Azərbaycan Sahibkarlar Konfederasiyasının nümayəndə heyətinin Özbəkistana işgüzar və yaddaqalan səfəri

İyulun 3-7-də Daşkənd şəhərində "Yeni Özbəkistan: biznes və investisiya üçün yeni perspektivlər" mövzusunda silsilə tədbirlər keçirilib.

Tədbirlərin ilk günü Türk Ticarət və Sənaye Palataları Birliyinin iclası keçirilib. Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) prezidenti Məmməd Musayevin rəhbərlik etdiyi nümayəndə heyəti iclasda iştirak edib.

İclasda Özbəkistan Respublikasının Baş nazirinin müavini Cəmşid Xocayev, Türk Ticarət və Sənaye Palataları Birliyinin İdarə Heyətinin sədri, Türkiyə Palatalar və Birjalar Birliyinin prezidenti M.Rıfat Hisarcıklıoğlu, Özbəkistan Respublikası Ticarət və Sənaye Palatasının Rəyasət Heyətinin sədri - gənclər siyasəti və idman naziri Adham İkramov, Türk Dövlətləri Təşkilatı Baş katibinin müavini Ömər Kocaman, Türk İnvestisiya Fondunun prezidenti Bağdad Amreyev, Özbəkistan Respublikası Ticarət və Sənaye Palatasının sədri Davron Vahabov, Qırğız Ticarət və Sənaye Palatasının prezidenti Temir Sariev, Türkmənistanın Ticarət və Sənaye Palatasının şöbə müdiri Kamal Vəliyev və Kipr Türk Respublikasının Ticarət və Sənaye Palatasının sədri Turqay Deniz çıxış ediblər.

M.Musayev çıxışında Rıfat Hisarcıklıoğlunu yenidən TOBB prezidenti seçilməsi münasibətilə təbrik edib. O, Özbəkistanın istər Azərbaycan, istərsə də türk dünyası üçün əhəmiyyəti və ölkələrimiz arasındakı iqtisadi əməkdaşlığın hazırkı vəziyyəti, mövcud imkanlar barədə danışıb. ASK-nin prezidenti Türk Ticarət və Sənaye Palatasının gələcək imkanlarının çox geniş olduğunu vurğulayıb. Məlumat olaraq tədbir iştirakçılarının diqqətinə çatdırıb ki, Türk Dövlətləri Təşkilatının üzvlərinin ümumi ərazisi 4,8 milyon kvadrat kilometr, əhalisi 174 milyon nəfərdən çoxdur. 2022-ci ilin yekun nəticələrinə görə, üzv dövlətlərdə ümumi daxili məhsulun (ÜDM) həcmi 1,4 trilyon, ticarət dövriyyəsi 856 milyard ABŞ dolları təşkil edir. Ümumilikdə dünya ərazisinin 1 faizini, ticarət dövriyyəsinin 3faizini Türk Dövlətləri Təşkilatına üzv ölkələr əhatə edir.

Palata ilk növbədə üzv ölkələrdə fəaliyyət göstərən sahibkarların şəbəkələşməsinə, ölkələrimizin iqtisadi özəlliklərini öyrənməyə imkan yaradıb. Ötən dövr ərzində üzv dövlətlərin bir çoxunda biznes-forumlar təşkil olunub və müəyyən yeni iqtisadi əməkdaşlıqların əsası qoyulub.

Eyni zamanda konfederasiya rəhbəri Azərbaycan Sahibkarlar Konfederasiyası ilə Özbəkistan Ticarət və Sənaye Palatası arasında yüksək əlaqələrin olduğunu böyük məmnunluqla vurğulayıb. O, hər iki qurum arasında təsis edilən Azərbaycan-Özbəkistan İşgüzar Şurasının fəaliyyətindən bəhs edərək, sahibkarlara dəstəyin göstərilməsi, ölkələrimiz arasında investisiya qoyuluşunun artırılması məqsədilə atılan addımları qeyd edib. M.Musayev ölkəmizdə iqtisadi sahədə aparılan struktur islahatlar, investisiya mühiti, Qarabağ və Şərqi Zəngəzur iqtisadi rayonlarındakı mövcud iqtisadi potensial haqqında da tədbir iştirakçılarına ətraflı məlumat verib.

Səfər çərçivəsində nümayəndə heyəti bir sıra mühüm görüşlərdə və debatlarda iştirak edib, Türkiyə Odalar və Borsalar Birliyi nəzdində Türkiyə İqtisadiyyat və Texnologiya Universitetinin Daşkənd filialı olan "TOBB ETÜ TASHKENT" Universitetinin fəaliyyəti, mövcud elmi-innovativ potensialı ilə tanış olublar.

