Heydər Əliyev ideyaları işığında reallaşan humanizm missiyası

Xeyirxahlığı, dar gündə insanlara, kimsəsizlərə, təbii fəlakətdən zərər-çəkənlərə əl tutması ilə dünyada özünə böyük hörmət və nüfuz qazanan Heydər Əliyev Fondu xalqımızın Ümummilli Lideri Heydər Əliyevin ideyaları əsasında formalaşıb. Bəşəri və müqəddəs missiya daşıyan bu fonda Mehriban xanım Əliyeva rəhbərlik edir.

Ulu Öndərin aylarla, illərlə ailə söhbətlərinin iştirakçısı olaraq o böyük şəxsiyyətin xalqımızın xoşbəxt gələcəyi və ölkəmizin müstəqilliyi uğrunda nələr düşündüyünü, nələr hiss etdiyini, nələr planladığını Prezidentimiz İlham Əliyev qədər Mehriban Əliyeva da bilirdi.

Mübaliğəsiz demək olar ki, Heydər Əliyevin milli dövlətçilik ideyalarının həyata keçirilməsi, ölkəmizin gələcəyi ilə bağlı arzularının reallığa çevrilməsi baxımından missiya Azərbaycan Prezidenti İlham Əliyevin üzərinə düşür və bu missiya şərəfli səviyyədə gerçəkləşir.

Mənəvi sahədə isə bu irsi Mehriban xanım Əliyeva Ulu Öndərin ideyaları işığında formalaşdırdığı Heydər Əliyev Fondu tərəfindən yaşadır və inkişaf etdirir.

Heydər Əliyev Fondunun əsrin fəlakətinə çevrilmiş qardaş Türkiyə Cümhuriyyətində baş verən zəlzələdə zərərçəkənlərə hər cür humanitar yardımlar etməsi, əvvəllər isə Pakistanda zəlzələdən zərər çəkən qızlar məktəbinin yenidən inşası, Hollandiyada, Rusiyada, Gürcüstanda, Rumıniyada, Misirdə və digər ölkələrdə təhsil ocaqlarının müasirləşdirilməsinə kömək, Afrika ölkələrinin qeyri-maddi mədəni irsinin qorunmasına yardımlar etməsi, daha sonra Parisdə Versal sarayının parkında yerləşən abidələrin bərpası, habelə Strasburqda Müqəddəs Məryəm kafedral kilsəsinin yenidən qurulması görünən reallıqlardır.

Fondun təşkilatçılığı və dəstəyi ilə Qəbələdə ənənəvi beynəlxalq musiqi festivallarının təşkili, dünyanın fərqli ölkələrində icra edilən beynəlxalq layihə və proqramlarla, konfrans və toplantılarla bəşəriyyətə Azərbaycan incəsənətinin möhtəşəmliyi təlqin edilir.

Prezident İlham Əliyev gündəmə gətirdiyi "insan kapitalı" ideyası ilə gələcəyin dəyərli insanlarını yetişdirməyə çalışır. Bu, zəmanəmizin ən qiymətli sərvətidir. Bu xəzinənin mərkəzində ilk növbədə təhsil dayanır. Ona görə də əsası Ümummilli Lider Heydər Əliyev tərəfindən qoyulan təhsilə qayğı, gənclərin savadlı və sağlam böyüməsi Heydər Əliyev Fondunun prioritet istiqamətlərindəndir.

Ötən ilin əvvəllərində böyük Azərbaycan mesenatı Hacı Zeynalabdin Tağıyevin paytaxtın görməli yerində heykəlinin açılışında iştirak edən Azərbaycan Prezidenti İlham Əliyev çıxışı zamanı demişdir: "Xeyriyyəçilik sahəsində Cənubi Qafqazda ən böyük təsisat Heydər Əliyev Fondudur. Heydər Əliyev Fondu 20 ilə yaxındır ki, yaradılmışdır və bütün bu illər ərzində fondun əsas məqsədi, vəzifəsi insanlara kömək göstərmək, Azərbaycan mədəniyyətini dünyada təbliğ etmək, təhsil, səhiyyə, mədəniyyət, incəsənət, elm sahələrinə töhfə verməkdir".

Ümummilli Lider Heydər Əliyevin ideyalarının həyata keçirilməsini özünün əsas fəaliyyət proqramı kimi qəbul edən fonda 10 may 2004-cü ildən Mehriban xanım Əliyeva rəhbərlik edir. Ötən illər ərzində Mehriban xanımın tövsiyə və təşkilatçılığı ilə ölkəmizdə müxtəlif sahələrdə, o cümlədən valideyn himayəsindən məhrum uşaqlara kömək, uşaq evlərinin, internat məktəblərinin abadlaşdırılması və maddi bazalarının yaxşılaşdırılması da daxil edilməklə təhsil, səhiyyə, mədəniyyət sahələrində irimiqyaslı proqramlar həyata keçirilib.

