Azərbaycan müəllimlərinin seçimi dövlət və xalq naminədir

Ümummilli Lider Heydər Əliyevin 100 illik yubileyinə həsr olunmuş Azərbaycan Müəllimlərinin XVI Qurultayını zəfərin doğurduğu böyük ruh yüksəkliyi, suverenliyimizin təmin olunmasından yaranan xoşbəxtlik hissi ilə keçirdik.

Zəfər qurultayı da adlandırılan budəfəki ali məclisimiz ötən qurultaylardan bir çox mühüm məqamlarla fərqlənirdi. Biz ilk dəfə idi ki, qurultayımıza qalib xalqın fəxrli müəllimləri kimi qatılır, geniş yığıncağımızı ərazi bütövlüyümüzün bərpası şəraitində gerçəkləşdirirdik. O da xüsusi hal idi ki, bu dəfə qurultayda təhsil ictimaiyyətimiz böyük quruculuq, qayıdış həyata keçirilən Qarabağ və Şərqi Zəngəzurda yaradılan hərtərəfli təhsil imkanlarından sevinclə bəhs edirdi. Azadlığından dərhal sonra bu ərazilərimizdə təhsil infrastrukturumuz da uğurla bərpa olunur.

Vurğulayım ki, möhtərəm Prezidentimiz İlham Əliyev 2021-ci il Müstəqillik Günündə Ağdam şəhər 1 nömrəli orta məktəbin - Qarabağın ilk məktəbinin - təməlini qoyaraq biz ağdamlılara, ümumiyyətlə, Azərbaycan təhsil ictimaiyyətinə böyük ərməğan etdi və bununla da tezliklə bütün işğaldan azad edilən ərazilərimizin təhsil ocaqlarının yenidən fəaliyyətə başlayacağının xoş xəbərini verdi.

Artıq Qarabağ və Şərqi Zəngəzurda ilk təhsil zəngi çalınıb, uşaqlarımız sevinclə dədə-baba torpaqlarında məktəbə qədəm qoyublar.

Prezidentin sərəncamı ilə Şərqi Zəngəzur Regional Təhsil İdarəsi və Qarabağ Regional Təhsil İdarəsinin yaradılması, eləcə də Xankəndi şəhərində Qarabağ Universitetinin yaradılması haqqında sərəncamın verilməsi bu qədim yurdlarımızda təhsilin inkişafına mühüm imkanlar yaradacaq.

Ötən 5 ildə təhsilimizin inkişaf göstəricilərinin, dinamikasının təhlili, eləcə də qarşıda duran hədəf və çağırışların müəyyənləşdirildiyi XVI qurultayda cənab Prezident İlham Əliyevin bizə ünvanladığı müraciətin səsləndirilməsi hər birimizin təhsil istiqamətində qarşıda gerçəkləşdirəcəyi işlər üçün yol xəritəsi oldu. Həmin müraciətdə dövlət başçımız inandığını bildirmişdir ki, xalqımıza zəfər sevincini yaşadan igid və qəhrəman övladlarımızın formalaşması naminə müstəsna əmək sərf etmiş fədakar müəllimlərimiz gənc nəslə bundan sonra da mükəmməl bilik verməklə yanaşı, onların milli-mənəvi dəyərlərə bağlılıq və azərbaycançılıq məfkurəsi ruhunda böyümələri üçün var qüvvə ilə çalışacaqlar.

Böyük vətənpərvər, Azərbaycan xalqını qələbədən-qələbəyə aparan, ona tarixindəki ən böyük zəfəri yaşadan Müzəffər Ali Baş Komandan, cənab Prezident İlham Əliyevin təhsil sistemində qazanılan nailiyyətlərdə misilsiz xidmətləri var.

Bu istiqamətdə mühüm islahatlar həyata keçirməsi, sərəncamlar verməsi, öz əlləri ilə Qarabağ və Şərqi Zəngəzurda təhsil ocaqlarının təməllərini qoyması, açılışlarını etməsi dövlət başçımız İlham Əliyevin təhsil sahəsinə olan birbaşa diqqət və qayğısının təzahürləridir.

Qürurluyam ki, təhsilimizin inkişafı üçün yaradılan bu münbit şərait nəticəsində rəhbərlik etdiyim Ağdam 38 saylı məktəb də xeyli uğurlara, nailiyyətlərə imza atıb.

Bu il məktəbimizdən ali təhsil müəssisələrinə sənəd verən 25 şagirddən 24-ü (3 nəfər ADA, 2 nəfər BDU, həmçinin Memarlıq və İnşaat, Dillər, Dövlət İqtisad, Slavyan, Texniki, Neft və Sənaye və digər universitetlərə) qəbul olub. Bir şagirdimiz Qarabağ Regional Təhsil İdarəsi üzrə ən yüksək - 658.8 bal toplayıb və ADA universitetinin Hüquq fakültəsinə daxil olub. Daha 5 şagirdimiz 500-dən yuxarı bal toplayıb, 2 şagirdimiz isə Türkiyə universitetlərinə qəbul olub.

