Ölkəmizin turistlərin diqqətini cəlb edən gözəl məkanları var

Azərbaycan füsunkar təbiət mənzərələri, əlverişli iqlimi ilə ilin bütün fəsillərində turizm həvəskarlarının diqqətini çəkir. Gözəlliyi ilə fərqlənən yay fəslində, adətən, bu maraq daha da artır. Bu da hər il yay aylarında respublikamıza gələn xarici turistlərin sayının yüksəlməsində özünü göstərir.

İlboyu qonaq-qaralı olan ölkəmizin zəngin tarixinə, qədim mədəniyyətə malik olmasına, unikal abidələrinə, muzeylərinə heyran qalan turistlər üçün Azərbaycan eyni zamanda nadir təbii-iqlim xüsusiyyətləri, fauna və florası ilə heyrətamizdir. Zəngin turizm potensialına malik olan respublikamızın 1200-dən çox irili-xırdalı çayı, şəlalələri, palçıq vulkanları, nadir qoruqları, müalicəvi əhəmiyyətli narın qumlu çimərlikləri turist axınına şərait yaradır. Xəzərin mirvari boyunbağısı adlandırılan Bakı bulvarı, dəniz sahillərində - Lənkərandan tutmuş Nabranadək dünya standartları səviyyəsində yaradılan istirahət zonaları, adətən, Azərbaycana gələn qonaqları razı salır. Turistlərin daha çox diqqətini çəkən məkanlardan biri də Prezident İlham Əliyevin tapşırığı ilə həyata keçirilən, respublikamızın şimal bölgəsində, Qusar şəhərindən 30 kilometr şimalda, rayonun Dağlıq Alayan kəndi ərazisində yaradılan, məşhur Şahdağ Qış-Yay Turizm Kompleksidir.

Gələnlərin sayı artıb

Statistik məlumatlar deməyə əsas verir ki, 2020-ci ildə başlayan, qlobal bəlaya çevrilən, bir sıra sahələr kimi turizm sektorunun da zəifləməsinə səbəb olan koronavirus pandemiyasının vurduğu ziyan aradan qaldırılır. Artıq bütün dünyanın bəlasına çevrilən COVID-19 pandemiyasının səngiməsi respublikamızda da bu sahənin dirçəlməsi ilə nəticələnib. Belə ki, Dövlət Sərhəd Xidməti bu ilin yanvar-iyun aylarında Azərbaycana dünyanın 181 ölkəsindən 918,8 min və ya əvvəlki ilin müvafiq dövrü ilə müqayisədə 43,9 faiz çox əcnəbi və vətəndaşlığı olmayan şəxsin gəldiyi barədə məlumat verib.

Qeyd olunub ki, gələnlərin 32,9 faizi Rusiya Federasiyası, 19,2 faizi Türkiyə, 7,7 faizi İran, 5,2 faizi Hindistan, 4,9 faizi Gürcüstan, 2,4 faizi Səudiyyə Ərəbistanı, hər birindən 2,3 faiz olmaqla Pakistan və Qazaxıstan, 2,1 faizi Birləşmiş Ərəb Əmirlikləri, 1,8 faizi Özbəkistan, hər birindən 1,5 faiz olmaqla Belarus və Ukrayna, 1,3 faizi Küveyt, hər birindən 1,2 faiz olmaqla Böyük Britaniya və Türkmənistan, 12,5 faizi digər ölkələrin vətəndaşları olub.

Məlumatda o da bildirilib ki, 2022-ci ilin eyni dövrü ilə müqayisədə Çindən gələnlərin sayı 7,2, Türkmənistandan 3,9, Hindistandan 3,1, Belarusdan 2,3, Özbəkistandan 2,2, Qazaxıstandan 1,9, Rusiya Federasiyasından 1,9, İsraildən 1,6 dəfə, ABŞ-dən 44,2 faiz, Küveytdən 37,2 faiz, Gürcüstandan 35,5 faiz, Böyük Britaniyadan 34,6 faiz, Birləşmiş Ərəb Əmirliklərindən 22,7 faiz, Pakistandan 16,1 faiz, Türkiyədən 15,9 faiz artıb, Səudiyyə Ərəbistanından gələnlərin sayı 23,6 faiz, İrandan 14,9 faiz, Omandan 9,9 faiz, Ukraynadan 6,2 faiz azalıb.

Ötən ilin yanvar-iyun ayları ilə müqayisədə MDB ölkələrindən gələnlərin sayı 1,9 dəfə artaraq 385,8 min nəfər, Avropa İttifaqına üzv ölkələrdən gələnlərin sayı isə 40,0 faiz artaraq 46,7 min nəfər, körfəz ölkələrindən gələnlərin sayı 8,9 faiz azalaraq 134,2 min nəfər olub.