Humanizm, mərhəmət, vətənpərvərlik və xeyirxahlıq missiyası ilə böyük nüfuz qazanmış Heydər Əliyev Fondunun layihələri sırasında ölkəmizdə təhsil sisteminin inkişafı əsas yerlərdən birini tutur. Fondun rəhbərliyi altında neçə illər bundan öncə ölkəmizdə "Uşaq evləri və internat məktəblərinin inkişafı proqramı"nın hazırlanıb həyata keçirilməsi öz uğurlu bəhrəsini vermişdir. Xatırladaq ki, respublikamızdakı uşaq evləri və internat məktəblərindəki mövcud problemlərin həll olunmasına yönəldilən bu layihə fondun təhsil sahəsindəki fəaliyyətinin əsas istiqamətlərindən birinə çevrilmişdir. İlkin mərhələdə aparılmış monitorinqdən sonra uşaq müəssisələrində təhsil və sosial sahədə problemlərin həllinə yönələn 4 mühüm istiqamət: texniki dəstək, təhsil, səhiyyə və ictimai fəallıq prioritet kimi müəyyənləşdirilmişdir.

Heydər Əliyev Fondunun layihələri sırasında əsas istiqamətlərdən biri də gənc nəslin maariflənməsi və yüksək yer tutmasıdır. Məhz bu məqsədlə fond bütün imkanlarından istifadə etməklə məktəb tikintisinə daha çox diqqət ayırır. Neçə illərdir Heydər Əliyev Fondunun təşəbbüsü ilə həyata keçirilən "Yeniləşən Azərbaycana yeni məktəb" proqramı tədris prosesinin günün tələbləri səviyyəsində qurulmasına imkan verən yeni məktəb binalarının inşasına istiqamətlənib. Layihə çərçivəsində paytaxtda və regionlarda müasir standartlara cavab verən məktəb binaları inşa edilib, neçə-neçə məktəb cari və ya əsaslı təmir olunaraq müasir avadanlıq, istilik sistemi, zəngin kitabxana, əyani vəsait və kompüter avadanlığı ilə təchiz olunub.

Heydər Əliyev Fondunun səhiyyə sahəsində əks-səda doğuran layihələrindən biri "Diabetli uşaqlara ən yüksək qayğı"dır. Layihə çərçivəsində ölkəmizdə diabet xəstəliyinə düçar olmuş 14 yaşınadək uşaqlar müntəzəm olaraq lazımi miqdarda insulin preparatları və şpris-qələmlərlə təmin edilirlər. "Talassemiyasız həyat naminə" layihəsi isə bu xəstəliyin geniş yayıldığı ölkələrdən hesab olunan Azərbaycanda yüksək qiymətləndirilir.

Heydər Əliyev Fondu 2020-ci ilin sentyabrında başlanan və tarixi zəfərlə başa çatan 44 günlük Vətən müharibəsində fəallıq göstərərək qələbəyə öz töhfəsini verdi. Həm daxili, həm beynəlxalq arenada həqiqətləri çatdırmaq, ölkəmizə, xalqımıza haqq işində dəstək olmaq üçün mümkün olan hər şeyi etdi. Fondun əməkdaşları hazırda erməni işğalından azad olunmuş bölgələrdə tikinti-quruculuq işlərinə səfərbər olublar.

Heydər Əliyev Fondunun ötən dövrdə Azərbaycanın görkəmli alimlərinin, yazıçı və bəstəkarlarının yubileylərinin keçirilməsi, "Kitabi-Dədə Qorqud" dastanının 1300 illiyinin beynəlxalq miqyasda qeyd olunması, UNESCO-nun "Dünya irs siyahısı"na İçərişəhərin, Şirvanşahlar Saray Kompleksinin, Qobustan Qoruq Muzeyinin, Atəşgahın və digər tarixi abidələrin, habelə mədəni irs nümunələrinin daxil edilməsi Azərbaycan milli mədəniyyətinin dünya miqyasında təbliği sahəsində də xidmətləri diqqətəlayiqdir. Fond xalqın varlığını özündə yaşadan mənəvi-intellektual irsə həssaslıqla yanaşaraq onun dünya arenasında təbliğində fəal iştirak edir.

Rəhman SALMANLI

Azərbaycan.- 2023.- 23 fevral.- S.4.