Azərbaycan beynəlxalq hüquq müstəvisində də Ermənistanı küncə sıxışdırır

"Miatsum kitabı bağlandı, separatizmin kitabı bağlandı. Müstəqillik xülyası statusun dalınca getdi. Statusu isə biz hələ İkinci Qarabağ müharibəsi zamanı göndərmişik lazım olan yerə".

Qalib Lider İlham Əliyevin qətiyyətlə bəyan etdiyi kimi, aprelin 23-də Azərbaycanın Laçın yolunda sərhəd nəzarət-buraxılış məntəqəsi yaratmaqla suveren ərazilərinə nəzarəti bərpa etməsi, həm də elə Ermənistanın onilliklərdir həyata keçirmək istədiyi "Miatsum" layihəsini iflasa uğratdı.

İyulun 6-da Beynəlxalq Ədalət Məhkəməsinin Ermənistanın Laçında Azərbaycana məxsus sərhəd nəzarət-buraxılış məntəqəsinin aradan qaldırılması ilə bağlı tələbini yekdilliklə rədd etməsi isə ölkəmizin separatizm üzərində qəti qələbəsinin beynəlxalq hüquqla təsdiqlənməsi oldu.

Həmin ərazidə nəzarət-buraxılış məntəqəsi yaratmağı Azərbaycanın suveren hüququ kimi təsdiq edən BƏM, Ermənistanın ölkəmizə qarşı qaldırdığı növbəti əsassız iddianı rədd etdi.

Hay saxtakarlığının iflası

44 günlük müharibədə döyüş meydanında Ermənistanı məğlub edərək onu kapitulyasiya aktını imzalamağa məcbur edən Azərbaycan zəfərdən ötən iki il yarım müddət ərzində öz qələbəsini hüquqi baxımdan da möhkəmləndirdi. Ermənistanı beynəlxalq hüquq müstəvisində məğlub edən Azərbaycan təcavüzkar ölkənin dünyanı aldatmağa yönəlik yalan iddialarının üzərindən davamlı olaraq xətt çəkir.

Ermənistanın soydaşlarımızın insan hüquqlarını məqsədyönlü şəkildə pozmasına cavab olaraq, "İrqi ayrı-seçkiliyin bütün formalarının ləğv edilməsi haqqında" Beynəlxalq Konvensiya (CERD) çərçivəsində təcili tədbirlər görülməsi məqsədilə ölkəmizin Beynəlxalq Ədalət Məhkəməsinə müraciət etməsi də bu baxımdan mühüm əhəmiyyətə malikdir.

Xatırladaq ki, bu il fevralın 22-də BƏM-in "İrqi ayrı-seçkiliyin bütün formalarının ləğv edilməsi haqqında" Beynəlxalq Konvensiyanın tətbiqi ilə bağlı məhkəmə işləri üzrə müvəqqəti tədbirlərə dair qərarı da Ermənistanın soydaşlarımızın hüquqlarını qəsdən pozmasının beynəlxalq hüquq çərçivəsində daha bir təsdiqi oldu.

Həmin zaman Ermənistan əsas 3 məsələyə baxılması üçün Beynəlxalq Ədalət Məhkəməsinə müraciət etmişdi ki, bunlardan biri də ötən ilin 12 dekabrında Laçın yolunda azərbaycanlı ekofəalların keçirdiyi dinc aksiya ilə bağlı idi. Ermənistan məhkəməyə müraciətində aksiyanın süni şəkildə təşkil olunmasının təsdiqini istəyirdi. Lakin Azərbaycan tərəfi həmin aksiyaların həqiqətən ekofəallar tərəfindən keçirildiyi barədə sübutları məhkəməyə təqdim etmiş, məhkəmə isə fevralın 22-də açıqlanan qərarında Ermənistanın iddiasını rədd etmişdi.

Həmin tarixdəki məhkəmə prosesi zamanı işğaldan azad olunmuş ərazilərimizdə Ermənistanda 2021-ci ildə istehsal edilmiş minaların aşkarlanması haqda Azərbaycan tərəfdən ortaya qoyulan faktların heç birini Ermənistan təkzib edə bilməmişdi.

İyulun 6-da isə Beynəlxalq Ədalət Məhkəməsi Ermənistanın 12 may 2023-cü ildə məhkəməyə təqdim etdiyi və 23 aprel 2023-cü ildə Laçın yolunun başlanğıcında sərhəd nəzarət-buraxılış məntəqəsinin quraşdırılmasının "qanunsuz" olduğuna dair vəsatətini də yekdilliklə rədd etdi.

