaqla Azərbaycanın qələbələr ssenarisinin ardıcıllığını təmin edəcək".

Nəzrin QAFARZADƏ,

Azərbaycan.-2023.- 16 dekabr, № 275.- S.6.