Güclənən mövqe, artan nüfuz, yüksələn etimad

Azərbaycan COP29 beynəlxalq konfransına layiqli şəkildə evsahibliyi edəcək

"COP29 beynəlxalq konfransı Azərbaycanda, Bakıda keçiriləcək. Bu qərarı bütün dünya ölkələri bir neçə gün bundan əvvəl qəbul etmişdir və beləliklə, Azərbaycana növbəti dəfə böyük etimad və böyük hörmət göstərilmişdir.

Biz buna layiqik, biz apardığımız siyasət nəticəsində dünya miqyasında çox güclü mövqelərə sahib olmuşuq. Azərbaycana beynəlxalq aləmdə olan hörmət günbəgün artır və biz bu hörməti öz əməlimizlə, işimizlə, siyasətimizlə qazanmışıq".

Dekabrın 15-də BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının - COP29-un gələn il ölkəmizdə keçirilməsi ilə əlaqədar Prezident İlham Əliyevin sədrliyi ilə keçirilən müşavirədə dövlət başçısı bir daha bu konfransın əhəmiyyətindən, ölkəmizə gəstərilən böyük etimaddan və görüləcək işlərdən bəhs etdi.

İlham Əliyev konkret olaraq bildirdi ki, müstəqil siyasət, prinsipial mövqe, beynəlxalq hüquqa bağlılıq, sədaqət və eyni zamanda ölkə ərazisində suverenliyin bərpa edilməsi Azərbaycana olan hörməti daha da artırıb. Bu hadisənin önəmi ondadır ki, bu qərar antiterror əməliyyatından iki ay yarım sonra qəbul olunub və beləliklə, bir daha bütün dünya ictimaiyyəti Azərbaycana öz dəstəyini ifadə edib.

COP29 konfransının Bakıda keçirilməsi beynəlxalq aləmin hər bir üzvünün razılığı ilə mümkün olub. Yəni burada yekdil mövqe bir daha özünü göstərib. Hətta Ermənistan da Azərbaycanın xeyrinə qərar verib.

Maraqlıdır ki, 2 ay öncəyədək Azərbaycanı öz ərazilərində antiterror tədbirləri həyata keçirdiyi üçün ittiham edən, ölkəmizə şər-böhtan atan ölkələr də xeyrimizə müsbət rəy veriblər. Prezident də bidirdi ki, Azərbaycana qarşı irəli sürülmüş bu ittihamların heç bir əsası yox idi. Çünki Azərbaycan öz suveren ərazisində separatçılığa qarşı, işğalçılara qarşı antiterror əməliyyatı keçirərək beynəlxalq hüququn aliliyini özü təmin edib. Bəzi Qərb ölkələri, onların arasında, təbii ki, ənənəvi olaraq Fransa bununla barışmaq fikrində deyil. Halbuki artıq beynəlxalq birlik də görür ki, hətta Ermənistan bu vəziyyətlə barışıb. COP29 konfransının Bakıda keçirilməsi də bunu bir daha göstərir. İlham Əliyevin söylədiyi kimi, Fransada bəzi siyasi liderlər ermənilərdən daha çox erməni olmağa çalışırlar. Ancaq onlar da bu vəziyyətlə barışmağa məcbur olacaqlar.

Prezident dedi ki, bəzi hallarda beynəlxalq aləm, beynəlxalq birlik anlayışı Qərbdə təhrif edilir. Beynəlxalq birlik 30-40 ölkə deyil. Beynəlxalq birlik dünyanın bütün ölkələridir və bu ölkələr yekdilliklə Azərbaycana öz böyük dəstəyini göstəriblər.

Bu, birinci dəfə deyil. Azərbaycan 4 ildir Qoşulmama Hərəkatına uğurla sədrlik edir. Bu təşkilata sədrlik etmək 120 ölkənin dəstəyi ilə mümkün olub. Azərbaycan ona göstərilən etimadı layiqincə doğrultmasaydı, üzərinə düşən vəzifənin öhdəsindən gələ bilməsəydi, dünya ölkələri COP29 konfransının Bakıda keçirilməsi üçün qətiyyən müsbət rəy verməzdilər. Azərbaycanın nəinki Qoşulmama Hərəkatına sədrliyi, eləcə də təşkilatın işinə verdiyi töhfələr böyük göstəricidir. Bütün bunlar ölkəmizin artan beynəlxalq nüfuzuna öz müsbət təsirini də göstərib. Dünya dövlətləri ölkəmizə böyük etimad göstərirlər.

Azərbaycanın beynəlxalq toplantılara, forumlara, hətta idman yarışlarına yüksəksəviyyəli evsahibliyi dünya tərəfindən təqdir edilir. Avropa Oyunlarının standartlarını müəyyənləşdirən, İslam Həmrəyliyi Oyunlarına, siyasi-iqtisadi beynəlxalq forumlara, konfranslara ən layiqli şəkildə evsahibliyi ilə nüfuzunu artıran Azərbaycan indi də COP29-a hazırlaşır.

İlham Əliyevin də dediyi kimi, irimiqyaslı beynəlxalq tədbirlərin keçirilməsi ölkəmizin üzərinə böyük məsuliyyət qoyur. Bu sahədəki təcrübə yetərlidir ki, bu beynəlxalq konfransı da ən yüksək səviyyədə keçirək.

COP29 dünyada ən mötəbər beynəlxalq tədbirlərdən biridir. Ölkələrin təmsilçiliyi nöqteyi-nəzərindən BMT Baş Assambleyasından geri qalmır. Digər tərəfdən vaxt da o qədər çox deyil. Ona görə də Prezident dərhal bütün hazırlıq işlərinə start verilməsi üçün tapşırıq verdi.

Qeyd edək ki, bu günədək ölkəmizdə bir çox tədbirlər keçirilsə də, COP29 bu vaxta qədər keçirilən tədbirlərlə müqayisəyə gəlmir. Çünki COP29-da iştirak üçün 10 minlərlə xarici nümayəndə ölkəmizə gələcək, iki həftə ərzində Bakı növbəti dəfə dünyanın mərkəzinə çevriləcək. Müəyyən ehtimallara görə, təqribən 70-80 min xarici qonaq bu müddət ərzində ölkəmizdə olacaq.

Hazırlıq işləri ilə bağlı ciddi göstəriş və tapşırıqlarını verən İlham Əliyev şübhə etmədiyini bildirdi ki, Azərbaycan COP29 beynəlxalq konfransını da yüksək səviyyədə keçirəcək. Bu, ölkəmizin, xalqımızın növbəti böyük uğuru olacaq. Eyni zamanda Azərbaycan neft-qaz ölkəsi kimi bu sahədə də özünü göstərəcək və dünyada hər kəs bir daha görəcək ki, bizim gündəliyimiz "yaşıl enerji" ilə bağlıdır. "Yaşıl enerji" növlərinin yaradılması və dünya bazarlarına nəqli hazırda İlham Əliyevin enerji siyasətinin prioritetidir. Gələn il Bakının qucaq açacağı COP29-da bütün dünya buna bir daha şahidlik etmiş olacaq.

Rəşad BAXŞƏLİYEV,

Azərbaycan.-2023.- 19 dekabr, № 277.- S.5.