Hayastan terrorçuları qəhrəman kimi təqdim edir

Rəsmi İrəvan dövlət siyasəti səviyyəsində yürütdüyü rəzalətdən əl çəkmir

Bu günə kimi Hayastanda mövcud olan hakimiyyətlərin hamısı üçün terrorizm xüsusi rəğbət doğurub. Hətta iş o yerə çatıb ki, insanlığa qarşı saysız-hesabsız cinayətlər törətmiş erməni caniləri məğlub ölkədə "qəhrəman" kimi təqdim olunur, onların nifrətamiz xatirəsi əbədiləşdirilir, abidələri ucaldılır, anım mərasimləri keçirilir.

Beynəlxalq ictimaiyyətin təzyiqini və təpkisini görməyən erməni terrorizmi nəticə etibarilə XX əsr boyu daha da genişlənərək bütün dünya üçün qlobal təhlükəyə çevrilmişdir. Başda ASALA olmaqla, erməni terror təşkilatları Azərbaycan və Türkiyə ilə yanaşı, Avropa, Amerika, Rusiya, İran və Livanda müxtəlif terror aksiyaları həyata keçiriblər.

Avropa ölkələri və ABŞ vətəndaşlarına qarşı da qətliamlar törədən erməni terrorçuların Hayastanda "qəhrəman" səviyyəsinə yüksəldilməsi bu dövlətin terrorçu mahiyyətini açıq göstərir. Məsələn, erməni cəmiyyətində terrorçuların qəhrəmanlaşdırılması mərasimlərindən biri də "Lissabon 5"dir. Hər il 27 iyul tarixində bu mərasim Amerika Birləşmiş Ştatları, Fransa, Livan erməniləri tərəfindən də qeyd olunur. Adətən, belə tədbirlərdə erməni ruhaniləri "öz ləyaqətli ölümləri ilə erməni icmasını sarsıtmış azadlıq uğrunda canlarından keçən qəhrəmanların" şərəfinə rekviyemlər söyləyirlər.

Məlumat üçün qeyd edək ki, 1983-cü il iyulun 27-də Sarkis Abrahamyan, Setrak Acemyan, Vaçe Dağlıyan, Ara Kurcuhliyan və Simon Yahneyan Lissabondakı Türkiyə səfirliyinə daxil olaraq müvəqqəti işlər vəkilinin xanımı Cahidə Mıhıçoğlunu və 17 yaşlı oğlu Atasayı girov götürüblər. Portuqaliya Baş naziri Mario Soaresin hadisə yerinə göndərdiyi 170 polis səfirliyin binasını mühasirəyə alıb. Terrorçular diplomatın xanımını və bir Portuqaliya polisini qətlə yetirərək özləri ilə bərabər binanı partladıblar.

Təkcə 1979-1984-cü illərdə ermənilər dünyanın ayrı-ayrı ölkələrində 42 türk diplomatını qətlə yetiriblər. Azərbaycanda isə 1984-cü ildə Bakı şəhərində 106 saylı marşrut avtobusu erməni terrorçusu Vartanov tərəfindən partladılıb, nəticədə 1 qadın həlak olub, 3 nəfər yaralanıb. 16 sentyabr 1989-cu ildə Tbilisi-Bakı marşrutu ilə hərəkət edən sərnişin avtobusu partladılıb, 5 nəfər həlak olub, 25 nəfər yaralanıb. 13 fevral 1990-cı ildə Yevlax-Laçın avtomagistralının 105-ci kilometrində Şuşa-Bakı marşrutu ilə hərəkət edən avtobus partladılıb, 13 nəfər azərbaycanlı yaralanıb. 10 avqust 1990-cı ildə Xanlar rayonunun (indiki Göygöl rayonu) Nadel kəndi yaxınlığında LAZ markalı avtobus partladılıb, nəticədə 17 nəfər həlak olub, 16 nəfər yaralanıb. Ermənilərin hələ sovet hakimiyyəti dövründə sərnişin avtobuslarında azərbaycanlılara, o cümlədən ayrı-ayrı mülki şəxslərə və dövlət obyektlərinə qarşı həyata keçirdikləri terror aktlarının sayı onlarladır.

Lakin erməni terrorizmi təkcə azərbaycanlılara və türklərə qarşı yönəldilməyib. 1977-ci il yanvarın 8-də Moskva metrosunun "İzmayılov" və "1 May" stansiyaları arasında partlayış olub. Rəsmi məlumatlarda 7 nəfərin öldüyü, 40-dan artıq isə yaralının olduğu bildirilib. Elə həmin gün bir qədər sonra Moskva metrosunda daha 2 partlayış baş verib. Sentyabrın 3-də partlayışda təqsirli bilinən Stepan Zatikyan, Akop Stepanyan və Zaven Baqdasaryan İrəvanda saxlanılıblar. 1979-cu il dekabrın 23-də İtaliyada Fransa aviakampaniyasının qarşısında partlayış törədilib. Məsuliyyəti üzərinə götürən ASALA bununla Fransada yaşayan ermənilərə guya repressiv münasibətə son qoyulmasına çağırış etdiyini bildirmişdi.

1980-ci il fevralın 18-də İtaliyada daha bir partlayış olur. ASALA "Suis Eyr" və "Lüfthanza" kampaniyalarının qarşısında törədilən partlayışla İsveç və Almaniya hökumətinə erməniləri həbsə aldığına görə xəbərdarlıq etdiyini açıqlayır. Amma bu hadisələrə lazımi qiymət verilməməsi ucbatından erməni terrorizmi getdikcə daha geniş miqyas alır.

SSRİ dağıldıqdan sonra isə Hayastan dövlət səviyyəsində terroru dəstəkləyərək onu təcavüzkar siyasətinin əsas vasitələrindən birinə çevirib. Ötən əsrin 90-cı illərində Azərbaycanda sərnişin və yük qatarlarında, hava nəqliyyatında, Bakı Metropolitenində və sərnişin daşıyan dəniz bərəsində törədilmiş terror aktlarına dair çoxsaylı faktlar, məhkəmə materialları sübut edir ki, Azərbaycanın dinc əhalisinə qarşı həyata keçirilən terror aktları Hayastan hökuməti tərəfindən maliyyələşdirilərək bu ölkənin xüsusi xidmət orqanları tərəfindən həyata keçirilib.

Göründüyü kimi, müsəlmanlara, əsasən də türklərə düşmən kimi yanaşan ermənilər özlərinin regionda çirkin ərazi iddialarını gerçəkləşdirmək üçün amansız terrordan da istifadə ediblər. Bu gün də həmin ssenari davam edir. Avropa bəşəriyyət üçün böyük bəlaya çevrilən terrorun artıq acı nəticələrini hiss etməkdədir. Beynəlxalq terrorizmin qarşısının vaxtında alınmaması və terrordan əziyyət çəkən ölkələrə biganə yanaşmanın hansı dəhşətli fəsadlar verdiyi isə göz önündədir.

Elçin CƏFƏROV,

Azərbaycan.-2023.- 27 iyul.- S.6.