Fəxr etdiyimiz gənclik

Bütün sahələrdə aparıcı qüvvə kimi iştirak edən müasir Azərbaycan gəncləri uğurlar qazanırlar. Bununla həm özlərinin istedad və bacarıqlarını göstərir, həm də öz ailələrinin, xalqının, vətəninin başını ucaldırlar.

Bugünkü Azərbaycan gəncliyinin ən təqdirəlayiq cəhətlərindən biri müasir olduqları qədər də köklərinə bağlılıqlarıdır. Xalqının tarixini dərindən öyrənən gənclər Azərbaycanın zaman-zaman çox ağır sınaqlardan keçdiyini, yadellilərin hücumlarına məruz qaldığını, ayrı-ayrı əsrlərdə işğal olunduğunu, yağmalandığını bilirlər. Bilirlər ki, məmləkətimizə, onun zəngin sərvətlərinə göz dikən yağılar xalqımızın sinəsinə çalın-çarpaz dağ çəkiblər, övladlarını şəhid ediblər, yurdlarını talayıblar. Azərbaycanı ikiyə bölüblər. Əzəli torpaqlarımızda heç zaman mövcud olmamış Ermənistan adlı dövlət yaradıblar. Bununla da məmləkətimizdən gözlərini çəkməyiblər. Xislətində mənfurluq, qəddarlıq, qəsbkarlıq olan ermənilərə havadarlıq edərək Qarabağ və Şərqi Zəngəzur ərazilərini də Azərbaycandan qoparmağa cəhd göstəriblər. XX əsrin sonlarında erməniləri o vaxtların ən müasir silahları ilə silahlandıraraq və digər yardımlar edərək dəhşətli cinayətlər, terrorlar, soyqırımları törətmələrinə şərait yaradıblar. Böyük, güclü dövlətlərdən hər cür yardımlar alan ermənilər bu qəddar əməllərini o zaman dünyanın gözü önündə həyata keçiriblər.

O zaman Ermənistan azərbaycanlıları ata-baba yurdları olan Şərqi Azərbaycanda sıxışdırır, ermənilərin onları hücumlara məruz qoymalarına, şikəst etmələrinə, qətlə yetirmələrinə rəvac verirdi. Nəticədə Ermənistan uzun illər plan qurduğu, cəhd etdiyi, qismən də müvəffəq olduğu arzusuna çatmış, Qərbi Azərbaycanı əsl sakinləri olan türklərsiz qoymuşdur.

Həmin illər Azərbaycanın Qarabağ və Şərqi Zəngəzur bölgələrindən də ağır xəbərlər gəlirdi. 1990-cı illərin əvvəllərində Ermənistan həmin əraziləri böyük dövlətlərdən aldığı güc sayəsində işğal edə bildi. İşğal uzun illər davam etdi. 30 ilə yaxın Qarabağ və Şərqi Zəngəzur əraziləri Ermənistanın əsarətində qaldı. Həmin müddətdə ermənilər qədim və gözəl Qarabağı, Şərqi Zəngəzuru xarabalığa çevirdilər. Azərbaycanlıların evlərini qarət etməklə kifayətlənmədilər. Qədim və müasir tikililəri uçurub dağıtdılar, əllərinə keçəni daşıyıb Ermənistana apardılar. Erməni vandalları Qarabağın, Şərqi Zəngəzurun təbiətinə də divan tutdular. Təbii sərvətlərimizi talan etdilər. Azərbaycanın mənfur ermənilərin tapdağı altında qalan, sanki haray çəkərək öz sakinlərini çağıran, imdad diləyən torpaqlarının xilası hər bir azərbaycanlının ən böyük arzusuna, ən müqəddəs amalına çevrildi.

İndiki Azərbaycan gəncləri bu nisgil, həsrət, təəssüb hissləri ilə böyüyüb boya-başa çatdılar. Onların çoxu Qarabağ və Şərqi Zəngəzur ərazilərinin Ermənistan tərəfindən işğalı ilə nəticələnən Birinci Qarabağ müharibəsindən sonra dünyaya gəliblər. Ancaq vətən torpaqlarına ayaq basmadan, görmədən də sevmək, yolunda bir an belə tərəddüd etmədən canından keçməyə hazır olmaq mümkündür. Bunu 2020-ci ilin payızında 44 günlük İkinci Qarabağ müharibəsində Azərbaycan gəncləri bir daha sübut etdilər. Prezident, Silahlı Qüvvələrin Ali Baş Komandanı İlham Əliyevin qeyd etdiyi kimi, Qarabağı azadlığa qovuşduran əsgər və zabitlərimizin mütləq əksəriyyəti Qarabağın işğalından sonra dünyaya gəliblər. Bu vətənpərvər gənc nəsil Qarabağı görmədən onun həsrətini yaşayıblar və işğaldan qurtulması üçün qanlı mübarizəyə atılıblar.

