Hayastan həm də ekologiya terrorçusudur

Hayastan bu dəfə Azərbaycanın Naxçıvan Muxtar Respublikası ilə sərhədində ekoloji terror törətməyə hazırlaşır. Belə ki, Sədərək rayonu ilə sərhədyanı bölgədə, Arazdəyəndə inşa olunan iri metallurgiya zavodunun zəhərli maddələri Araz çayına töküləcək. Bu, Naxçıvanın flora və faunasına da mənfi təsir göstərəcək.

Mövzu ilə bağlı Milli Məclisin deputatlarının fikirlərini öyrəndik.

Zavodun Naxçıvanla sərhəddə inşası məqsədlidir

Milli Məclisin deputatı Ceyhun Məmmədov qeyd edib ki, Hayastan Azərbaycana qarşı müxtəlif formalı təxribatlarını və ekoloji cinayətlərini davam etdirir: "Ermənilər Azərbaycanla sərhəddə iri metallurgiya zavodu inşa etməyə hazırlaşırlar. Zavodun başqa ərazidə yox, məhz Naxçıvanla sərhəddə inşa edilməsinin planlaşdırılması məqsədlidir. Hayastan çalışır ki, Azərbaycana bacardığı qədər çox ziyan vursun. Nəzərə almaq lazımdır ki, ərazidə belə bir zavodun tikilməsi ekoloji tarazlığı pozacaq. Zavodun yerləşəcəyi Arazdəyən kəndi Araz çayının yaxınlığında olduğuna görə tullantılar da həmin çaya axıdılacaq. Bu, sözsüz ki, orada yaşayan sakinlərin sağlamlıqlarını təhlükə altına ala bilər".

Deputat Prezident İlham Əliyevin Qoşulmama Hərəkatının Əlaqələndirmə Bürosunun nazirlər görüşündəki çıxışına diqqət çəkib. Qeyd edib ki, dövlət başçısı həmin iclasda bu mövzu ilə bağlı mövqeyini bir daha nümayiş etdirdi: "Prezident bildirdi ki, ermənilərin növbəti ekoloji terroru beynəlxalq hüquqa və konvensiyalara ziddir və ölkələrin mənfi transsərhəd təsirlərdən qaçmaq üçün bir-biriləri ilə məsləhətləşmələr aparması olduqca vacibdir. Hayastan bunu mütləq nəzərə almalıdır. Həmçinin beynəlxalq ictimaiyyət və xarici dövlətlər də məsələyə sərt reaksiya verməlidirlər. Əks halda Hayastan xarici güclərə güvənərək özünə bəraət qazandırmağa davam edəcək. Bir sözlə, Azərbaycana qarşı ekosid siyasətinə birdəfəlik son qoyulmalıdır".

Ceyhun Məmmədov vurğulayıb ki, Transsərhəd kontekstdə Ətraf Mühitə Təsirin Qiymətləndirilməsi Konvensiyasının şərtlərinə görə, Azərbaycan və Ermənistan həmin konvensiyanın tərəfləri olduğu üçün hazırlanan qiymətləndirmə sənədinə yalnız Hayastanın deyil, eyni zamanda Azərbaycanın müvafiq qurumları da baxmalıdırlar. Həmçinin bölgəyə yaxın yaşayan azərbaycanlılarla da ictimai dinləmələr keçirilməlidir. Nəzərə almaq lazımdır ki, zavodun inşası geniş zolaqda ətraf mühitin, ekosistemin pozulmasına, havanın zəhərli tullantılarla çirklənməsinə səbəb ola bilər.

Bu qanunsuz fəaliyyət regionun ekoloji mühitini təhlükə altına alır

Milli Məclisin deputatı Arzu Nağıyev bildirib ki, Hayastanın Naxçıvanla həmsərhəd ərazidə metallurgiya zavodu inşa etməsi onu göstərir ki, bu ölkə beynəlxalq səviyyədə Birləşmiş Millətlər Təşkilatının Transsərhəd kontekstdə Ətraf Mühitə Təsirin Qiymətləndirilməsi Konvensiyasının müddəalarını ciddi şəkildə pozur. Belə bir zavodun tikilməsi təkcə Azərbaycana deyil, bütün regiona ciddi ekoloji təhlükə yaradacaq. Ona görə də bunun qarşısı mütləq şəkildə beynəlxalq səviyyədə alınmalıdır.

Hayastanın da sözügedən konvensiyanın üzvü olduğunu diqqətə çatdıran deputat deyib ki, bədnam qonşumuz beynəlxalq ekoloji hüquqazidd davranışlar sərgiləyir: "Dəfələrlə "Metsamor" Atom-Elektrik Stansiyası ərazisində yeni nüvə reaktoru tikintisi ilə bağlı da açıqlamalar verib. Bu isə təkcə Azərbaycan üçün deyil, bütün region üçün irimiqyaslı təbii fəlakətə gətirib çıxara bilər".

Arzu Nağıyev əlavə edib ki, Hayastan ictimaiyyətinin bu məsələyə səssiz qalacağını hesab etmir. Xatırlayırsınızsa, mis-molibden zavodu və Qafan Mis Emalı Kombinatının istehsalında da sularımız zəhərləndi, onların Oxçuçaya axıtdıqları tullantılar fəsadlar verdi. Bu, müəyyən ərazidə flora və faunanın dağılmasına gətirib çıxardı".

Deputat vurğulayıb ki, beynəlxalq ictimaiyyət Hayastana bu qanunsuz fəaliyyətini dayandırması üçün təzyiq göstərməlidir: "Ümumilikdə regionun ekoloji mühitini təhlükə mənbəyinə çevirə biləcək bu fəaliyyətə son qoyulmalıdır".

Nəzrin QARDAŞXANOVA,

Azərbaycan.-2023.- 14 iyul.- S.7.