Xəstə separatçılar seçim qarşısında

"Olum, ya ölüm"

D.Karneginin adını unutduğum əsərində ruhi xəstəxananın həkimi ilə bağlı bir epizod var: həkim dəlilərə baxıb həmkarına deyir ki, bəlkə, biz heç bunları sağaltmayaq. Çünki biri özünü Amerikanın prezidenti sayır, biri İngiltərə kraliçası, biri də Çinin Baş naziri olduğunu hesab edir. Yəni öz aləmlərində bunlar xoşbəxtdirlər.

Gəlmə ermənilərin bu gün Azərbaycanın ərazisində özlərinə dövlət yaratmaq fikri, separatçı Arayikin özünü rus sülhməramlılarının nəzarət etdiyi oyuncaq "DQR"in "prezident"i hesab etməsi də eynən bu epizodu xatırladır.

Özünü "prezident" sayan Arayik yenə özünümüdafiədən və müqavimətdən dəm vurur. Özlərini qondarma qurumun "deputat"ları sayanlar da bu barədə görüşlər keçirir, məlumatlar yayırlar.

Arayik Arutyunyan, sanki Bakı onu adam hesab edirmiş kimi, Azərbaycanın təklifini qəbul edib danışıqlar üçün Bakıya getmədiyinin səbəbini açıqlayıb: "Bakı bizimlə yalnız bir mövzunu - inteqrasiyanı müzakirə edir, başqa mövzunu müzakirə etmir. Müxtəlif yerlərdən mənə deyirlər: gedək, razı salarıq. Çalışdım, iki il çalışdım. Əgər kimsə mənim pis danışıq aparan biri olduğumu düşünürsə, deməli, mən son mərhələdə danışıqlar aparmamışam. Ardıcıllığı təqdim edəcəyəm: gedirik, ordunun buraxıldığını bəyan edirik, sonra dövlət idarəetmə sistemini ləğv edirik. İcma seçkiləri mexanizmini özləri güclə yaradırlar, ondan sonra bizə qaz, işıq veriləcək, yolda getməyə icazə veriləcək. Lakin necə hərəkət edəcəyimiz də bəllidir - Azərbaycan vətəndaşı kimi. Mən danışıqların, görüşlərin əleyhinə deyiləm. Başa düşməliyik ki, problemlərimiz olacaq, lakin bütün bunları aşmaq olar. Biz iki şey etməliyik - özünümüdafiə və müqavimət. Bununla bağlı nə edilib və nə edilməlidir, əgər istək olarsa, biz ayrıca müzakirə edəcəyik".

Göründüyü kimi, bu dəlilər hələ də planlar cızır və özlərini Qarabağın "sahib"i hesab edirlər. Görünür, bu xəstə ermənilərin yenidən "müalicə"yə ehtiyacları var. Həmin "müalicə"ni edən isə yenə də Azərbaycan əsgəri olacaq. İndi könüllü və ya icbari "müalicə" arasında seçimi də özləri etsinlər, özü də tez. Sonra gec ola bilər. Xəyalları Karneginin əsərindəki həkimə getməsin...

Zəkurə QULİYEVA,

Azərbaycan.-2023.- 9 iyul.- S.4.