Ermənistan o günə qədər də bağladığı sazişə ciddi yanaşmadığını, əməl etmədiyini göstərirdi. 1994-cü ildə atəşkəs barədə saziş imzalasa da, yerinə yetirmirdi. Azərbaycanın həm hərbi mövqeləri, həm də dinc yaşayış məntəqələri Ermənistan silahlı qüvvələri tərəfindən mütəmadi olaraq müxtəlif silahlardan atəşə tutulurdu. 2020-ci il sentyabrın 27-də İkinci Qarabağ müharibəsi də Ermənistanın növbəti təxribatı nəticəsində başladı. O gün Prezident, Silahlı Qüvvələrin Ali Baş Komandanı İlham Əliyevin çağırışına səs verərək könüllü şəkildə silaha sarılan gənclər vətən uğrunda döyüşlərə atıldılar. Onların rəşadəti sayəsində xalqımızın 30 illik həsrətinə son qoyuldu, ölkəmizin ərazi bütövlüyü bərpa edildi.

Hələ İkinci Qarabağ müharibəsinin ilk günündə - sentyabrın 27-də Azərbaycan xalqına müraciət edən Ali Baş Komandan İlham Əliyev qətiyyətlə demişdir: "Erməni əsgərinin bizim torpağımızda nə işi var?! Ermənistan ordusunun bizim torpağımızda nə işi var?! Heç kəs üçün sirr deyil ki, "Dağlıq Qarabağ ordusu"nun tərkibində olan şəxsi heyətin 90 faizi Ermənistan vətəndaşlarından ibarətdir. Ermənistan işğalçı dövlətdir, bu işğala son qoyulmalıdır və son qoyulacaqdır.

Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!"

Minlərlə Azərbaycan gənci də bu haqq işi uğrunda cəbhəyə yollandı. Sinəsini düşmən güllələrinə sipər edərək, qəhrəmanlıq nümunəsi göstərdilər. Müqəddəs vətən torpaqlarını işğalçılardan azad etdilər. Ali Baş Komandan İlham Əliyev gənclərimizin rəşadətini belə ifadə etdi: "Bu gün Azərbaycan gəncləri cəmiyyətimizin fəal hissəsidir. Biz haqlı olaraq gənclərimizlə fəxr edə bilərik. Bizim gənclərimiz torpaq uğrunda, vətən uğrunda vuruşurlar. Bizim şəhidlərimizin böyük əksəriyyəti gənclərimiz olubdur. Bizim gənclərimiz hərbi qələbələrimizi şərtləndiriblər".

Gənclərimiz vətən uğrunda döyüşlərlə yanaşı, arxa cəbhədə də yüksək fəallıq göstərdilər. Azərbaycanla bağlı həqiqətlərin, işğalçı Ermənistanın əzəli torpaqlarımızda törətdikləri vandallıq aktlarının beynəlxalq ictimaiyyətin diqqətinə çatdırılmasında fəal iştirak etdilər. Yalnız müharibə dövründə deyil, sonra da gənclərimizin müxtəlif əcnəbi dillərdə yaydıqları həqiqətlər əsl erməni xislətini, vandallığını, barbarlığını dünyaya nümayiş etdirdi.

Qarabağda, Şərqi Zəngəzurda yenidən Azərbaycan bayrağı dalğalanır. Düşmən işğalından qurtulmuş o yerlər bu gün yenidən qurulur. Ancaq zaman göstərir ki, hər bir dövlət, hər bir xalq azadlığını, müstəqilliyini qorumaq, davamlı inkişafa nail olmaq üçün həm də baş verənləri unutmamalı, tarixdən ibrət dərsləri almalıdır. Prezident İlham Əliyevin dediyi kimi: "Bizdən sonra gələn nəsillər tarixi bilməlidir, unutmamalıdır. Çünki məhz düzgün təhlil apararkən, tarixdən ibrət götürərək biz inamla irəliyə gedə bilərik".

Zöhrə FƏRƏCOVA,

Azərbaycan.-2023.- 9 iyul.- S.5.