Baxtiyor Saidov: “Qoşulmama Hərəkatının güclənməsində Azərbaycanın mühüm rolu var”

İyulun 5-də Qoşulmama Hərəkatının Əlaqələndirmə Bürosunun nazirlər görüşü işini panel iclaslarla davam etdirir.

AZƏRTAC xəbər verir ki, iclasda çıxış edən Özbəkistan xarici işlər naziri Baxtiyor Saidov Azərbaycanın paytaxtı Bakı şəhərinin dünya əhəmiyyətli tədbirlərin keçirildiyi ünvana çevrildiyini bildirib. O, Qoşulmama Hərəkatının güclənməsində və beynəlxalq nüfuzunun artmasında Azərbaycanın mühüm rolunun olduğunu vurğulayıb və bunu yüksək qiymətləndirib. “Hazırda qlobal ictimaiyyət böhranlarla üz-üzədir, ərzaq və enerji təhlükəsizliyinə təhdidlər regionlara mənfi təsir göstərir. Qoşulmama Hərəkatına üzv ölkələr də iqlim böhranı ilə qarşılaşıb və bəziləri artıq bundan əziyyət çəkir”, - deyən nazir əlavə edib ki, Qoşulmama Hərəkatı regional və beynəlxalq siyasətdə aparıcı qüvvəyə çevrilir.

Sonra çıxış edən İraq Baş nazirinin müavini, xarici işlər naziri Fuad Hüsseyn Qoşulmama Hərəkatının çoxtərəfliliyi, qlobal sülhü, həmrəyliyi təşviq etdiyini vurğulayıb. O deyib ki, İraq bundan sonra da böhranların həlli üçün həll yolları təklif edəcək.

Beynəlxalq aləmdə terrorla mübarizənin vacibliyinə də toxunan Fuad Hüsseyn deyib ki, İraq torpaqları da bu problemdən əziyyət çəkib, amma müharibədən qalib çıxıb.

Son dövrlər islamofobiyanın, ksenofobiyanın gücləndiyini vurğulayan nazir bunun insan haqları bəyannaməsinə, beynəlxalq dəyərlərə zidd olduğunu diqqətə çatdırıb. O, həmçinin qeyd edib ki, dini inanclara və rəmzlərə hörmətsizlik qəbuledilməzdir, bu, qınanmalıdır. Xüsusilə demokratik ölkələrdə belə addımlar ifadə azadlığı kimi təqdim olunur, amma bu, nifrət aktıdır.

Küveyt xarici işlər naziri Şeyx Salem Abdullah Al-Caber Al-Sabah çıxışında Azərbaycanın Qoşulmama Hərəkatına sədrliyi dövründə təsisatda müsbət irəliləyişlərin olduğunu vurğulayıb. Küveyt XİN-in rəhbəri İsveçdə Quranın yandırılmasını kəskin şəkildə pisləyib, bu addımın cəzasız qalmalı olmadığını vurğulayıb.

Belarusun xarici işlər naziri Sergey Aleynik isə bildirib ki, Qərb Qoşulmama Hərəkatı ölkələrinə qarşı birtərəfli məhdudlaşdırıcı addımlar atır, təzyiq göstərir, bu da dayanıqlı inkişafa imkan vermir. "Biz birtərəfli məhdudiyyətlərə qarşı həmrəy olmalıyıq. Biz eyni prinsipləri - sülhü, çoxtərəfliliyi, dayanıqlı inkişafı bölüşürük. Qoşulmama Hərəkatının oynayacağı vacib rol var. Dünyada qlobal geosiyasi toqquşmaların baş alıb getdiyi bir vaxtda səmimi dialoq yeganə çıxış yoludur".

Digər çıxış edənlər - Venesuelanın, Malayziyanın və Uqandanın XİN başçıları Qoşulmama Hərəkatının önəmindən danışıb, dünyada baş verən regional və beynəlxalq problemlərin həlli yolları ilə bağlı fikirlərini bölüşüblər.

Azərbaycan.-2023.- 6 iyul.- S.6.