Erməni vandalizmi: insanlığın və təbiətin düşməni

İşğal zamanı Qarabağın və Şərqi Zəngəzurun 60 min hektar meşə fondu məhv edilib

Xəbər verildiyi kimi, iyulun 11-də Prezident İlham Əliyevin sədrliyi ilə 2023-cü ilin 6 ayının sosial-iqtisadi yekunlarına həsr olunmuş müşavirə keçirilib. Tədbirdə dövlət başçısı iqtisadi və sosial məsələlərlə yanaşı, mövcud ekoloji vəziyyət barədə də geniş şəkildə fikrini bildirmişdir.

Tarixdən məlumdur ki, erməni vəhşiliyinin hədd-hüdudu yoxdur. Onlar fürsət ələ keçən kimi qadın, uşaq, qoca, xəstə demədən bütün dinc əhalini qətlə yetirirlər. Biz bunun Birinci Qarabağ müharibəsi zamanı da şahidi olduq. Onlar çirkin məqsədlərinə çatmaq üçün Xocalıda və digər yaşayış məntəqələrində minlərlə dinc vətəndaşımızı yaşına baxmadan güllədən keçirmişlər. Amma 44 günlük Vətən müharibəsində torpaqlarımız işğaldan azad olunarkən ermənilərin təbiət düşməni olduğunu da gördük.

Prezident İlham Əliyev adıçəkilən müşavirədə düşmən tərəfindən törədilən ekogenosid barədə demişdir: "Bir məsələyə də mən toxunmaq istərdim. Bu da ekoloji tarazlıqla bağlı olan məsələdir. Qarabağ və Şərqi Zəngəzur ekoloji fəlakət zonasına çox yaxın idi. Çünki Ermənistan həm Ermənistandakı müəssisələrin fəaliyyəti nəticəsində, eyni zamanda o vaxt işğal edilmiş torpaqlarda - Qarabağda və Şərqi Zəngəzurda təbii resurslarımızın vəhşicəsinə istismarı nəticəsində təbiətimizə böyük zərbə vurub. Təkcə onu demək kifayətdir ki, 60 min hektardan çox meşə fondu ermənilər tərəfindən dağıdılıb, talan edilib, çıxarılıb, satılıb, yaxud parket düzəldiblər və satıblar".

30 illik işğal dövründə ermənilər təbii sərvətlərimizi vəhşicəsinə istismar edərək ekologiyamıza böyük ziyan vurmuşlar. Buradakı mədənləri istismar edərkən heç bir ekoloji normaya əməl etməyərək torpağa və su hövzələrinə qənim kəsilmişlər. Onlar bu qanunsuz fəaliyyətlərinə xarici şirkətləri də ortaq etmişlər. Prezident İlham Əliyev dəfələrlə bəyan etmişdir ki, ermənilərin bu qanunsuz əməllərinə ortaq olub ölkəmizin təbii sərvətlərini talan edən və ətraf mühitə zərər vuran şirkətlər cəzasız qalmayacaq, məhkəmə qarşısında cavab verəcəklər.

Yeri gəlmişkən, qeyd edək ki, Ermənistanın ekologiyaya düşmən münasibəti hələ sovetlər dönəmindən məlumdur. Ermənistan SSR ərazisindəki Qacaran mis-molbid mədəni o illər respublikamızın ekologiyasına ciddi ziyan vurur, ortaq çaylar zərərli maddələrlə çirkləndirilirdi ki, bu da hətta əhalinin səhhətinə mənfi təsir edirdi.

İndi də Ermənistan düz sərhədimizin 500 metrliyində metallurgiya zavodu tikdirir. Bununla bağlı beynəlxalq qaydalar mövcuddur. Həmin qaydalara görə, daha dəqiqi, Espo Konvensiyasına əsasən, transsərhəd zolanarda ekologiyaya mənfi təsir göstərə biləcək müəssisələr tikilərkən qonşu ölkələrə məlumat verilməli və müəyyən məsələlərdə razılığa gəlinməlidir. Lakin nə xeyri?! Ermənistan həmişə olduğu kimi, bu dəfə də beynəlxalq qaydalara arxa çevirir.

