Şuşa şəhərinin Türk dünyasının mədəniyyət paytaxtı seçilməsi ilə bağlı fotosərgilər keçirilir

Azərbaycanın mədəniyyət mərkəzi, Qarabağın baş tacı olan Şuşa şəhərinin 2023-cü il üçün "Türk dünyasının mədəniyyət paytaxtı" seçilməsi ilə bağlı növbəti tədbir keçirilib. Belə ki, iyulun 8-də bununla əlaqədar Gürcüstanın Bolnisi rayonunda "Qafqaz" Hüquq və İnteqrasiya Mərkəzinin dəstəyi ilə fotosərgi açılıb.

Sərgi Azərbaycan Respublikasının Gənclər Fondunun dəstəyi ilə "Uşaq və Yeniyetmələrə Dəstək" (UYD) İctimai Birliyi tərəfindən icra edilən Azərbaycanın mədəniyyət paytaxtı Şuşa fotolarda adlı beynəlxalq fotoqrafiya layihəsi çərçivəsində reallaşıb.

Məlumata görə, elə həmin gün eyniadlı sərgi Gürcüstanın Marneuli rayonunda da açılıb. Sərgi Marneulidəki "Azərbaycan Evi" və Gürcüstan Azərbaycanlılarının İnteqrasiya Mərkəzinin təşkilati dəstəyi ilə təşkil olunub. Sərgi iştirakçılarına layihə çərçivəsində hazırlanmış açıqcalar paylanılıb.

Tbilisidəki M.F.Axundzadə adına Azərbaycan Mədəniyyəti Muzeyində isə iyulun 9-da Şuşa şəhərinin 2023-cü il üçün "Türk dünyasının mədəniyyət paytaxtı" seçilməsi ilə əlaqədar fotosərgi açılıb.

Sərgilənən fotolarda füsunkar Şuşa şəhəri, Şuşanın mədəni irsi, musiqiçiləri barədə məlumatlar əks olunub.

Gənclər Fondunun "Şuşa ili" ilə bağlı elan etdiyi qrant müsabiqəsinin qalibi olan bu layihə Şuşanın tarixi, mədəni irsi, erməni vandalizmi, gənclərin qayıdışa motivasiya olunması və Şuşada aparılan bərpa-quruculuq işləri ilə bağlı məlumatlılığın fotolar vasitəsilə artırılaraq həyata keçirilməsi ideyasına xidmət edir.

Tədbirlərin keçirilməsində məqsəd Azərbaycan, Gürcüstan və Türkiyədən olan gənc fotomüxbirlər vasitəsilə Şuşanın tarixinin və mədəni irsinin yerli, türk və gürcü gəncləri arasında təbliğ olunmasıdır.

Sözügedən layihə çərçivəsində Bakı, Tbilisi, Marneuli, Bolnisi, İstanbul, Eskişehir və Antalya şəhərlərində Şuşanı əks etdirən fotolardan ibarət 9 sərginin açılması nəzərdə tutulub.

Zöhrə FƏRƏCOVA,

Azərbaycan.-2023.- 16 iyul.- S.7.