Prezident qətiyyəti

Prezident qətiyyəti İlham Əliyev xalqın maraqlarını təmin edən siyasətin hər zaman prioritet olduğunu bir daha təsdiqlədi

Prezident İlham Əliyevin sədrliyi ilə keçirilən bu ilin altı ayının sosial-iqtisadi yekunlarına həsr olunmuş müşavirədə dövlət başçısı hər zaman olduğu kimi, görülən işlərin, həyata keçirilən sosial-iqtisadi layihələrin, mütərəqqi islahatların nəticələrini dəyərləndirdi, eləcə də qarşıdakı dövr üçün hədəfləri müəyyənləşdirdi.

İlham Əliyev proqram xarakterli çıxışında Ermənistanla sülh müqaviləsinin imzalanma prosesinin son nəticələri barədə xalqa məlumat verdi, eyni zamanda ölkə gündəmində olan bəzi sosial-iqtisadi proseslərlə bağlı göstəriş və tapşırıqlarını diqqətə çatdırdı.

Azərbaycanın sülh danışıqları ilə bağlı mövqeyi aydındır, məntiqlidir

Bu bir həqiqətdir ki, hazırda Azərbaycan regionda əsas söz sahibi olan dövlət kimi çətin və mürəkkəb geosiyasi şəraitdə müstəqil xarici siyasət həyata keçirir. Azərbaycan bölgənin yeganə ölkəsi olaraq düşünülmüş nümunəvi daxili və xarici siyasəti ilə həm inkişaf edir, iqtisadi potensialını artırır, həm də regional təhlükəsizliyin təmini istiqamətində ardıcıl, sistemli və mətin addımlar atır.

İkinci Qarabağ müharibəsindəki Zəfərimizdən sonra regionda yaranmış yeni reallıqlara uyğun siyasət yürüdən İlham Əliyevin əsas hədəfi bölgədə uzunmüddətli sabitliyin təmin edilməsidir. Əlbəttə ki, tərəflər arasında imzalanacaq sülh müqaviləsi təhlükəsizliyin qarantı hesab olunur. Ona görə də Azərbaycanın ortaya qoyduğu mövqe beynəlxalq birliklər, böyük dövlətlər tərəfindən də təqdir edilir.

Sülh müqaviləsi ilə bağlı aparılan danışıqlara toxunan dövlət başçısı bir daha bəyan etdi ki, Azərbaycanın sülh danışıqları ilə bağlı mövqeyi aydındır, məntiqlidir və beynəlxalq hüquqa əsaslanır. Yalnız bu prinsiplər, beynəlxalq hüququn normaları əsasında sülh müqaviləsi imzalana bilər.

İlham Əliyev həmçinin bu ay keçiriləcək yüksəksəviyyəli təmasların əhəmiyyətini də dəyərləndirdi: "Son danışıqlar raundları və bir neçə gündən sonra nəzərdə tutulan yüksəksəviyyəli təmaslar bir məqsədi güdür ki, biz sülh anlaşmasına daha da yaxınlaşaq. Biz bunu arzulayırıq, bunu təşəbbüskar kimi irəli sürmüşük. Ancaq yenə də deyirəm, hər şey bizdən asılı deyil, qarşı tərəf də buna hazır olmalıdır və sözdə ifadə etdiyi prinsipləri kağız üzərinə də keçirməlidir".

Prezident müxtəlif bəhanələrlə sülh müqaviləsini imzalamaqdan boyun qaçıran məğlub Ermənistanın da mövqeyində dəyişikliyin olduğunu söyləyərək vurğuladı ki, son müsbət məqamlardan biri də Hayastan tərəfinin mövqeyində müsbətə doğru hərəkətin olmasıdır. Əgər Ermənistan rəhbərliyi keçən ilin oktyabrında Azərbaycanın ərazi bütövlüyünü, suverenliyini və sərhədlərini qəbul etmişdirsə, bu ilin may ayında daha irəli gedərək artıq ölkəmizin ərazisinin parametrlərini də, o cümlədən Qarabağ və anklav kəndlərimiz daxil olmaq şərtilə rəsmən tanıyıb. Bu, müsbət hal kimi qiymətləndirilməlidir.

Prezidentin də söylədiyi kimi, indi sıra eyni sözlərin kağız üzərində də öz təsdiqini tapmasına, imzaların atılmasına və münasibətlərin yaradılmasına çatıb. Hər halda Azərbaycan bu istiqamətdə səylərini davam etdirəcək. Sülh müqaviləsinin imzalanması təkcə Azərbaycan üçün deyil, Ermənistan üçün də olduqca vacibdir. İllərdir regionda reallaşdırılan qlobal miqyaslı layihələrdən kənarda qalan Ermənistan sülh müqaviləsini imzalamaqla yeni inkişaf mərhələsinə keçid edə bilər.

Xarici investor təbiətimizi zəhərlədiyi üçün insanlar haqlı olaraq etiraz səsini ucaldıblar

Dövlət başçısı müşavirədə Gədəbəy rayonunda baş vermiş hadisəyə də münasibət bildirərək hər zamankı kimi qətiyyətli mövqeyini nümayiş etdirdi. Bəllidir ki, İlham Əliyevin yürütdüyü siyasətin mərkəzində hər zaman xalqın maraqları dayanıb. Xalqı narahat edən bütün məsələlər daim Prezidentin diqqət mərkəzində olub və lazım gəldikdə vətəndaşlarla birbaşa ünsiyyətdə olaraq problemlərin yerindəcə həll olunması tapşırığını verib.

