Hazırkı reallıq sülh müqaviləsinin imzalanması üçün əlverişlidir

"Son vaxtlar Azərbaycan-Ermənistan münasibətlərinin normallaşması istiqamətində müsbət addımlar atılır. Baş verən hadisələr iki ölkə arasında birbaşa əlaqə kanallarının işlək vəziyyətə düşdüyündən xəbər verir. Bu, etimad mühitinin yaradılması prosesində vasitəçi olmadan da yüksək nəticələr əldə etməyin mümkünlüyünü göstərir. Əgər Ermənistan sülh və əməkdaşlıq istəyirsə, Azərbaycanla ikitərəfli danışıqlara üstünlük verməli və fikir ayrılığı yaradan məsələləri yalnız birgə müzakirə etdikdən sonra yekun nəticəyə gəlməlidir".

Bu fikirləri "Azərbaycan" qəzetinə açıqlamasında Milli Məclisin deputatı Azər Badamov deyib. Deputat bildirib ki, Azərbaycanla Ermənistan arasında sülh müqaviləsinin imzalanması təşəbbüsünün müəllifi Prezident İlham Əliyevdir: "Üç il əvvəl, Vətən müharibəsi başa çatdıqdan dərhal sonra dövlət başçımız Ermənistana düşmənçiliyə son qoymağı və dövlətlərarası münasibətlərə yeni səhifədən başlamağı təklif etmişdi. Lakin Ermənistan havadarlarına arxalanaraq sülh danışıqları prosesini manipulyasiya edir, 10 noyabrda imzalanmış üçtərəfli Bəyanatı icra etmək əvəzinə yaratdığımız yeni reallığa kənar oyunçular gətirir, regionda gərginliyi artırmağa çalışırdı. Ermənistanın qeyri-konstruktiv mövqe sərgiləyərək Qarabağdakı separatçıları yenidən revanşizmə hazırlaması bizi cari il sentyabrın 19-20-də lokal xarakterli antiterror tədbirləri keçirməyə məcbur etdi. Nəticədə, bütün ərazilərimizdə suverenlik təmin edildi və Qarabağda erməni separtizminin kökü kəsildi. Antiterror tədbirlərindən sonra regiondakı reallıq tamamilə dəyişdi və sülh müqaviləsinin imzalanmasında Ermənistanın problem kimi gördüyü məsələlər öz həllini tapdı. Nəhayət, dünya dövlətlərinin ədalətli mövqeyimizi dəstəkləməsi ilə yanaşı, Ermənistan da Qarabağın Azərbaycanın tərkib hissəsi olduğunu bir daha təsdiq etdi".

Deputat vurğulayıb ki, son bir ayda Azərbaycan-Ermənistan münasibətlərinin normallaşması prosesində yeni mərhələ açılıb: "Müstəqillik tarixində 33 ildən sonra ilk dəfə olaraq Ermənistan Dubayda keçirilən COP28 beynəlxalq konfransında COP29-un evsahibliyi üçün öz namizədliyini geri götürərək Azərbaycanı dəstəkləyib və dünya birliyinə də ölkəmizə dəstək vermək üçün çağırış edib. Azərbaycan da öz növbəsində Ermənistanın konfransın büro üzvlüyünə qəbul olunmasını dəstəkləyib. Daha sonra isə Prezident İlham Əliyevin tapşırığı ilə Azərbaycan Respublikasının Prezidenti Administrasiyası ilə Ermənistanın baş nazirinin Aparatı arasında mövcud kanallarla birbaşa əlaqə yaradılaraq hərbçilərin qarşılıqlı azad edilməsi ilə bağlı qərar qəbul olunub. Dekabrın 13-də heç bir kənar vasitəçi olmadan əsirlərin mübadiləsi baş tutub. Həmçinin Azərbaycan və Ermənistanın Baş nazirləri eyni vaxtda sərhədlərin delimitasiyası ilə bağlı Dövlət Komissiyasının reqlamentini də təsdiq ediblər".

Azər Badamovun dediyinə görə, bütün bunlar Azərbaycanla Ermənistanın heç bir vasitəçi olmadan da sülh danışıqlarına gedə biləcəyini göstərir. Çünki bəzi vasitəçilər dövlətlərarası münasibətlərin normallaşmasına ancaq əngəl törədirlər. Əgər vasitəçilər müxtəlif "təşəbbüslər" göstərməsəydilər, bəlkə də sülh müqaviləsi çoxdan imzalanmışdı.

Deputat qeyd edib ki, Azərbaycanla Ermənistan arasında ikitərəfli formatda baş verən son proseslər Qərb, ABŞ və Rusiya tərəfindən də dəstəklənib. Sülh danışıqlarına vasitəçilik üçün Vaşinqton, Brüssel və Moskva arasında yeni rəqabət başlayıb. Onların hər biri sülhü dəstəklədiyini bildirsələr də, əslində, hərəsinin regionda öz maraqları var.

Azər Badamov onu da deyib ki, Azərbaycan sülhlə bağlı təşəbbüsləri həmişə dəstəkləyib: "Ölkəmiz sülh prosesinə yanaşmada ikili standartlar tətbiq edən platformalarda iştirakdan isə hər zaman imtina edib. Bu gün Azərbaycanla Ermənistan arasında sülh danışıqlarının təşkili təşəbbüsü ilə çıxış edən ölkələr dünyada gedən müharibələrin iştirakçısıdırlar. Onların əsas məqsədi silahlarını sataraq pul qazanmaq olduğu üçün müharibələrin baş verməsində maraqlıdırlar. Belə olan halda, vasitəçilərin iştirakı ilə regionda sülhə çatmağın mümkünsüzlüyü açıq-aydın ortadadır. Əgər sülhə münasibət ikitərəfli formatdan çoxtərəfli formata qayıdarsa, danışıqların aparılması və yekun sənədin imzalanması uzun prosesə çevrilə bilər".

Nəzrin QAFARZADƏ,

Azərbaycan.-2023.- 19 dekabr, № 277.- S.8.