Beləliklə, bu dəfə də Azərbaycan tərəfinin BƏM-ə təqdim etdiyi çoxsaylı sübutlarla Ermənistanın yalanları iflasa uğradıldı.

Azərbaycanın beynəlxalq hüquq sahəsində Ermənistanı uğratdığı ardıcıl məğlubiyyətlər, eləcə də 6 iyulda BƏM məhkəməsində əldə etdiyi qələbə siyasi nəticələr baxımından xüsusi əhəmiyyət kəsb edir.

Ermənilər dünyanı aldatmağa çalışırlar

Azərbaycanın suveren ərazilərini üç onillik boyu işğal altında saxlayan Ermənistan Qarabağ və Şərqi Zəngəzurda bütün yaşayış yerlərini talayıb dağıtmış, xalqımıza məxsus tarixi, dini, mədəni irsi məhv etmiş, ekoloji terror törətmişdir.

Birinci Qarabağ müharibəsindən etibarən erməni silahlı qüvvələri tərəfindən azərbaycanlı hərbçilərə, eləcə də mülki şəxslərə qarşı qırğınlar törədilib, 1992-ci ildə Xocalıda soyqırımı həyata keçirilib. Bu günədək Ermənistan Birinci Qarabağ müharibəsi nəticəsində itkin düşmüş 4000-ə yaxın azərbaycanlının taleyi barədə heç bir məlumat verməyib. Ermənistanın Qarabağ və Şərqi Zəngəzurda basdırdığı minaların düzgün xəritəsini ölkəmizə təqdim etməməsi insanlarımızın həyatını təhlükə altında saxlayır.

Vətən müharibəsindən sonra Azərbaycanın təkmil sülh modelindən yayınmağa çalışan, xarici havadarlarına güvənərək vaxtı uzatmaqla ölkəmizə qarşı xəbis planlar düşünən Ermənistan 30 il ərzində etdiyi kimi indi də "quzu" cildinə girib dünyanı aldatmaq istəyir. Azərbaycanın beynəlxalq hüquqa dayanaraq milli maraqlarını təmin etməsini dünya ictimaiyyətinə yanlış formada göstərməyə çalışır.

Ermənistanın hay-şüvən qopardığı, nəticəsi ilə barışmaq istəmədiyi növbəti məsələ isə Laçın yolunda ölkəmizin yaratdığı sərhəd nəzarət-buraxılış məntəqəsidir. Bunu Laçın yolunun "bağlanması", Qarabağda yaşayan erməni sakinlərin "blokadası" kimi beynəlxalq ictimaiyyətə təqdim edən və hələ də Azərbaycana qarşı ərazi iddiasından əl çəkməyən Ermənistan özü də yaxşı başa düşür ki, artıq bu yerlərdə bir daha separatizm at oynada bilməyəcək.

Özünü Qarabağda yaşayan ermənilərin "təəssübkeşi" kimi göstərən Ermənistanı əgər onların halı maraqlandırsaydı, ötən 30 il ərzində bu ərazilərdəki insanlar səfalət içində yaşamazdılar...

Ermənistanın Laçın yolu ətrafında manipulyasiya etməsinin sadəcə bir məqsədi var: bu yol vasitəsilə separatizmə dəstək vermək, 1988-ci ildən etibarən arxasınca düşdükləri sərsəm və özlərinin sonu olacaq "Miatsum" ideyasını yaşatmaq...

Haqq da, hüquq da Azərbaycanın tərəfindədir

Azərbaycan aprelin 23-də üçrəngli, ay-ulduzlu bayrağını öz sərhəddində yüksəldib dalğalandırmaqla Ermənistanın Laçın yolu vasitəsilə separatizmə uzatdığı əlini qırmış oldu.

Beynəlxalq Ədalət Məhkəməsinin iyulun 6-dakı qərarı göstərdi ki, məhkəmə Azərbaycanın Ermənistanla şərti dövlət sərhədlərində nəzarət-buraxılış məntəqəsini qurmaqla bağlı beynəlxalq hüquq əsasında suveren hüquqa malik olduğunu rəsmi tanıyır.

Göründüyü kimi, haqq da hüquq da Azərbaycanın tərəfindədir və ölkəmizin beynəlxalq hüququn norma və prinsipləri çərçivəsində həyata keçirdiyi milli maraqlarını Beynəlxalq Ədalət Məhkəməsi də qəbul edir.

Ədalətin təntənəsi olan məhkəmənin bu qərarları, beynəlxalq hüquqi gücə malik sənədlər kimi Azərbaycanın qarşıda da öz milli maraqlarını qətiyyətlə təmin etməsində mühüm rol oynayacaq.

Yasəmən MUSAYEVA,

Azərbaycan.-2023.- 15 iyul.- S.5.