Gədəbəy rayonunda baş vermiş hadisənin tamamilə qəbuledilməz olduğunu bəyan edən İlham Əliyev hesab edir ki, bu məsələdə Ekologiya və Təbii Sərvətlər Nazirliyi ən azı səhlənkarlığa yol verib, nəzarətsizlik nümayiş etdirib, passiv müşahidəçi kimi çıxış edib və bunun nəticəsində xarici investor təbiətimizi zəhərləyib. İnsanlar haqlı olaraq öz etiraz səsini ucaldıblar.

Amma bununla yanaşı, bəzi təxribatçı qüvvələr vətəndaşların bir hissəsini yoldan çıxararaq onları qanunsuz hərəkətlər etməyə sövq ediblər. Bununla da xoşagəlməz hallar yaşanıb. Prezident deyir ki, vətəndaşların bir hissəsi təxribatçıların fitnəsinə uyaraq ədəbsiz, qanunsuz hərəkətlər ediblər və bu da dözülməzdir, qəbuledilməzdir. Həmin təxribatçıların bəziləri Azərbaycanda, bəziləri xaricdə gizlənir. Azərbaycandakılar artıq müəyyən edilib və bir neçəsi məsuliyyətə cəlb olunub. Xaricdəkilər də tezliklə məsuliyyətə cəlb ediləcək: "Heç kim, necə deyərlər, fikirləşməsin ki, biz bunu unutmuşuq. Azərbaycanda xaos, özbaşınalıq, təxribat xarakterli addımlar 1993-cü ildə başa çatıb. Əgər kimsə unudubsa, biz xatırlada bilərik. Ona görə vətəndaşlar da həm mədəniyyət göstərməlidirlər, necə deyərlər, mərifət göstərməlidirlər, qanuna tabe olmalıdırlar".

Dövlət başçısı ölkəmizdə hər zaman asayişin keşiyində dayanan, qanunsuz hərəkətlərin qarşısını alan, vətəndaşın hüquqlarının təmin olunmasında vəzifəsini yerinə yetirən Azərbaycan polisinin hadisə zamanı nümayiş etdirdiyi mövqeyini də qiymətləndirdi: "Bizim polis gecə-gündüz soyuqda, istidə, dağda asayişi qoruyur. Bizim Daxili Qoşunlarımız Qarabağda müharibə zamanı şəhid verib. İndi kimsə gəlsin, polisə ləkə vursun. Mən buna imkan verməyəcəyəm və hər kəs bunu bilsin - təxribatçılar, o təxribatlara uyanlar və bütün ictimaiyyət".

Qeyd edək ki, bəzi vətəndaşlar təxribatçıların əməllərinə uyaraq polisi daşa basıb və onların ünvanına xoşagəlməz ifadələr işlədiblər. Prezident də deyir ki, insanlar Azərbaycan polisinə daş atmamalıdır, polisə daş atmaq heç kimə şərəf gətirən hərəkət deyil. Digər tərəfdən bu, həm də cinayət faktıdır: "Əgər Azərbaycan polisi dözümlülük göstərirsə, o demək deyil ki, kim istəyir polisə daş ata bilər. Bu, qətiyyən mümkün deyil. Mən hər kəsə deyirəm, burada biz kiminsə nazı ilə oynayası deyilik, necə lazımdır, əgər lazım bilsək, kimi lazımdır, elə cəzalandırarıq ki, peşman olar".

Prezident bir həftə vaxt verdi

Bu hadisənin səbəblərini də izah edən dövlət başçısı bildirdi ki, ölkəmizdə xarici şirkətlər üçün hər zaman əlverişli biznes mühiti yaradılıb, böyük güzəştlər edilib. Azərbaycan xarici şirkətlərə hər zaman investisiya yatırmaları üçün çox əlverişli məkan kimi tanınıb. Lakin bu, o demək deyil ki, hər hansısa şirkət öz işinin xeyrinə təbiətimizə ziyan vura və ya insanların örüş, otlaq sahələrini zəbt edə bilər.

Görünən odur ki, Gədəbəydə fəaliyyət göstərən həmin şirkət Prezidentin də söylədiyi kimi ya Ekologiya və Təbii Sərvətlər Nazirliyi ilə sövdələşib, ya da onu özbaşına edib. Buna görə də bu məsələ ciddi araşdırılmalıdır.

Dövlət başçısı bəyan etdi ki, bununla bağlı prokurorluğa, digər aidiyyəti qurumlara bütün göstərişlər verilib.

İlham Əliyev bir daha ciddi xəbərdarlıq edərək aidiyyəti qurumlara bir həftə vaxt verdi. Bu müddət ərzində həm Prezidentə, həm də ictimaiyyətə məlumat verilməli, məsələ araşdırılmalıdır. Orada təbiətə, insanların sağlamlığına zərrə qədər təhlükə varsa, o fəaliyyət dayandırılmalıdır.

Ümumiyyətlə isə, ölkəmizdə işləyən xarici şirkətlər və yerli şirkətlər Azərbaycan qanunlarına hörmət etməlidirlər. Əgər hörmət etməyəcəklərsə, onların fəaliyyəti mümkünsüz olacaq.

Rəşad BAXŞƏLİYEV,

Azərbaycan.-2023.- 13 iyul.- S.1;8.