Azərbaycanı tarixinin ən uca zirvəsinə ucaldan rəhbər

Yeni Azərbaycan Partiyası (YAP) qalib Azərbaycan xalqının qalib lideri İlham Əliyevi prezidentliyə namizəd irəli sürüb. Yeni inkişaf dövrünə qədəm qoymuş xalqımız onu tarixinin ən yüksək zirvəzinə qaldıran İlham Əliyevə öz təşəkkürünü mövcud şəraitdə bu şəkildə ifadə edir. Bu gün bütün Azərbaycan xalqı Prezident İlham Əliyevin yanındadır və ona tam etimad göstərir.

Mövzu ilə bağlı qəzetimizə danışan Milli Məclisin deputatı Vüqar Bayramov bildirib ki, Prezident İlham Əliyevin rəhbərliyi ilə əldə etdiyi tarixi zəfərdən sonra ölkəmiz yeni inkişaf mərhələsinə qədəm qoyub. Azərbaycanın geosiyasi və geoiqtisadi mövqeyinin daha da möhkəmləndirilməsi, islahatların dərinləşdirilməsi, dayanıqlı inkişafın qorunub saxlanması prioritetlər kimi müəyyənləşdirilib. Prezident İlham Əliyev hakimiyyətdə olduğu son 20 il ərzində tarixi zəfərlərə imza atmaqla yanaşı, Azərbaycan xalqını qalib xalqa çevirən Müzəffər Ali Baş Komandandır. Ona görə də İlham Əliyevin namizədliyi Azərbaycanda inklüziv və davamlı inkişafın qorunması baxımından vacibdir.

Deputat qeyd edib ki, müstəqil yanaşma ilə İlham Əliyevin prezidentliyinin davamlılığının əhəmiyyətini çoxsaylı faktorlarla əsaslandırmaq mümkündür: "Əvvəla ona görə ki, Müzəffər Ali Baş Komandan Azərbaycanın ərazi bütövlüyünü və suverenliyini tam bərpa edən dövlət başçısıdır. Prezidentin rəhbərliyi ilə şanlı ordumuz yüz minlərlə məcburi köçkünün ata-baba yurdlarını düşmən torpağından azad edib. 30 il işğal altında qalan və tamamilə dağıdılaraq xarabalığa çevrilən torpaqlarımızda dövlət başçısının təşəbbüsü və xüsusi nəzarəti ilə hazırda genişmiqyaslı quruculuq işləri həyata keçirilir, artıq həm Qarabağda, həm də Şərqi Zəngəzurda intensiv qayıdışa start verilib".

Vüqar Bayramov İlham Əliyevin prezidentliyinin davamlılığını şərtləndirən vacib amilərdən danışarkən onu da deyib ki, son 20 ildə Azərbaycan regionda ən böyük uğurlara imza atan dövlətlərdəndir: "Nəticədə ÜDM 4, büdcə gəlirləri 30, xarici ticarət dövriyyəsi 10 dəfə artıb. Xarici borcun ÜDM-dəki payına görə, Azərbaycan dünyada ən yaxşı göstəriciyə malik 10 ölkə arasındadır. Son 20 ildə sərmayələrin ümumi həcmi 300 milyard ABŞ dollarını keçib ki, onun da 190 milyard dolları qeyri-enerji sektoruna yönəlib. Göründüyü kimi, Azərbaycan 20 il ərzində iqtisadi sahədə ciddi uğurlara nail olub".

Deputat vurğulayıb ki, bu amillər arasında ən vacibi isə İlham Əliyevin Ulu Öndərin müəyyənləşdirdiyi ideyaları inkişaf etdirən və milli strategiyanı daha da gücləndirən dövlət başçısı olmasıdır. "Bütün bunlar deməyə əsas verir ki, bu seçki Azərbaycan üçün yeni mərhələnin başlanğıcı olacaq. Bu mərhələ bütün sferalarda islahatların daha da dərinləşməsi, Böyük qayıdışın intensiv davam etdirilməsi və Azərbaycanın geosiyasi və geoiqtisadi mövqeyinin daha da güclənməsi ilə xarakterizə olunacaq", - deyə Vüqar Bayramov bildirib.

Nəzrin QAFARZADƏ,

Azərbaycan.-2023.- 17 dekabr, № 276.- S.4.