Ağdam rayon 38 saylı tam orta məktəbin timsalında gətirdiyim uğurlu nümunəni ölkəmizin əksər təhsil müəssisələrinə şamil etmək olar və ildən-ilə göstəricilərimiz daha da yüksəlir.

Ulu Öndər Heydər Əliyevin ölkəyə rəhbərlik etdiyi zamandan etibarən inkişaf müstəvisinə çıxan təhsil sahəmizin bugünkü nailiyyətləri məhz Prezident İlham Əliyevin adı ilə birbaşa bağlıdır və bu Zəfər qurultayımızda da xüsusi vurğulandı.

Qurultayda qəbul olunan qətnamədə də qeyd olunur ki, qurultay böyük inam və nikbinliklə bəyan edir ki, elm və təhsil işçiləri əsası Ümummilli Lider Heydər Əliyev tərəfindən qoyulmuş milli təhsil quruculuğu prosesini Prezident İlham Əliyevin rəhbərliyi ilə uğurla davam və inkişaf etdirəcək.

Onu da qeyd edim ki, Azərbaycan müəllimlərinin XVI qurultayı 2024-cü il fevralın 7-də keçiriləcək növbədənkənar prezident seçkiləri ərəfəsində baş tutdu.

Dekabrın 15-də Yeni Azərbaycan Partiyası İdarə Heyəti tərəfindən İlham Əliyevin prezidentliyə namizədliyinin irəli sürülməsi xalqımızın hər bir üzvü kimi, müəllimlərimizin də böyük sevincinə səbəb oldu.

Ali məclisimizdə ünsiyyətdə olduğum müəllimlərin hamısının birmənalı olaraq mövqeyi bu idi ki, seçkilərdə Azərbaycan pedoqoqlarının, müəllimlərinin alternativsiz namizədi cənab İlham Əliyev olacaq.

Bəs niyə İlham Əliyev?! Bu sualın cavabı olduqca geniş və çoxşaxəlidir. Qısaca olaraq deyim ki, hamımız Ulu Öndər Heydər Əliyevin siyasətini layiqincə davam etdirən Prezident İlham Əliyevin ötən 20 il ərzində Azərbaycanı inkişaf etdirməsinin, dünyanın sayılıb-seçilən ölkəsinə çevirməsinin şahidləriyik. Cəmi 44 gün ərzində Müzəffər Ali Baş Komandan İlham Əliyev bizi işğala məruz qalan xalqdan qalib xalqa çevirib, hər yerdə başımızı uca edib.

Yüz minlərlə insanımızın 30 illik yurd həsrətinə son qoyan qalib lider İlham Əliyev daşı-daş üstündə qalmayan Qarabağ və Şərqi Zəngəzura yeni həyat bəxş edir. Vaxtilə Ağdamdan didərgin düşmüş, məcburi köçkünlüyün bütün ağrı-acılarını dadmış biri kimi deyə bilərəm ki, erməni barbarlarının "Qafqazın Xirosiması"na çevirdiyi Ağdamda Prezident İlham Əliyevin rəhbərliyi altında həyata keçirilən quruculuq işləri, heç mübaliğəsiz, yer üzərindəki möcüzədir. Yalnız mən yox, Ağdamın əvvəlki çal-çağırlı günlərini görənlərin, şəhərin düşmən talanına, dağıntısına məruz qalmasına ürək ağrısı ilə baxanların və indi Qarabağın qədim diyarında aparılan dünyada bərabəri olmayan abadlığı seyr edənlərin hamısı bunu böyük heyrət və heyranlıqla dilə gətirirlər.

Eyni zamanda da digər işğaldan azad edilən ərazilərimizdə sürətli tikinti-quruculuq işlərinin aparılması, o yerlərə qayıdışın həyata keçirilməsi dövlət başçımızın gerçəkləşdirdiyi sözlərlə təsviri mümkün olmayan qeyri-adi işləridir.

Ümumiyyətlə, 2003-cü ildə Azərbaycan xalqının yekdilliklə özünə Prezident seçdiyi İlham Əliyev ötən müddətdə apardığı müdrik və məqsədyönlü siyasət sayəsində xalqımızı bütün milli hədəflərinə yetirib.

2023-cü il, ərazi bütövlüyümüzün, suverenliyimizin təmin olunduğu möhtəşəm bir tarixdə milli təhsilimizin inkişafını nümayiş etdirən Azərbaycan Müəllimlərinin XVI Qurultayını keçirməyimizin özü də təhsil cameəmiz, pedaqoqlarımız üçün böyük şərəf, fəxr, qürurdur.

Buna görə də əminəm ki, qarşıdan gələn növbədənkənar seçkilərdə həm müəllimlərimizin, həm də bütün Azərbaycan xalqının bir namizədi olacaq: bizi zəfər zirvəsinə yüksəldən Müzəffər Lider İlham Əliyev!

Məsud HƏMZƏYEV,

Ağdam rayon 38 saylı tam orta məktəbin direktoru

Azərbaycan.-2023.- 19 dekabr, № 277.- S.7.