Dövlət başçısı da müşavirədə sözügedən məsələyə toxunarkən bildirmişdir ki, Azərbaycan ictimaiyyəti, qeyri-hökumət təşkilatları bununla bağlı Ermənistanın rəsmi dövlət orqanlarına müraciət ünvanlayıblar. Ekologiya sahəsində fəaliyyət göstərən beynəlxalq ekspertlər və qeyri-hökumət təşkilatlarının nümayəndələri bu müraciətə qoşulublar. Prezident həmçinin vurğulamışdır ki, qeyri-hökumət təşkilatları ilə yanaşı, dövlət qurumları da hansı təşkilatlara müraciət etməli olduqlarını müəyyənləşdirməlidir. Məqsəd Ermənistanın bu təhlükəli əməlinə son qoymaqdır.

Biz Ermənistanın öz ərazisində hansısa müəssisə tikməsinə etiraz etmirik, təbii ki, həmin müəssisə sərhədimizin 500 metrliyində tikilməsəydi. Qeyd etdiyimiz Espo Konvensiyasının tələbləri bir yana, dəqiq bilirik ki, həmin müəssisədə təhlükəli maddələrdən istifadə ediləcək və onlar Araz və Oxçu çaylarına töküləcək. Bu iki çayın suyu Ermənistandan sonra axdığı yeganə ölkə Azərbaycandır. Buna görə də etirazımız ədalətlidir və Ermənistan bununla razılaşmalıdır.

Bu yerdə bildirək ki, Prezident İlham Əliyevin ekoloji sahədə apardığı siyasət dünyada təqdir olunur. Dövlətimizin başçısının təşəbbüsü ilə neft-qazla zəngin olan ölkəmizin "yaşıl enerji" zonasına çevrilməsinin qarşıya məqsəd qoyulması sıradan fakt deyil. Hətta bu istiqamətdə nəhəng layihələrin icrası üçün müqavilələr imzalanıb. Məqsəd "yaşıl enerji" ilə ölkənin daxili tələbatını ödəməklə yanaşı, onun ixracına da nail olmaqdır.

Dövlət başçısı müşavirədə həmçinin ölkəmiz üçün qəbulolunmaz bir hadisəyə kəskin tənqidi münasibətini bildirmişdir. Bu, xeyli vaxtdır cəmiyyətdə müzakirə olunan Gədəbəy rayonunda baş verən məlum hadisədir. Həmin məsələyə münasibət bildirən dövlət başçısı qeyd etmişdir: "Ekologiya və Təbii Sərvətlər Nazirliyi ən azı səhlənkarlığa yol verib, nəzarətsizlik nümayiş etdirib, passiv müşahidəçi kimi çıxış edib və bunun nəticəsində xarici investor bizim təbiətimizi zəhərləyib. İnsanlar haqlı olaraq öz etiraz səsini ucaldıblar, amma onların səsinə baxan olub? Yox! Bir gün, iki gün, üç gün, beş gün, hara baxırdı Ekologiya və Təbii Sərvətlər Nazirliyi? Bilmirdimi ki, belə problem var? Ya bilirdi gözünü yumurdu, ya da bilmirdi. Hər ikisi qəbul edilən deyil".

Dövlət başçısı hadisə ilə bağlı dövlət qurumlarına iradını bildirməklə yanaşı, bəzi vətəndaşların qanunazidd hərəkətlərinə də obyektiv qiymət vermiş, hadisədən sui-istifadə edib ölkədə xaos, dövlət orqanları ilə qarşıdurma yaratmaq istəyənlərə sərt xəbərdarlıq etmişdir. Sözsüz ki, dövlət başçısının bu ədalətli mövqeyi Gədəbəy rayon sakinləri, eləcə də Azərbaycan ictimaiyyəti tərəfindən rəğbətlə qarşılanıb.

Rüstəm KAMAL,

Azərbaycan.-2023.- 14 iyul.- S.7.