Avropa İttifaqı Azərbaycanla əməkdaşlığın inkişafında maraqlıdır

Xəbər verildiyi kimi, iyunun 1-də Kişineuda "Avropa Siyasi Birliyi"nin 2-ci Zirvə toplantısının açılış mərasimi keçirilib. Azərbaycan Prezidentinin də iştirak etdiyi sammitdə sülh və təhlükəsizliyin təmin edilməsi, enerji təhlükəsizliyi və Avropada ölkələrarası əlaqələrin gücləndirilməsi məsələləri müzakirə edilib. Prezident İlham Əliyevin ardıcıl olaraq "Avropa Siyasi Birliyi"nin Zirvə toplantılarına dəvət alması Azərbaycanın uğurlu xarici siyasətinin nəticəsidir. Bu, Avropa İttifaqının Azərbaycana xüsusi marağını bir daha təsdiq edir.

Mövzu ilə bağlı Milli Məclisin deputatlarının fikirlərini öyrəndik.

Avropa İttifaqı Azərbaycanı proseslərdən kənarda saxlamaq niyyətində deyil

Milli Məclisin deputatı Fazil Mustafa bildirdi ki, "Avropa Siyasi Birliyi" aktual istiqamətlərin müəyyən edilməsi baxımından mühüm platformadır: "Prezident İlham Əliyevin "Avropa Siyasi Birliyi"nin Zirvə toplantısına dəvət olunması Avropa İttifaqının Azərbaycanla əlaqələrinin inkişafında maraqlı olduğunu göstərir. Avropa İttiqafının Qarabağ məsələsi ilə bağlı əsas marağı isə bu regionda kommunikasiya xətlərinin açılmasıdır. Bölgədə müharibə riskinin qalması, eləcə də yolun bağlı olması Avropanın Çinlə ticarət perspektivlərinin artırılmasına və enerji resurslarının daşınmasına mane olur. Həmçinin imzalanmış sənədlərin reallaşmasına əngəl yaradır".

Deputatın sözlərinə görə, bu, olduqca narahatedici məqamdır: "Nəzərə almaq lazımdır ki, Avropa İttifaqı sülh bərqərar olmayınca bir çox problemin həll edilməyəcəyini anlayır. Azərbaycan tərəfi bu istiqamətdə bütün mümkün variantları bilir, Avropa ilə inteqrasiya prosesində ən uyğun davranış sərgiləyir. Dövlət başçısının belə sammitlərə mütəmadi dəvət olunması həm də Azərbaycanın bölgənin ən güclü, real potensiala sahib iqtisadi resursları olan dövləti kimi tanınmasıdır. Ona görə də Avropa Azərbaycanı proseslərdən kənarda saxlamaq niyyətində deyil".

Fazil Mustafa deyib ki, Avropa İttifaqı regionla əlaqələrini Azərbaycan olmadan gerçəkləşdirə bilməyəcəyini anlayır: "Burada dövlət başçısının mövqeyi, diplomatik bacarığı və manevrləri önəmli rol oynayır. Avropa İttifaqına daxil olan bir çox dövlətlərin rəhbərləri Azərbaycan Prezidentinin xarici siyasi fəaliyyətini yüksək qiymətləndirir və əməkdaşlıqda maraqlı olduğunu gizlətmirlər".

Regional mövqeyimiz Avropa İttifaqı ilə münasibətlərimizə müsbət təsir göstərir

Milli Məclisin deputatı Vüqar Bayramov isə bildirdi ki, Azərbaycan regionda Avropa İttifaqı üçün vacib tərəfdaşlardan biridir: "Prezident İlham Əliyevin "Avropa Siyasi Birliyi"nin Zirvə toplantısına ikinci dəfə dəvət olunması da Avropa İttifaqının Azərbaycana xüsusi marağını təsdiq edir. Avropa İttifaqının Azərbaycanı tərəfdaş kimi görməsi ölkəmizin geosiyasi və geoiqtisadi mövqeyi ilə sıx bağlıdır. Nəzərə almaq lazımdır ki, Azərbaycanın regional mövqeyi ciddi şəkildə güclənib. Xüsusilə 44 günlük Vətən müharibəsindən sonra yaranmış reallıqlar mövqelərimizin güclənməsinə birbaşa təsir göstərib. Bu, xarici aktorların Azərbaycana münasibətinə də təsirsiz ötüşməyib".

Deputat qeyd etdi ki, Avropa İttifaqı ilə Azərbaycan münasibətlərində irəliləmə müşahidə edilir: "Mühüm məqamlardan biri də tərəflər arasında iqtisadi münasibətlərin inkişaf etdirilməsidir. Buraya yalnız enerji sahəsi deyil, iqtisadiyyatın fərqli sektorlarında, eləcə də Avropa İttifaqı Komissiyasının Texniki Yardım Proqramı çərçivəsində əməkdaşlıq daxildir. Təbii ki, enerji sahəsində tərəfdaşlıq xüsusilə vacibdir. Azərbaycan Avropa İttifaqının enerji təhlükəsizliyinə töhfə verən dövlətlərdəndir. Təsadüfi deyil ki, 2022-ci ildə ölkəmizin Avropa İttifaqı ölkələrində mavi qaz istehlakında payı 6,2 faiz artıb. Növbəti illərdə bu göstəricinin ikirəqəmli olacağı proqnozlaşdırılır".

Vüqar Bayramovun sözlərinə görə, bu bir daha sübut edir ki, Azərbaycan Avropanın ümumi qaz istehlakında payını artırır, qoca qitəyə neft ixracını davam etdirir, xüsusilə bir sıra ölkələrin mavi qaza olan tələbatının ödənilməsində xüsusi pay sahibidir. Misal üçün, Bolqarıstanın mavi qaza olan tələbatının üçdəbir hissəsindən çoxunu Azərbaycan ödəyir. Mərkəzi Avropada enerji təhlükəsizliyinin formalaşmasında da ölkəmiz xüsusi paya malikdir. Yəni Avropa İttifaqı ilə əməkdaşlıq gündən-günə genişlənir.

Deputat bildirdi ki, Azərbaycan 2027-ci ildən etibarən bərpaolunan enerji ilə Avropa bazarına daxil olacaq: "Bu da Avropa İttifaqının marağına səbəb olan məsələlərdəndir. Azərbaycan yaxın gələcəkdə alternativ mənbələrdən əldə edilən "yaşıl enerji" ixracatçısı olacaq. Bundan başqa, Azərbaycan beynəlxalq prinsiplərə, sülhə və təhlükəsizliyə töhfə verən dövlətdir. Yəni bizim regional mövqeyimiz Avropa İttifaqı ilə münasibətlərimizə müsbət təsir göstərən faktorlardandır".

Nəzrin QARDAŞXANOVA,

Azərbaycan.-2023.- 3 iyun.- S.5.