Xalq Müzəffər Liderinin yanındadır

Çoxəsrlik dövlətçilik tarixinə malik Azərbaycan ötən 20 il ərzində özünün ən qüdrətli, ən qürurlu məqamına yüksəlib. İşğala məruz qalan ölkədən Zəfər ölkəsinə çevrilib. Suverenliyimiz tam təmin edilib, bayrağımız bütün ərazilərimizdə dalğalandırılıb. Onilliklər boyu talanan, daşı daş üstündə qalmayan Qarabağ və Şərqi Zəngəzurda yeni həyat qurulub, Böyük qayıdışa başlanılıb, yurdundan didərgin salınmış insanlarımız dədə-baba torpaqlarına qovuşmağa başlayıb.

Beynəlxalq arenada etibarlı və güvənilən tərəfdaş kimi tanınan, qlobal miqyaslı problemlərin həllinə mühüm töhfələr verən Azərbaycanın adı bu gün dünyanın nüfuzlu ölkələri sırasında çəkilir.

Son 20 il ərzində əldə edilən siyasi, iqtisadi, hərbi, diplomatik, ümumiyyətlə, bütün sahələr üzrə qazanılan qələbələrin, əldə edilən nailiyyətlərin altında isə nəyi necə, nə vaxt etmək lazım olduğunu yaxşı bilən Prezident İlham Əliyevin qızıl imzası, möhürü var.

Məhz buna görədir ki, Azərbaycan xalqı Yeni Azərbaycan Partiyası İdarə Heyəti tərəfindən dekabrın 15-də İlham Əliyevin prezidentliyə namizədliyinin irəli sürülməsini böyük razılıq və sevinclə qarşıladı.

Zirvəyə doğru gələn 20 il

Azərbaycanın adına ard-arda qazanılan uğurlar, qalibiyyətlər müdrik xalqımızın lider seçimində yanılmamasının, düzgün qərar verməsinin parlaq təcəssümüdür.

Hər kəs yaxşı xatırlayır, Azərbaycanı düşdüyü ən ağır vəziyyətlərdən, bir dövlət kimi yox olmaq təhlükəsindən xilas edən Ulu Öndər Heydər Əliyev 2003-cü il oktyabrın 1-də prezident seçkiləri ərəfəsində xalqa müraciət edərək qarşıdan gələn seçkilərdə prezidentliyə namizəd, siyasi varisi, Yeni Azərbaycan Partiyası Sədrinin I müavini İlham Əliyevi dəstəkləməyə çağırmışdı.

Ulu Öndər əminliklə bildirmişdi ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər: "İnanıram ki, mənim axıra çatdıra bilmədiyim taleyüklü məsələləri, planları, işləri Sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm".

Həmin vaxt Ümummilli Liderin səsinə səs verən xalqımız 2003-cü il oktyabrın 15-də böyük inam və güvənlə İlham Əliyevə səs verdi, Onu özünün Prezidenti seçdi.

Budur, artıq həmin tarixdən iki onillik keçib və indi bərqərar olduğumuz mövqedən ötən illərə nəzər saldıqda Prezident İlham Əliyevin yürütdüyü müdrik siyasət, əzm və qətiyyət sayəsində Azərbaycanın necə qürurverici bir yol qət etdiyinin şahidi oluruq.

Dövlət başçısı İlham Əliyev 2003-cü ildə Prezident vəzifəsinə seçiləndə Konstitusiyamıza və müqəddəs "Qurani-Kərim"ə əl basaraq and içdiyi kimi, Azərbaycanın ərazi bütövlüyünü, suverenliyini təmin təmin edib, Xankəndidə bayrağımızı dalğalandıraraq bütün dünyaya Qarabağın əzəli və əbədi Azərbaycan torpağı olduğunu bəyan edib.

Birliyin əzəməti

Cəmi 20 il ərzində bu möhtəşəm zirvəyə yüksəlməyimizə rəvac verən başlıca qüvvə isə, heç şübhəsiz, dövlət-xalq birliyimiz oldu.

İlk başdan dövlət başçısı İlham Əliyev çıxdığı bu taleyüklü yolda Azərbaycan xalqına arxalandı, müqəddəratının həll olunması istiqamətində isə xalqımız böyük etimad göstərdiyi İlham Əliyevi özünə arxa-dayaq gördü.

Məhz bu birlik sayəsində Azərbaycanın qarşısında aşa bilməyəcəyi çətinlik, həll edə bilməyəcəyi problem qalmadı, daim işıqlı gələcəyə doğru inamla irəlilədi.

44 günlük Vətən müharibəsində Müzəffər Ali Baş Komandan İlham Əliyevin ətrafında sıx birləşən xalqımız "dəmir yumruğ"a çevrilərək düşmənin başına zərbə endirdi, torpaqlarımız işğaldan azad edildi. Bu birlik milli mənafelərimizin həll olunduğu - istər hərbi, istər diplomatik olsun - bütün müstəvilərdə özünü göstərdi, eləcə də

23 saatlıq antiterror tədbirləri zamanı...

2020-ci il dekabrın 10-da Vətən müharibəsində Qələbəyə həsr olunmuş Zəfər paradında Prezident İlham Əliyev nitqində bu birliyimizə yüksək qiymət verərək demişdi: "Azərbaycan xalqı öz böyüklüyünü göstərdi, yüksək mənəvi ruhunu göstərdi. Bu Qələbənin səbəbkarı da Azərbaycan xalqıdır. Biz birlik, iradə, əzmkarlıq, milli ruh göstərərək tarixi missiyamızı yerinə yetirdik".

Bu seçkiyə qalib xalq kimi gedəcəyik...

Qarşıdan daha bir tarixi hadisə - növbədənkənar prezident seçkiləri gəlir. Prezidentin sərəncamı ilə 2024-cü il fevralın 7-də növbədənkənar prezident seçkiləri təyin edilib.

Vurğulayaq ki, bu seçkini digərlərindən fərqləndirən, əlahiddə edən bir neçə xüsusi məqam var. Suverenliyimizin təmin olunması sayəsində tarixdə ilk dəfədir ki, bütün torpaqlarımızda, onilliklərdir işğal altında olan ərazilərimizdə seçki keçirəcəyik...

İlk dəfədir ki, seçkiyə zəfər xalqı olaraq gedəcəyik...

Dekabrın 15-də Yeni Azərbaycan Partiyasının İdarə Heyətinin genişləndirilmiş iclasında dövlət başçısı, partiyanın Sədri İlham Əliyevin növbədənkənar prezident seçkilərində namizədliyi irəli sürülüb.

Lakin İlham Əliyev bütün Azərbaycan xalqının ürəkdən dəstəklədiyi namizəddir.

Qədirbilən xalqımız 2024-cü il fevralın 7-də keçiriləcək növbədənkənar prezident seçkilərində - Zəfər seçkisində İlham Əliyevə səs verməyi həm də özünün qalib lider İlham Əliyevə minnətdarlıq borcunu ödəyəcəyi fürsət, şans kimi dəyərləndirir, bunu böyük fəxr, qürur, ehtiram hissi ilə dilə gətirir.

Yasəmən MUSAYEVA,

Azərbaycan.-2023.- 17 dekabr, № 276.- S.5.