Ümummilli Lider Heydər Əliyevin anadan olmasının 100-cü ildönümünə həsr olunmuş tədbir keçirilib

İyulun 5-də Qoşulmama Hərəkatının (QH) Əlaqələndirmə Bürosunun nazirlər görüşü çərçivəsində Azərbaycan xalqının Ümummilli Lideri Heydər Əliyevin anadan olmasının 100-cü ildönümünə həsr olunmuş tədbir keçirilib.

AZƏRTAC xəbər verir ki, QH Əlaqələndirmə Bürosunun nazirlər görüşünə qatılan nümayəndə heyətlərinin rəhbərlərinin iştirakı ilə keçirilən tədbirdə xarici işlər naziri Ceyhun Bayramov, Türkiyə Respublikasının xarici işlər naziri Hakan Fidan və keçmiş Yuqoslaviya Sosialist Federativ Respublikasının son xarici işlər naziri, Qoşulmama Hərəkatının əsasının qoyulduğu Bandunq Konfransında şəxsən iştirak etmiş Budimir Lonçar çıxış ediblər.

Nazir Ceyhun Bayramov çıxışında müasir və müstəqil Azərbaycanın qurucusu, Ulu Öndər Heydər Əliyevin dövlətçiliyimizin əsasının qoyulması və qorunması istiqamətində çoxşaxəli və fədakar fəaliyyətindən geniş bəhs edib. Ölkəmizin müstəqilliyinin bərpa olunmasından sonra Ermənistanın Azərbaycana qarşı hərbi təcavüzü nəticəsində yaranmış çətin vəziyyət, qaçqın və məcburi köçkün problemi, iqtisadi və sosial böhrana baxmayaraq, Ümummilli Liderin, özünün də dediyi kimi, Azərbaycanın müstəqilliyini əbədi, daimi və dönməz etməyə nail olduğunu bildirib.

Əsası Ulu Öndər Heydər Əliyev tərəfindən qoyulmuş xarici siyasət kursunun Azərbaycan Respublikasının Prezidenti İlham Əliyev tərəfindən uğurla davam etdirildiyi qeyd olunub. Xarici siyasətimizin qarşılıqlı faydalı əməkdaşlığın təşviqi, beynəlxalq sülh və təhlükəsizliyin qorunmasına töhfə verilməsinə yönəldiyi diqqətə çatdırılıb. Bu xüsusda, Azərbaycan xalqının milli maraqları, ölkəmizin suverenliyi və ərazi bütövlüyümüzün qorunmasının hər zaman xarici siyasətimizin prioriteti olduğu bildirilib.

Tədbirdə çıxış edən Türkiyənin xarici işlər naziri Hakan Fidan beynəlxalq mühitdə artan gərginliyin və beynəlxalq hüququn fundamental norma və prinsiplərinin pozulduğu bir dövrdə Türkiyə Respublikasının Hərəkatın əsas prinsiplərinə sadiq olduğunu qeyd edib.

Türkiyə və Azərbaycan qardaşlığını “Bir millət, iki dövlət” kəlamı ilə təsvir edən dahi şəxsiyyət Ümummilli Lider Heydər Əliyevin Azərbaycan dövlətçiliyinin qorunması və möhkəmləndirilməsində müstəsna xidmətləri xatırlanıb.

Tədbirdə çıxış edən keçmiş Yuqoslaviya Sosialist Federativ Respublikasının son xarici işlər naziri, Qoşulmama Hərəkatının əsasının qoyulduğu Bandunq Konfransında şəxsən iştirak etmiş Budimir Lonçar xüsusi qonaq qismində Əlaqələndirmə Bürosunun nazirlər görüşünə dəvətə görə minnətdarlıq bildirib. Ümummilli Lider Heydər Əliyevin Azərbaycanın iqtisadi və sosial inkişafı, onun region və dünya ölkələri ilə münasibətlərinin möhkəmləndirilməsi, habelə Azərbaycan Respublikasının beynəlxalq arenada nüfuzunun artırılmasında müstəsna rolu qeyd edilib.

Daha sonra isə tədbir iştirakçıları Ulu Öndər Heydər Əliyevin anadan olmasının 100 illiyinə həsr olunmuş videoçarxı izləyiblər.

Azərbaycan.-2023.- 6 iyul.- S.5.