Bakıda ICCIA-nın 35-ci iclası çərçivəsində tərəflər arasında dörd memorandum imzalanıb

İyulun 17-də Bakıda İslam Ticarət Sənaye və Kənd Təsərrüfatı Palatasının Direktorlar Şurasının (ICCIA) 35-ci iclası keçirilib.

AZƏRTAC xəbər verir ki, tədbirdə çıxış edən Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının prezidenti Məmməd Musayev qonaqları salamlayaraq, İslam Ticarət Sənaye və Kənd Təsərrüfatı Palatasının Direktorlar Şurasının 35-ci iclasının keçirilməsi üçün ölkəmizin seçilməsinə görə təşəkkürünü bildirib.

M.Musayev bildirib ki bu gün Azərbaycan böyük beynəlxalq tədbirlərə ev sahibliyi edir və ölkəmizin inkişafı, regionda və dünyada söz sahibinə çevrilməsi Prezident İlham Əliyevin apardığı ardıcıl siyasətin nəticəsidir. Azərbaycan Böyük Qarabağ Zəfəri ilə tarixi ədaləti bərpa etdi. Azərbaycanın yaratdığı yeni reallıqlar şəraitində iqtisadi inkişaf modelimizin də yeni reallıqlara uyğun olaraq təkmilləşdirilməsi və daha səmərəli şəkildə tənzimlənməsi məqsədilə 2030-cu ilədək müəyyən olunmuş sosial-iqtisadi inkişafa dair Milli Prioritetlər qəbul olunub. Eyni zamanda, “2022-2026-cı illərdə sosial-iqtisadi inkişaf Strategiyası” çərçivəsində işğaldan azad edilmiş ərazilərə “Böyük Qayıdış” Dövlət Proqramının icrasına başlanılıb.

M.Musayev vurğulayıb ki, Azərbaycanın işğaldan azad edilmiş ərazilərində 80-ə yaxın investisiya layihəsinin icrasına başlanılıb. Bunlar əsasən sənaye, kənd təsərrüfatı, ticarət və xidmət sektorlarını əhatə edir.

"Azərbaycan Sahibkarlar Konfederasiyası, üzv olduğu İslam Ticarət, Sənaye və Kənd Təsərrüfatı Palatası ölkələrinin investorlarını da Qarabağda əməkdaşlığa dəvət edir", - deyə M.Musayev bildirib.

Azərbaycanda qida təhlükəsizliyi sahəsi barədə məlumat verən Qida Təhlükəsizliyi Agentliyinin sədri Qoşqar Təhməzli bildirib ki, Avropa İttifaqına yun, dəri, eləcə də balıq kürüləri ixracına icazələr əldə edilib.

Azərbaycanda həyata keçirilən iqtisadi layihələr barədə məlumat verən İqtisadiyyat nazirinin müavini Sahib Məmmədov bildirib ki, müsəlman ölkələrin potensialını nəzərə alaraq, İslam Ticarət, Sənaye və Kənd Təsərrüfatı Palatasına (ICCIA) üzv olan ölkələrlə əməkdaşlığın daha da genişləndirilməsinə ehtiyac var.

Kiçik Orta Biznesin İnkişafı Agentliyinin sədri Orxan Məmmədov bildirib ki, bugünədək KOBİA-ya 1493 şirkətdən Azərbaycanın işğaldan azad edilmiş ərazilərinə investisiya yatırmaq üçün müraciət daxil olub. Bunlardan 490-ı 37 ölkədən olan xarici investorlardır: “Qarabağda biznes fəaliyyəti ilə məşğul olmaq üçün İslam Ticarət, Sənaye və Kənd Təsərrüfatı Palatasına üzv dövlətlərin müraciətlərini əlaqələndirməyə hazırıq. Biz Qarabağda 3 əsas istiqamət üzrə fəaliyyətimizi qurmuşuq. Birincisi yerli və xarici investorları investisiya imkanları barədə məlumatlandırmaq, ikincisi yeni bizneslərin yaradılması üçün müraciətlərin qəbulu, üçüncüsü isə biznes infrastrukturlarının yaradılmasına dəstək göstərməkdir.

