Dəmir yumruğun yaratdığı reallıq

Azərbaycan həqiqətləri dünyaya I Şuşa Qlobal Media Forumundan çatdırıldı

Prezident İlham Əliyevin tapşırığına əsasən, "Heydər Əliyev İli" çərçivəsində Azərbaycan milli mətbuatının 148-ci ildönümü ilə bağlı keçirilən I Şuşa Qlobal Media Forumu başa çatıb.

Forum çərçivəsində dövlət başçımız tərəfindən Azərbaycan xalqına və dünya ictimaiyyətinə bir sıra vacib mesajlar ötürülüb. Həmçinin media və informasiya-kommunikasiya sahəsində qlobal səviyyədə aktuallıq kəsb edən məsələlər müzakirə edilib. Bu forum Azərbaycan həqiqətlərinin dünya ictimaiyyətinə çatdırılması baxımından mühüm hadisədir.

Mövzu ilə bağlı Milli Məclisin deputatlarının fikirlərini öyrəndik.

Şuşa forumu dünya mediasının inkişafına əhəmiyyətli töhfə verəcək

Milli Məclisin deputatı Səttar Möhbalıyev deyib ki, Azərbaycan mədəniyyətinin paytaxtı Şuşa şəhəri növbəti dəfə mötəbər beynəlxalq tədbirə - "4-cü Sənaye İnqilabı dövründə yeni media" mövzusunda I Şuşa Qlobal Media Forumuna evsahibliyi etdi və öz əzəmətini, kimliyini, mənliyini bir daha dünyaya göstərdi. Fəxarətlə deyə bilərik ki, Şuşa artıq dünyada həm də beynəlxalq tədbirlərin keçirildiyi, qlobal xarakterli müzakirələrin aparıldığı məkan kimi tanınır. Foruma 49 ölkədən 150 xarici qonağın, o cümlədən dünyanın 34 ölkəsinin dövlət informasiya agentliyinin, 12 beynəlxalq təşkilat və media qurumunun qatılması tədbirin əhəmiyyətinin və ona olan marağın təzahürüdür.

Deputat qeyd edib ki, bu, həm də Azərbaycan həqiqətlərinin, reallıqlarının beynəlxalq ictimaiyyətə çatdırılması baxımından xeyli önəmli hadisədir: "Nəzərə almaq lazımdır ki, işğaldan azad edilmiş Şərqi Zəngəzura və Qarabağa gələn xarici media nümayəndələri uzun illər ermənilərin orada törətdikləri bütün vəhşilikləri, dağıdılmış şəhərləri, kəndləri öz gözləri ilə görür, real vəziyyəti dəqiq və dürüst şəkildə dünyaya çatırırlar. Bu da, sözsüz ki, ermənilərin və onun havadarlarının bütün yalanlarını, bölgə ilə bağlı dezinformasiyalarını alt-üst edir".

Səttar Möhbalıyevin sözlərinə görə, dövlət başçısı İlham Əliyevin forumun açılış mərasimində iştirak etməsi, yerli və xarici jurnalistlərin suallarını cavablandırması bir daha göstərdi ki, ölkəmizin rəhbəri hər zaman mətbuata açıqdır, bu sahənin inkişafına hərtərəfli dəstək olur: "Əbəs yerə deyil ki, Azərbaycan mətbuatı hərtərəfli inkişaf edib, ölkəmizdə 5 mindən çox media subyekti fəaliyyət göstərir. KİV-lərə birdəfəlik yardımların verilməsi, mətbuat işçilərinin sosial müdafiəsinin gücləndirilməsi istiqamətində görülən işlər, həmçinin media mənsublarına fəxri adların verilməsi haqqında sərəncamlar mətbuat işçilərinə göstərilən qayğının bir hissəsidir. Eləcə də jurnalistlərin mənzillə təmin olunması, qəzet və jurnalların nəşriyyata olan borclarının silinməsi ölkəmizdə mətbuata olan dəstəyin bariz nümunəsidir".

Deputat vurğulayıb ki, forumda jurnalistlərin müxtəlif məzmunlu suallarına özünün dərin biliyi, geniş zəkası, dəmir məntiqi və tutarlı arqumentləri ilə cavab verən Prezident İlham Əliyev istər bölgədə, istər regionda, istərsə də dünyada baş verən prosesləri hərtərəfli şərh etdi, Azərbaycanın dünyada yerini və rolunu bir daha göstərdi. Sübut etdi ki, Azərbaycan dünya üçün son dərəcə vacib ölkə və etibarlı tərəfdaşdır, həmçinin sülh və sabitliyin tərəfdarıdır. Təbii ki, ölkəmiz bütün bu uğurlara Prezident İlham Əliyevin müdrik rəhbərliyi sayəsində imza atıb. Məhz onun rəhbərliyi ilə yenilməz ordumuz 30 illik işğala son qoyaraq xalqımızı məğlubiyyət girdabından qurtardı, ərazi bütövlüyümüz və suverenliyimiz təmin olundu.

Müsahibimiz bildirib ki, Prezident İlham Əliyevin təşəbbüsü ilə reallaşan layihələrin önəmi bu gün daha aydın görünür. Ölkəmiz Avropanın üzləşdiyi enerji böhranında xilaskar rolunu oynayır: "Həmçinin Qoşulmama Hərəkatının sədri kimi cənab İlham Əliyevin gördüyü işlər, sərgilədiyi ədalətli mövqe beynəlxalq ictimaiyyətin gözündə onu böyük şəxsiyyətə çevirib. Odur ki, dövlətimizin başçısı istənilən mövzuda keçirilən regional və beynəlxalq təşkilatların tədbirlərinə dəvət olunur, rəy və təklifləri alınır, onun dünyanın gələcəyi ilə bağlı çıxışları və irəli sürdüyü təşəbbüsləri maraqla qarşılanır. Prezidentimizin I Şuşa Qlobal Media Forumunda iştirakı dünya mediasının da diqqət mərkəzindədir, çıxışının əsas məqamları ilə bağlı yazılar dərc olunur, qiymətli fikirləri təhlil edilir".

