Yeni böyük hədəflərə hesablanmış addım

Ötən həftə Yeni Azərbaycan Partiyasının İdarə Heyətinin genişləndirilmiş iclası keçirildi və cənab İlham Əliyevin prezidentliyə namizədliyi irəli sürüldü.

Qafqazın ən böyük siyasi təşkilatı olan YAP bununla da seçki hazırlıqlarına start vedi. Günün müzakirə mövzusuna çevrilən bu məsələ ilə bağlı fikirlərini öyrəndiyimiz siyasətçilər hesab edirlər ki, partiyanın bu qərarı labüd idi və gözlənilirdi. Çünki bunun üçün kifayət qədər arqumentlər var.

Milli Məclisin deputatı Aydın Hüseynov "Azərbaycan" qəzetinə açıqlamasında bildirib ki, İlham Əliyevin rəhbərliyi altında görülən möhtəşəm işlər, qarşıda duran vəzifələr kifayət qədər zəngindir. Bütün bunları xalqımız, dəyərli seçicilər görür və qarşıdakı illərdə İlham Əliyevin Azərbaycana rəhbərlik etməsini istəyirlər. YAP təkcə ölkəmizdə deyil, o cümlədən postsovet məkanında ən iri partiyalardan biri sayılır. Üzvlərinin sayı 720 mindən çox olan bir partiyanın namizədi də son 30 ildə Azərbaycanı bütün bəlalardan, dağılmaqdan, məhv olmaqdan xilas edən bir siyasi təşkilatın, eyni zamanda hakim partiyanın təmsilçisi, sədri olmalı idi. YAP-ın seçimində həm də xalqın tələbi, istəyi və arzusu əsas rol oynayıb.

Aydın Hüseynov qeyd edib ki, İlham Əliyevin namizədliyinin irəli sürülməsinin əsasında onun son 20 ildə ölkəmizə rəhbərlik etdiyi müddətdə Azərbaycanın əldə etdiyi uğurlar və ən böyük problemimiz olan Qarabağ məsələsinin birdəfəlik həll edilməsi dayanır: "Seçicilər boş vədə heç vaxt inanmır, çünki bu dəfələrlə sınaqdan çıxarılıb. Azərbaycan seçicilərini müstəqilliyimizin ilk illərində bütün mənalarda aldadanlar, "çiçəkli gələcək" vəd edənlər çox olub. Amma Ulu Öndərimiz Heydər Əliyev hakimiyyətə gəldiyi ilk gündən vətəndaşlarla tam açıq danışıb, problemləri, çətinlikləri olduğu kimi deyib və bundan çıxış yollarını da xalqla birlikdə çözməyi məqsədəuyğun bilib. Xalqımız bu səmimiyyətdən çox uğurlar qazanıb, etibarın, sədaqətin, sözlə əməlin bir olduğunu Ulu Öndərimizin timsalında görüb. Ümummilli Liderin sadiq siyasi davamçısı İlham Əliyev də ata vəsiyyətinə əməl edərək verdiyi bütün sözləri, vədləri həyata keçirib. "Mən hər bir azərbaycanlının prezidenti olacağam" ifadəsi son 20 ildə öz təsdiqini tapıb".

Deputat bildirib ki, Prezident İlham Əliyev fəaliyyətinin ilk dönəmində ölkəmizdə ən azı 600 min iş yerinin açılacağı vədini verərək 5 il başa çatmamış sözünə əməl edib. Xüsusən gənclərimiz işlə təmin olunub, xarici əlaqələrimiz genişlənib. Xalqımız və dövlətimiz üçün vacib sahələr inkişaf etdirilib, "Əsrin müqaviləsi" tam olaraq həyata vəsiqə qazanıb. Azərbaycana xarici sərmayələr hər gün artmağa başlayıb, ölkəmiz etibarlı tərəfdaş kimi tanınıb. Neft kapitalının insan kapitalına çevrilməsini şərtləndirən amillər tətbiq edilib.

A.Hüseynov ötən 20 ildə əldə edilən uğurların sırasında xalqımız və dövlətçiliyimiz üçün ən böyük problemin - Qarabağ münaqişəsinin Azərbaycanın ərazi bütövlüyü çərçivəsində tam olaraq həllini tapdığını xüsusi qeyd edib. Məğlubiyyət, itki həmişə acı olur. Keçmiş hakimiyyətlərdən miras qalan ərazi itkilərimizin bərpası həm Ulu Öndər Heydər Əliyevin, həm də Prezident İlham Əliyevin hakimiyyətdə olduqları müddətdə prioritet məsələ olub. Son 20 ildə müxtəlif ölkə və şəhərlərdə Qarabağ münaqişəsinin sülh yolu ilə həll olunması üçün İlham Əliyev çoxsaylı görüşlər keçirib, müzakirələr aparıb. Amma işğalçılıq xisləti Ermənistanın konstruktiv yol tutmasına həmişə mane olub. Buna görə Ermənistana və onun arxasında duran güclərə mesajlar verilib, müharibə variantı onların yadlarına salınıb.

Deputat xatırladıb ki, BMT Təhlükəsizlik Şurasının 4 qətnaməsini yerinə yetirmək istəməyən güclər ATƏT-in Minsk qrupunda da dişsiz fəaliyyətləri ilə yadda qaldılar: "Ermənistanın son təxribatları Ali Baş Komandanın əmri ilə Azərbaycan Silahlı Qüvvələrinin əks-hücuma keçməsinə səbəb oldu. Tarixə 44 günlük Vətən müharibəsi kimi düşən "Dəmir yumruq" əməliyyatı Qarabağımızı və ətraf rayonları erməni işğalçılarından azad etməsi üçün kifayət etdi. İlham Əliyev sərkərdəlik məharəti ilə ordumuzu, Prezident kimi xalqı bir araya gətirə və böyük qələbəni əldə edə bildi. Ali Baş Komandan İlham Əliyev xalqın arzusunu gerçəkliyə çevirməklə yanaşı, həm də ən əsas vəzifəsini - Ata vəsiyyətini yerinə yetirdi. Bu, İlham Əliyevin nəinki 7 fevralda və ondan sonrakı dönəmlərdə də Azərbaycanın Prezidenti olacağına əsas verir. Bu seçim demokratik prinsiplərə tam uyğundur, çünki İlham Əliyev təkcə YAP-ın deyil, Azərbaycan xalqının namizədidir".

Əsmər QARDAŞXANOVA,

Azərbaycan.-2023.- 19 dekabr, № 277.- S.7.