Bakı Şəhər İcra Hakimiyyətində "Heydər Əliyev" kitabının təqdimatı keçirilib

Bakı Şəhər İcra Hakimiyyətində xalqımızın Ümummilli Lideri Heydər Əliyevin 100 illiyinə həsr edilən tədbirlər çərçivəsində Bakı Şəhər İcra Hakimiyyəti və Azərbaycan Milli Elmlər Akademiyası Tarix İnstitutunun yeni layihəsi - Ulu Öndərin həyat və ictimai-siyasi fəaliyyətinin müxtəlif dövrlərini əhatə edən elmi məqalələr toplusu olan "Heydər Əliyev" kitabının təqdimatı keçirilib.

Tədbirdə tanınmış tarixçilər, tədqiqatçı-alimlər, elm və mədəniyyət xadimləri, millət vəkilləri, dövlət qurumlarının və ölkə ictimaiyyətinin, KİV-in nümayəndələri, Vətən müharıbəsi veteranları və qazilər, din xadimləri iştirak ediblər.

Tədbirin əvvəlində Ulu Öndər Heydər Əliyevin və vətən torpaqlarının azadlığı uğrunda şəhid olmuş soydaşlarımızın əziz xatirəsi birdəqiqəlik sükutla yad olunub və kitabla bağlı videoçarx nümayiş etdirilib.

Təqdimat mərasimində çıxış edənlər Bakı Şəhər İcra Hakimiyyətinin başçısı Eldar Əzizov bildirib ki, Ulu Öndər Heydər Əliyevin xatirəsinə həsr edilən iki fəsildən ibarət akademik xarakterli bu kitab Bakı Şəhər İcra Hakimiyyəti və Tarix İnstitutunun yeni layihəsidir. Eldar Əzizov qeyd edib ki, Ulu Öndər Heydər Əliyevin zəngin siyasi irsinin və dövlət başçısı İlham Əliyevin siyasətinin yaxından öyrənilməsi və təbliği Azərbaycanda sabitliyin qorunmasına və ölkəmizin gələcək inkişafına təminat verir.

Təqdimat mərasimində çıxış edənlər Ulu Öndər Heydər Əliyevin xalqımız qarşısındakı misilsiz xidmətlərindən söz açaraq vətənini hədsiz dərəcədə sevən bu dahi insanın ölkəmizin tarixinə, xalqımıza son dərəcə böyük sevgi və hörmətlə yanaşmasından danışıb və bu kitabın Ulu Öndərin zəngin irsinin öyrənilməsi və təbliği işində mühüm rol oynayacağını vurğulayıblar.

Yasəmən MUSAYEVA,

Azərbaycan.- 2023.- 20 dekabr (№278).- S.7.