Paşinyan keçmiş hərbi xuntanı yenə ifşa etdi

Sarkisyan-Koçaryan koalisiyası indi əsas diqqəti iqtidara qarşı təhqir və iftira kampaniyası üzərində cəmləşdirib

"Hayastanda demokratiyanın olmaması ona gətirib çıxardı ki, biz Qarabağ məsələsinin təfərrüatlarını yalnız indi öyrənirik".

Ermənistanın baş naziri Nikol Paşinyanın İrəvanda keçirilən illik "Erməni Demokratiya Forumu"nda səsləndirdiyi bu fikir fonunda keçmiş hərbi xuntanın hakimiyyətə qarşı daha da aktivləşdiyi müşahidə edilir. Sarkisyan-Koçaryan koalisiyası indi əsas diqqəti Nikol Paşinyan iqtidarına qarşı təhqir və iftira kampaniyası üzərində cəmləşdirib.

"Ana Ermənistan" İctimai Hərəkatı hakimiyyət dəyişikliyinə və növbədənkənar parlament seçkilərinin keçirilməsinə nail olmağa çalışır. Bu barədə hərəkatın koordinatoru, erməni politoloq Andranik Tevanyan mətbuat konfransında bildirib. Onun sözlərinə görə, hərəkat Hayastanın hazırkı hökumətinin getməsinə nail olmağa çalışacaq, çünki onun hakimiyyətdə olması ölkə üçün ekzistensial təhlükədir. Tevanyan qeyd edib ki, hökumət gedəndən sonra bir il ərzində növbədənkənar parlament seçkiləri keçirəcək müvəqqəti hökumət yaradılmalıdır.

Hərəkatın iştirakçısı Manuk Sukiasyan bildirib ki, korrupsionler saxlanılanda və ya həbs olunanda işlər uzun çəkib, sonra isə işlər dayandırılıb: "Paşinyan deyirdi ki, Qarabağ Ermənistandır, vəssalam, iki ildən sonra isə Qarabağın Azərbaycan olduğunu bəyan etdi. Bir şeyi deyir, başqa bir şeyi edir".

Göründüyü kimi, Hayastanın Azərbaycanın ərazi bütövlüyünü tanımasını bəyan etdikdən sonra Qarabağda separatçılar arasında dəstəyə malik Sarkisyan-Koçaryan koalisiyasının sərt formada müqavimət göstərməsi gözlənilir və bu da məğlub ölkədə qarşıdurmanın dərinləşməsi deməkdir. Əsas niyyət İrəvana qarşı müqavimət və itaətsizlik təşkil etmək, bununla xaotik durumun yaradılmasına nail olub, qiyam təşkil etməklə güc yolu ilə hakimiyyəti qəsb etməkdir. Məhz belə vəziyyət siyasi gərginliyin daha da yüksələcəyini göstərir.

Paşinyan isə hərbi xunta təmsilçilərinin yenidən həbsə atılması üçün hüquqi müstəvidə onlara qarşı cinayət təqibini davam etdirir. Bununla yanaşı, hakimiyyət təhlükəli hesab etdiyi digər müxalif fiqurları da inzibati yolla sıradan çıxarmaq qərarındadır.

Hərbi-siyasi məsələlər üzrə erməni ekspert Hraçya Arzumanyan deyib ki, yeni heç nə yoxdur, Azərbaycan mövqeyini dəyişməyib, Hayastan tərəfi həll yollarını tapmağa çalışır. O bildirib ki, hakimiyyətin sülh olacağını niyə təkid etdiyini başa düşmür: "Hakimiyyət vəziyyəti düzgün qiymətləndirmir, müharibə bitməyib. Blokada hərbi əməliyyatın bir formasıdır, müharibə bitməyib. Rusiya-Türkiyə alyansı hesab edir ki, Qarabağ məsələsi bağlıdır, Zəngəzur məsələsi qalır. Qarabağda olanların (separatçılar - red.) davranışı antiermənidir, onlar başqasının oyununa giriblər. Qarabağ "hakimiyyəti" və erməniləri parçalanıb, daxili oyunlara və Rusiyanın diktəsinə son qoyun. İrəvan bu təcrid vəziyyətini aradan qaldırmalıdır".

Hayastanda əhalini siyasi proseslər deyil, məhz getdikcə daha da çökməkdə olan sosial-iqtisadi vəziyyət düşündürür. Dərin ruh düşkünlüyünə qərq olan insanlar çıxış yolunu mühacirətdə görürlər. Əhalinin sayı sürətlə azalmaqda davam edir, xaricə köçənlərin sayı artır. Əhalinin təbii artım səviyyəsinin get-gedə aşağı düşməsi isə erməni sosioloqlarının hakimiyyətə ünvanlanmış xəbərdarlıqlarının çoxalmasına səbəb olur. Real vəziyyət Hayastanın faktiki olaraq demoqrafik böhran yaşadığını, bu problemin həlli perspektivinin olmadığını göstərir. Erməni sosioloqu Samvel Manukyan deyib ki, bir il içində 150-200 min erməni mühacirət edə bilər. Köç edənlərin əksəriyyəti isə Rusiya istiqamətini seçəcək. Çünki Rusiya onlara yeni həyat qurmaq üçün daha çox imkanlar vəd edir. Asan sosiallaşma, mövcud məşğulluq imkanları Rusiyada daha böyükdür. Üstəlik, bu ölkədə dil maneəsi yoxdur. Bütövlükdə bütün bunlar Hayastanın böyük tənəzzül yaşadığını göstərir.

Elçin CƏFƏROV,

Azərbaycan.-2023.- 3 iyun.- S.12.