ASK-nin prezidenti səfər çərçivəsində "Yeni Özbəkistan: biznes və investisiya üçün yeni perspektivlər" panel müzakirələrində iştirak edib. Paneldə Özbəkistan Parlamentinin vitse-spikeri Sodiq Safoyev, Türkiyə, Rusiya və digər ölkələrin tanınmış biznes nümayəndələrinin iştirak etdikləri tədbirdə M.Musayev bildirib ki, qardaş Özbəkistan istər Azərbaycan, istərsə də türk dünyası üçün hər zaman mühüm əhəmiyyət kəsb edib. Hazırda Azərbaycanla Özbəkistan arasında siyasi, mədəni, iqtisadi və digər sahələrdə əlaqələr yüksələn xətlə inkişaf edir. Belə ki, hər iki ölkənin dövlət başçıları arasında olan dostluq və qardaşlıq münasibətləri ikitərəfli əlaqələrdə bütün sahələrə öz töhfəsini verib. Bu dostluq əlaqələrinin ruhuna uyğun olaraq, Azərbaycan Sahibkarlar Konfederasiyası Özbəkistanın müvafiq biznesə dəstək təşkilatları ilə birgə ölkələrimiz arasında ticarət və iqtisadi əlaqələrin inkişafı istiqamətində işlər görməkdədir.

İlk dəfə 2018-ci ilin mart ayında Azərbaycan Sahibkarlar Konfederasiyası olaraq böyük nümayəndə heyəti ilə Özbəkistanda rəsmi səfərin təşkil olunması ilə biznes nümayəndələri arasında başlanan əməkdaşlığın inkişaf etdiyini deyən M.Musayev Azərbaycan Sahibkarlar Konfederasiyası ilə Özbəkistan Respublikası Ticarət və Sənaye Palatası arasında İşgüzar Şuranın yaradılmasına dair sazişin müddəalarına görə artıq 3 iclasın keçirildiyini və perspektiv əməkdaşlıq istiqamətlərinin müəyyən olunduğunu bildirib.

Konfederasiya prezidenti hər iki ölkədə çalışan sahibkarlara dəstəyin göstərilməsi, ölkələrimiz arasında investisiya qoyuluşunun artırılması məqsədi ilə ASK-nin Özbəkistan Respublikasında nümayəndəsi kimi 2021-ci ildən Fərid Verdiyevin fəaliyyətə başladığını vurğulayıb.

M.Musayev onu da qeyd edib ki, Azərbaycan Sahibkarlar Konfederasiyası ilə Özbəkistan Ticarət və Sənaye Palatası arasında əməkdaşlıq həm ikitərəfli formada, həm də beynəlxalq təşkilatlar, xüsusilə Türk Ticarət və Sənaye Palataları Birliyi çərçivəsində uğurla davam edir. O, 2022-ci il sentyabrın 16-da Şuşa şəhərində Qarabağ və Şərqi Zəngəzur regionunun bərpası və inkişafına həsr olunmuş Şuşa Türk Biznes-Forumunu xüsusilə qeyd edib. M.Musayev Türk Dövlətləri Təşkilatına üzv və müşahidəçi ölkələrdə fəaliyyət göstərən sahibkarları Qarabağ və Şərqi Zəngəzur regionunun geniş iqtisadi potensialından istifadə etməyə dəvət edib. Bildirib ki, qardaş özbək xalqı adından işğaldan azad edilmiş Füzuli şəhərində Özbəkistan Prezidenti cənab Şavkat Mirziyoyevin təşəbbüsü ilə tikilməkdə olan məktəb dostluq və qardaşlığımızın bariz nümunəsidir.

Azərbaycan dövlətinin öz iqtisadiyyatını, onun strukturunu reformasiya etdiyini, ölkəmizdə güclü iqtisadi islahatların aparıldığını vurğulayan Məmməd Musayev bu islahatlarda başlıca hədəflərdən biri kimi investisiya mühitinin əlverişliliyini artırmaq olduğunu bildirib. Azərbaycan dövlətinin postpandemiya və postkonflikt dövründə keyfiyyətcə yeni olan və 2021-2030-cu illəri əhatə edən strateji mərhələyə daxil olduğunu söyləyib. M.Musayev həmçinin ölkəmizin ərazi bütövlüyünün bərpası ilə səciyyələnən yeni strateji dövrdə dərin institusional islahatlar hesabına Azərbaycan dövlətinin qüdrətinin daha da artırılması, yüksək rifah cəmiyyətinin qurulması, azad edilmiş bölgələrə tarixi qayıdış və məskunlaşmanın təmin edildiyini bildirib.

ASK-nin prezidenti Azərbaycan ilə Özbəkistan, həmçinin digər Türk Dövlətləri Təşkilatına üzv ölkələr arasında qeyri-neft sektoru, xüsusən "yaşıl enerji", maliyyə, elm və texnologiya, informasiya texnologiyaları, təhsil, kənd təsərrüfatı, o cümlədən turizm kimi sahələrdə əhatə dairəsini genişləndirmək üçün böyük potensial olduğunu qeyd edib.

Konfederasiya rəhbəri və nümayəndə heyəti səfər çərçivəsində keçirilmiş ikitərəfli görüşlərdə sahibkarları maraqlandıran sualları cavablandırıb.

Azərbaycan.-2023.- 8 iyul.- S.11.