Seçkilər İlham Əliyevə yüksək etimadı bir daha təsdiq edəcək

"Dekabrın 15-də Yeni Azərbaycan Partiyasının İdarə Heyətinin genişləndirilmiş iclasında İlham Əliyevin prezidentliyə namizədliyinin irəli sürülməsi barədə qərar qəbul edilib. Bu qərar yalnız Yeni Azərbaycan Partiyası üzvlərinin deyil, eyni zamanda bütün Azərbaycan xalqının istəyini, arzusunu, rəyini ifadə edir".

Bu sözləri "Azərbaycan" qəzetinə Milli Məclisin deputatı, Ailə, qadın və uşaq məsələləri komitəsinin sədr müavini Jalə Əliyeva deyib. Deputat bildirib ki, Azərbaycan xalqı Prezident İlham Əliyevin simasında özünə böyük lider qazanıb. Məhz dövlət başçısının həyata keçirdiyi dönməz iradəli və qətiyyətli siyasət sayəsində Azərbaycan mümkün olmayanları mümkün edib.

Azərbaycanın otuz il əvvəlki ölkə olmadığını qeyd edən J.Əliyeva bildirib ki, ərazi bütövlüyümüz, suverenliyimiz tam bərpa olunub, üçrəngli bayrağımız uzun illər işğal altında qalan torpaqlarımızda qürurla dalğalanır. "Prezident İlham Əliyev Qarabağ və Şərqi Zəngəzurda sürətlə nəhəng quruculuq işləri aparan, ölkədə davamlı inkişafa istiqamətlənən layihələr reallaşdıran, hər bir vətəndaşın həyat şəraitinin yaxşılaşdırılması üçün sosial layihələr təşəbbüskarı olan, eyni zamanda müstəqil siyasət həyata keçirən Azərbaycanı yalnız diplomatiya, ordu quruculuğu sahəsində deyil, həmçinin sosial, səhiyyə, mədəniyyət, təhsil sahələrində də dünyanın aparıcı ölkələrindən birinə çevirən liderdir. Biz Azərbaycanı Cənubi Qafqazın ulduzuna çevirən bir liderdən danışırıq. Sadaladığımız bütün quruculuq işlərinin, inkişafın, irəliyə doğru atılan addımların hər birinin arxasında Prezident İlham Əliyevin imzası, iradəsi, qətiyyətli siyasəti dayanır", - deyə o əlavə edib.

Deputat vurğulayıb ki, bu gün Azərbaycan deyəndə 44 günlük Vətən müharibəsində inanılmaz zəfər çalmış, torpaqlarını geri qaytarmış və ötən üç il ərzində inkişafının ən yüksək səviyyəsinə çatan ölkə göz önünə gəlir. Əlbəttə, fevralın 7-də keçiriləcək növbədənkənar prezident seçkisi də bir daha Azərbaycan xalqının arzusunun, iradəsinin, etimadının nümayişinə və təsdiqinə çevriləcək. Xalqımız birmənalı olaraq öz liderinə, Müzəffər Ali Baş Komandanına, yenilməz sərkərdəsinə səs verəcək. Bu səsvermə ilə Azərbaycan daha parlaq, inkişaf etmiş günlərini yaşayacaq. Prezident İlham Əliyevin rəhbərliyi ilə Azərbaycan bu günə qədər olduğu kimi, 7 fevral tarixindən sonra da daha böyük addımlarla həm Cənubi Qafqaz regionunun, həm də dünyanın parlaq ulduzuna çevriləcək.

J.Əliyeva deyib: "Davamlı olaraq seçicilərin arasında olduğumuzdan və onlarla keçirdiyimiz çoxsaylı görüşlərdən gəldiyimiz qənaət bundan ibarətdir ki, Azərbaycan xalqının bir seçimi var. O da Prezident İlham Heydər oğlu Əliyevdir".

Əsmər QARDAŞXANOVA,

Azərbaycan.-2023.- 17 dekabr, № 276.- S.4.