Kənd təsərrüfatı nazirinin müavini Sarvan Cəfərov bildirib ki, Azərbaycan fəal biznes siyasəti ilə qlobal bazarda mövqeyini möhkəmləndirir. Nazir müavini qeyd edib ki, Azərbaycanda istehsal olunan məhsullar öz keyfiyyətinə görə rəqabətədavamlıdır və ölkəmiz qlobal bazarlarla ticarət əməkdaşlığını genişləndirmək istəyir: “Biz ölkələrlə ticarətin asanlaşdırılması üçün hüquqi bazanın formalaşdırılmasına üstünlük veririk”.

AZPROMO rəhbəri Yusif Abdullayev ölkəmizin investisiya mühitinin xarici sərmayədarlar üçün yaratdığı imkanlar haqqında məlumat verib.

ICCIA-nın prezidenti Abdullah Saleh Kamel bildirib ki, İslam ölkələrinin Azərbaycanda investisiya layihələri həyata keçirmək potensialı və istəyi böyükdür. Azərbaycanda mövcud imkanlar, əlverişli iqtisadi mühit investisiya layihələrinin həyata keçirilməsinə imkan verir: “Nəhayət ki, Azərbaycan illər sonra torpaqlarını işğaldan azad etdi. Həmin ərazilərdə də investisiya potensialını görürük və gələcəkdə bu imkanların dəyərləndirilməsi mümkündür”.

ICCIA-nın 35-ci iclası çərçivəsində tərəflər arasında dörd memorandum imzalanıb:

1. İslam Palatasının Halal Xidməti (ICHS) və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK) arasında memorandum;

2. Mavritaniya Ticarət Palatası (CCIAM) və İslam Ticarət, Sənaye və Kənd Təsərrüfatı Palatası (ICCIA) arasında memorandum;

3. KOBİA və İslam Ticarət, Sənaye və Kənd Təsərrüfatı Palatası (ICCIA) arasında memorandum;

4. ICCIA, KOBİA, Beynəlxalq İslam Biznesi Assosiasiyası, Dövlət Turizm Agentliyi və “Caspian Event Organisers” MMC arasında memorandum.

Qeyd edək ki, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının və İslam Ticarət, Sənaye və Kənd Təsərrüfatı Palatasının birgə təşkilatçılığı ilə keçirilən tədbirlərdə Palataya üzv 20 dövlətdən 100-dək nümayəndə heyəti təmsil olunur.

Sonda tədbirin yüksək səviyyədə təşkil olunduğunu qeyd edən ICCIA-nın prezidenti Abdullah Saleh Kamel ASK-nın sədri Məmməd Musayevə mükafat təqdim edib.

Qeyd edək ki, İslam Ticarət, Sənaye və Kənd Təsərrüfatı Palatasının üzv ölkələrinin ərazisi 31.8 milyon kvadrat kilometrdən çoxdur. Dünyanın quru sahəsinin 6.2 faizi bu dövlətlərin payına düşür. Üzv ölkələrin əhalisi 1 milyard 900 milyon nəfərdən çoxdur, bu isə dünya əhalisinin 23.8 faizi deməkdir.

İslam Ticarət, Sənaye və Kənd Təsərrüfatı Palatasına üzv ölkələrin ümumi daxili məhsulunun həcmi 9 trilyon dollardan çoxdur. Bu isə qlobal ümumi daxili məhsulun 9 faizini təşkil edir. Azərbaycanın xarici ticarət dövriyyəsinin 18 faizi və ya 9.3 milyard ABŞ dolları İslam Ticarət, Sənaye və Kənd Təsərrüfatı Palatasının üzv ölkələrinin payına düşür.

Azərbaycan.-2023.- 18 iyul.- S.7.