YAP-ın qərarı xalqın istəyinin ifadəsidir

"Növbədənkənar prezident seçkiləri ilə əlaqədar Yeni Azərbaycan Partiyası İdarə Heyətinin genişləndirilmiş iclasında İlham Əliyevin prezidentliyə namizədliyinin irəli sürülməsi yalnız 720 min üzvü olan bir siyasi təşkilatın yox, bütövlükdə 10 milyonluq Azərbaycan xalqının, hətta 50 milyonluq azərbaycanlı kimliyinin təkidli tələbidir. Yaranışı belə ictimai-siyasi zərurətdən doğan və Heydər Əliyev şəxsiyyətinin işığında formalaşan bir təşkilatın bu gün öz qərarını xalqın tələbi əsasında qəbul etməsi təbiidir və çox müdrik yanaşmadır".

Bu sözləri "Azərbaycan" qəzetinə açıqlamasında Milli Məclisin deputatı Bəhruz Məhərrəmov deyib. Deputat bildirib ki, ölkəmizdə son 105 ildə ictimai-siyasi formasiya 3 dəfə dəyişib, Azərbaycan sabit inkişaf dövrünə isə məhz ötən əsrin 60-cı illərinin sonunda, Ulu Öndər ilk dəfə siyasi hakimiyyətə gəldikdən sonra qədəm qoyub: "Hətta ozamankı ittifaq çərçivəsində belə tam şəkildə feodal təfəkkürdən çıxa bilməyən cəmiyyətdə, iqtisadi gerilik və zəngin tarixi-mədəni irsin ərimək üzrə olduğu bir dövrdə Ulu Öndər Azərbaycana yeni nəfəs verib. Dahi liderin siyasi hakimiyyətdən 6 illik kənarlaşdığı dövr isə Azərbaycan tarixinin ən ağır və utancverici keçid dövrünə çevrilib. Bütün bu yaşananlar xalqın gen yaddaşına çevrilib və bu gün üzərindən yarım əsr keçməsinə baxmayaraq, hər bir azərbaycanlı Heydər Əliyev siyasi kursunun əhəmiyyətini, bu kursun davamlılığının ümummilli zərurət olduğunu dərk edir".

Bəhruz Məhərrəmov əlavə edib ki, bu kursun parlaq davamçısı, milli özünüdərki və inkişafı yeni mərhələyə yüksəltmiş İlham Əliyev şəxsiyyətinin rolu nəinki Azərbaycan xalqı, Cənubi Qafqaz başda olmaqla, bütün regionumuzda təsirli iz buraxmaqdadır. Siyasi suverenliyimizin möhkəmlənməsinə, tam iqtisadi müstəqilliyə nail olunmasına, ərazi bütövlüyünə, sərhəd toxunulmazlığına, beynəlxalq hüquqla tanınan bütün ərazilərimizdə konstitusiya quruluşunun bərqərar olunmasına məhz Prezident İlham Əliyevin rəhbərliyi altında nail olunub. Əsrlərdir məğlubiyyətlərə adət etmiş, itkilər verməkdə davam edən bir toplumdan qalibiyyət anlayışını unutmuş bir xalqdan müzəffər topluma möhtərəm İlham Əliyevin sayəsində çevrilə bilmişik. Bu xalq məhz Heydər Əliyev siyasi kursuna sadiq qalan Prezident İlham Əliyevin qətiyyəti ilə 3 il ərzində düşməni 2 dəfə kapitulyasiyaya məcbur edən qalibə çevrilib.

Deputatın sözlərinə görə, Prezident İlham Əliyevin uğurlu daxili və xarici siyasətinin, həyata keçirilən iqtisadi və siyasi islahatların məntiqi nəticəsi olaraq Azərbaycan tarixinin ən güclü dövrünə qədəm qoyub: "Bu mənada qədirbilən Azərbaycan xalqı və səs hüququna malik 720 min siyasi fəal vətəndaşının birləşdiyi bir partiyanın da növbədənkənar prezident seçkilərində iradəsinin məhz cənab İlham Əliyevin üzərinə fokuslanması çox təbiidir. Məlumdur ki, dövlət müstəqilliyini, suverenliyini və ərazi bütövlüyünü qorumaq bizim 6 ali konstitusion niyyətimizdən biridir. Azərbaycan öz müstəqilliyini bərpa etdiyi 32 il ərzində, daha dəqiq desək, real müstəqilliyimizin 30-cu ilində biz, nəhayət ki, ilk dəfə olaraq bəyan edə bilirik ki, Azərbaycan Müzəffər Ali Baş Komandanının qətiyyəti sayəsində bütün aspektlərdə müstəqilliyini, ərazi bütövlüyünü təmin etmiş, bütün suveren ərazilərində Konstitusiya quruluşunu bərqərar etmiş dövlətdir".

Zəfərimizlə yeni reallıqların yarandığını, tələblərimizin və prioritetlərimizin dəyişdiyini vurğulayan B.Məhərrəmov deyib: "Bizim böyük quruculuq və bərpa, xüsusən Qarabağ və Şərqi Zəngəzura həyatın qaytarılması, bütövlükdə vətəndaşların sosial rifahının yaxşılaşdırılması, ədalətli iqtisadi və sosial qaydalara uyğun olaraq hamının layiqli həyat səviyyəsinin təmin edilməsi, sabitliyin və təhlükəsizliyin davamlılığının qorunması kimi hədəflərimiz var. Prezident İlham Əliyevin özünün də ifadə etdiyi kimi, "İndi müstəqillik tariximizin inkişaf dövrünün qürurverici, yeni mərhələsindəyik". Bu gün tam yeni inkişaf dövrünə qədəm qoyduğumuz qalib və qüdrətli Azərbaycanda isə Heydər Əliyev siyasi kursuna və şəxsən İlham Əliyevin siyasi təfəkkürünə, onun müzəffər rəhbərliyinə əvvəlki dövrlərdən daha çox ehtiyac var".

Deputat sonda Azərbaycan xalqının Ümummilli Liderinin siyasi kursunun, cənab İlham Əliyev siyasətinin alternativi olmadığını yaxşı bildiyini qeyd edib. Əminik ki, fevralın 7-də müdrik xalqımız bizi qələbədən-qələbəyə aparan, Azərbaycanı tarixinin ən güclü və qalib dövlətinə çevirən Müzəffər Liderinə özünün minnətdarlıq borcunu ifadə edərək firavan və təhlükəsiz gələcəyinə, Heydər Əliyev siyasi kursuna dəstək verəcək.

Nəzrin QAFARZADƏ,

Azərbaycan.-2023.- 17 dekabr, № 278.- S.5.