İşğaldan azad olunan ərazilərin turizm potensialı böyükdür

Yayın qızmar günlərində turistlər dəniz, çay kənarlarında, çəmənliklərdə, ağacların kölgəsində, bulaqların başında dincəlməyə, təbiətin seyrinə çıxmağa üstünlük verirlər. İlin isti aylarında istirahət etmək, günlərini xoş keçirmək üçün ölkəmizə üz tutan əcnəbilərin gedə biləcəkləri məkanların sayı artıb.

Müzəffər Azərbaycan Ordusu 2020-ci ildə 44 günlük Vətən müharibəsində zəfəri ilə respublikamızın 20 faiz ərazilərində Ermənistanın 30 ilə yaxın davam edən işğalına son qoydu. Təbiətinin gözəlliyi və zənginliyi ilə bütün dünyada tayı-bərabəri olmayan Qarabağ və Şərqi Zəngəzur Azərbaycan dövlətinin qətiyyətlə həyata keçirdiyi geniş və əhatəli quruculuq, bərpa işləri sayəsində yenidən dircəlir. Təcavüzkar ermənilərin əsirliyindən azad ediləndən sonra dövlət səviyyəsində bərpa-quruculuq işləri aparılan Azərbaycanın mədəniyyət mərkəzi, Qarabağın baş tacı Şuşada yeni turizm marşrutları açılır. Şuşaya Dövlət Turizm Agentliyi tərəfindən artıq müxtəlif layihələr formatında səfərlər də həyata keçirilir. Turistlərə Cıdır düzü, "Vaqif" məqbərəsi, Mehmandarovların evi, Bülbülün ev-muzeyi, Yuxarı Gövhər ağa məscidi, "Güllələnmiş Heykəllər" meydançası, Şuşa qalası, Şuşanın "Gəncə" qapıları və "Xarıbülbül" simvolu, "Qazançı" kilsəsi, Şuşa "Realnıy" məktəbi kimi tarixi abidələrlə tanışlıq imkanı yaradılır.

Erməni vandallarının işğalından qurtulmuş Qarabağda, Şərqi Zəngəzurda bənzərsiz məkanlar çoxdur. 30 ilə yaxın davam edən işğaldan sonra azadlığa çıxmış həmin yerlərə bərpa-quruculuq işlərinin tamamlanmasından sonra turistlərin sevə-sevə gedəcəkləri şübhəsizdir. Turizm şöhrətini bərpa edəcəyi, həm yerli, həm də xarici turistlərin ən çox üz tutduqları məkanlardan biri olacağı günlərin intizarında olan bölgələrimizdən biri də möhtəşəm təbiəti, əlverişli relyefi, tarixi abidələri, mineral suları ilə məşhur olan Kəlbəcərdir. Dövlət Turizm Agentliyi sədrinin müşaviri Kənan Quluzadə mətbuata açıqlamasında Kəlbəcərdə turizm və rekreasiya zonalarının yaradılmasının nəzərdə tutulduğunu bildirib. Vurğulayıb ki, biz bu bölgəni, doğrudan da, dünya üçün çox cəlbedici bölgə kimi təqdim etməliyik. Kənan Quluzadə deyib: "İşğaldan azad edilmiş ərazilərin geniş turizm potensialı nəzərə alınaraq, Dövlət Turizm Agentliyi tərəfindən bir sıra istiqamətdə layihələr reallaşdırılır. Belə istiqamətlərdən biri də Kəlbəcərdi. Burada turizm və rekreasiya zonalarının yaradılması nəzərdə tutulub. Kəlbəcərin çox böyük və zəngin turizm potensialı var. Layihələr çoxdur. İstisuyun bərpası və turistlərin bura cəlb olunması da gündəmdə olan məsələdir".

İşğaldan azad olunmuş ərazilərdə turizmin inkişafına müxtəlif yanaşmalar olduğunu qeyd edən Kənan Quluzadə diqqətə çatdırıb ki, bu, həm rayonlar üzrədir, həm də mövzular üzrə, misal üçün, xalçaçılıq, mətbəxlə bağlı, muğam ilə əlaqəli inkişafdır. Layihələr hələ ki müzakirə mövzusudur, ancaq artıq bu istiqamətdə ilk addımlar atılıb.

Zöhrə FƏRƏCOVA,

Azərbaycan.-2023.- 27 iyul.- S.10.