Səttar Möhbalıyev əlavə edib ki, I Şuşa Qlobal Media Forumunda rəqəmsal dövrdə jurnalistika və kommunikasiyada yeni alətlər, rəqəmsal transformasiya, müasir informasiya mühitində media menecmenti və dayanıqlı media biznes modellərinin yaradılması, yeni mediada istehlak tendensiyaları və media savadlılığı, dezinformasiya və feyknyusla mübarizə üsulları, jurnalistlərin təhlükəsizliyi və digər məsələlərlə bağlı aparılan müzakirələr, irəli sürülən təkliflər və gəlinən qənaət dünya mediasının inkişafına mühüm töhfələr verəcək.

Azərbaycan bütün siyasi arenalarda haqlı və güclü mövqe nümayiş etdirir

Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib ki, forum çərçivəsində media və informasiya-kommunikasiya sahəsində qlobal səviyyədə mühüm əhəmiyyətə malik məsələlər müzakirə olunub: "Bu günədək çoxsaylı beynəlxalq tədbirlərin keçirildiyi Şuşa şəhəri növbəti dəfə müstəqil Azərbaycanın tarixində ilk dəfə olaraq dünyanın aparıcı media, jurnalist təşkilatları rəhbərlərini, media, informasiya-kommunikasiya sahəsində nüfuzlu ekspertləri, tanınmış jurnalistləri bir araya topladı.

S.Fətəliyeva həmçinin Prezident İlham Əliyevin forumda dərinməzmunlu çıxışında toxunduğu məsələlər barədə danışaraq bildirib ki, dövlət başçısı bir çox məsələlər, o cümlədən regionda baş verən proseslər, Azərbaycanla Ermənistan arasında münasibətlərin normallaşdırılması barədə fikirlərini ifadə edib. Vurğulayıb ki, Cənubi Qafqazın inkişafı, əsasən, Azərbaycanla Ermənistan arasındakı münasibətlərin yaxşılaşmasından asılıdır. Hazırda bütün beynəlxalq təşkilatlar normallaşma prosesində problemin həllinin beynəlxalq hüquqa əsaslandığını anlayırlar. Əgər Ermənistan Azərbaycana qarşı hər hansı ərazi iddialarından imtina etsə, sülh sazişinin ilin sonuna qədər imzalanması mümkündür. Sülh olmasa, bu regionda sabitlik, təhlükəsizlik yaranmayacaq.

Deputat deyib ki, Şuşada keçirilən I Qlobal Media Forumunun Azərbaycan həqiqətlərinin və bölgədə baş verən proseslərin dünya ictimaiyyətinə çatdırılması baxımından mühüm əhəmiyyəti var.

Prezidentin səsləndirdiyi fikirlər sülhə xidmət edir

Milli Məclisin deputatı Ceyhun Məmmədov da "Heydər Əliyev İli" çərçivəsində Azərbaycan milli mətbuatının 148-ci ildönümü münasibətilə keçirilən forum barədə fikirlərini bölüşüb. Deputat Prezident İlham Əliyevin forumda Ermənistan və beynəlxalq ictimaiyyətə ötürdüyü mesajlara xüsusi diqqət çəkib. C.Məmmədov bildirib ki, Ermənistan, eləcə də Qarabağda yaşayan haylar və onların havadarları dövlət başçımızın ismarışlarından dərs çıxarmalıdırlar.

"Əvvəl də dəfələrlə deyildiyi kimi, ermənilər bizim əraziləri ya tərk etməli, ya da Azərbaycan cəmiyyətinə reinteqrasiya olunmalıdırlar. Bu barədə dəfələrlə ismarış verilib. Ermənilərin bundan başqa yolu yoxdur. Belə olan halda Azərbaycan Qarabağda yaşayan ermənilərin bütün hüquq və azadlıqlarını təmin etməyə hazırdır", - deyə deputat qeyd edib.

Müsahimiz bildirib ki, Ermənistan tərəfi təxribat törətməkdən çəkinməli, bu cür addımlara son verməlidir: "Məqsəd bölgədə sülhün bərqərar edilməsi olmalıdır. Əslində, bu mənada müəyyən qədər məsafə qət etmişik, amma hələ də görüləcək xeyli işlər var. Hesab edirəm ki, bu məqsədlərə mərhələli şəkildə nail olacağıq. Elə Prezident İlham Əliyevin də forumda səsləndirdiyi fikirlər sülhə xidmət edirdi. Azərbaycan bölgəyə sülhün gəlməsində maraqlıdır. Şükürlər olsun ki, bu istəyimizə yavaş-yavaş nail oluruq".

Deputatın sözlərinə görə, forumda ötürülən vacib mesajlardan biri də separatçılar yenidən baş qaldıracaqları halda, Azərbaycanın onlara qətiyyətli cavabı ilə bağlı olub: "Haylar təxribatlar törətməkdə davam edərlərsə, Azərbaycanın cavabı sərt və kəskin olacaq. Ona görə də Ermənistan bu məsələlərə yanaşmada diqqətli olmalıdır. Onlar bu tarixi şans və fürsətdən düzgün istifadə etməlidirlər".

Nəzrin QARDAŞXANOVA,

Azərbaycan.-2023.- 25 iyul.- S.13.