Hayastan ordusunda qalmaqallar səngimir

Hərbi qulluqçular rüşvət qarşılığında müxtəlif vəzifələrə təyin edilirlər

Hayastanda həmişəki kimi silahlı qüvvələrdə yenə də böyük problemlər yaşanır.

Əsasən də, İrəvan parlamentində 44 günlük müharibənin nəticələrini araşdırmaq üçün yaradılan istintaq komissiyasından sonra yüksəkrütbəli hərbçilər onlar barədə cinayət işinin açılacağından narahatdırlar. Başqa sözlə, erməni generallar hakimiyyətə o qədər də etibar etmirlər. Məğlub ordunun yüksəkrütbəli zabitləri yaxın zamanlarda vəziyyətin dəyişəcəyindən və məsuliyyətə cəlb olunacaqlarından qorxurlar.

Elə bu günlərdə 44 günlük müharibə ilə bağlı yaradılan istintaq komissiyasına ifadəsindən sonra baş nazir Nikol Paşinyanın ünvanına erməni siyasi dairələri tərəfindən müxtəlif tənqidlər səslənməyə başlandı. Xüsusilə, baş qərargahı hədəfə alan Paşinyan müharibə dövründə ona yalan məlumat verildiyini dedi.

Keçmiş baş qərargah rəisi Onik Qasparyan dərhal ittihamlara cavab verərək Paşinyanın yalan danışdığını söylədi və müxtəlif arqumentlərlə özünə haqq qazandırmağa çalışdı. Bundan sonra baş qərargahın keçmiş rəis müavini Tiran Xaçaturyan da məsələyə münasibət bildirdi və hökumətin orduya biganə münasibətindən danışdı. Hökuməti sərt tənqid edən Xaçaturyan Paşinyanı orduya pul ayırmamaqda ittiham etdi. Onun ittihamlarına baş nazir aparatının informasiya və ictimaiyyətlə əlaqələr şöbəsi gec də olsa cavab verdi. Qeyd olundu ki, Xaçaturyanın söylədiklərinin arxasında siyasi motivlər gizlənir. Ordunun ehtiyaclarını ödəmək və prioritet nailiyyətləri reallaşdırmaq üçün pul ayırmadığı barədə yalan bəyanatların reallıqla heç bir əlaqəsi yoxdur. Bir neçə epizodda sonuncunun iddiaları onun baş qərargahın sabiq rəisi Onik Qasparyanın ictimai açıqlamaları ilə ziddiyyət təşkil edir. Tiran Xaçaturyan qondarma və əsassız iddialarla belə təəssürat yaratmağa çalışır ki, guya hökumətdən kifayət qədər vəsait ayrılmadığından silahlı qüvvələrin normal inkişafı əngəllənib.

Xatırladaq ki, istintaq komissiyasına parlamentin Müdafiə və Təhlükəsizlik Daimi Komissiyasının üzvləri daxildir. Komissiya 11 deputatdan ibarətdir, lakin deputatlardan biri müvafiq məxfilik rejiminə icazə almadığı üçün hazırda 10 üzvün tam səlahiyyəti var.

Bütün bunların fonunda orduda hərbi qulluqçuların müxtəlif vəzifələrə təyin edilməsi üçün böyük miqdarda rüşvət vermələri ilə bağlı çoxlu sayda qalmaqal yaşanır. Sosial şəbəkələrdə paylaşılan məlumatlar onu göstərir ki, Hayastan ordusunda rüşvətxorluq baş alıb gedir və Müdafiə Nazirliyi bunun qarşısını heç cür ala bilmir. Bildirilir ki, Hayastan silahlı qüvvələrinin hərbi hissələrində zabitlərdən yuxarı vəzifəyə təyin olunmaq, tabor komandiri olmaq üçün 7000, bölük komandir vəzifəsinə təyin olunmaq üçün 2500-4000, müqaviləli hərbi xidmət üçün isə 1000-2000 ABŞ dolları məbləğində rüşvət tələb edildiyi bildirilir. Sosial şəbəkələrdə yazılan məlumatlarda o da iddia edilir ki, yerindən asılı olaraq qiymətlər dəyişilə bilər. Yəni "yaxşı" yerə təyinat almaq üçün yüksək məbləğdə rüşvət tələb olunur. Maraqlı odur ki, Hayastan Müdafiə Nazirliyi həm rüşvətxorluq hallarına, həm də bununla bağlı yayılan məlumatlara heç bir reaksiya vermir.

Beləliklə, proseslər Hayastanda daxili siyasi vəziyyətin daha da gərginləşdiyini və İrəvanın sürətlə məhvinə doğru yaxınlaşdığını növbəti dəfə təsdiqləyir.

Elçin CƏFƏROV,

Azərbaycan.-2023.- 13 iyul.- S.12.