Biz alman keyfiyyətini Azərbaycana gətirdik

"DÜXTİNQ PUMPEN" şirkəti ölkəmizdə fəaliyyətini genişləndirməkdə maraqlıdır

İqtisadiyyatın çox az sahəsini göstərmək olar ki, orada Almaniyanın "DÜXTİNQ PUMPEN" şirkətinin istehsal etdiyi nasoslardan istifadə olunmasın. "Təcrübəyə söykənən keyfiyyət!" şüarını rəhbər tutan bu şirkət öz məhsullarının layihələndirilməsi, hazırlanması, istismara verilməsi və necə işləməsinə nəzarət edilməsi istiqamətindəki fəaliyyəti ilə istehlakçıları daim razı salır.

"DÜXTİNQ PUMPEN"in avadanlıq satdığı və quraşdırdığı ölkələrdəki hörməti onun keyfiyyətə, səmərəliliyə, innovasiyalara əsaslanan iş siyasətindən irəli gəlir. Belə ölkələrdən biri də məhz Azərbaycandır. Şirkətin ölkəmizlə iqtisadi əməkdaşlıq əlaqələri var və onları daha da genişləndirmək istəyir. Elə "Bakı Enerji Həftəsi"ndə iştirak etməsinin, bu tədbirin mühüm seqmenti olan sərgilərdə öz ekspozisiyalarını göstərməsinin əsas səbəbi də bu idi.

"Bakı-Ekspo" Mərkəzində həmsöhbətimiz olan "DÜXTİNQ PUMPEN"in direktorunun Rusiyaya və MDB ölkələrinə satış üzrə müavini Oleq Kalabuxov bildirdi ki, paytaxtımıza gələn kimi "Şimal-2" Elektrik Stansiyasına baş çəkiblər. Bu müəssisə ilə artıq yeddi ildir əməkdaşlıq edirlər. İndiyədək ortaya heç bir problem çıxmayıb. Ümumiyyətlə, "Azərenerji" ASC ilə işləmək "DÜXTİNQ PUMPEN" üçün çox xoşdur.

Xatırladaq ki, "Şimal-2" Elektrik Stansiyası Prezident İlham Əliyevin iştirakı ilə 2019-cu il sentyabrın 5-də istismara verilib. 1950-ci illərdə iki mərhələdə istifadəyə verilən "Şimal" Elektrik Stansiyasının 1988-ci ildə birinci, 1998-ci ildə ikinci növbəsi tam köhnəldiyindən istismardan çıxarılmışdı. 1998-ci ildə Ulu Öndər Heydər Əliyev Yaponiyaya səfəri zamanı 400 meqavatlıq "Şimal-1" Elektrik Stansiyasının tikintisi üçün ölkəmizə investisiya cəlb edilməsinə nail olmuşdu. Beləliklə, 2000-ci ildə əsası qoyulan "Şimal-1" stansiyası 2002-ci ildə istismara verildi. 2011-ci ildə isə Prezident İlham Əliyevin iştirakı ilə ərazisi 104,9 hektar, gücü 400 meqavatlıq "Şimal-2" Elektrik Stansiyasının təməli qoyuldu. Stansiyanın tikinti və quraşdırma prosesləri 2019-cu ildə tamamlandı.

Stansiyanın fəaliyyətinə aid bir çox digər məsələlərdən söhbət açmadan yalnız onu deyək ki, onun buxar turbinlərinin kondensatorları və avadanlıqları Xəzər dənizindən götürülən su vasitəsilə soyudulur. Bu məqsədlə Xəzər dənizindən 140 metr uzunluğunda soyuducu su kanalı, hovuz, su xətti və ümumi məhsuldarlığı saatda 52 min kubmetr olan sahil nasos stansiyası, o cümlədən buxar turbininin kondensatorundan çıxan soyuducu suyun Xəzər dənizinə qaytarılması üçün boru xətti çəkilib. Stansiyanın texniki və içməli suya tələbatının təmin edilməsi və su ehtiyatının yaradılması məqsədilə ərazidə duzsuzlaşdırma qurğusu və digər zəruri infrastruktur tikilib. Stansiyanın yanğın təhlükəsizliyinin təmin edilməsi üçün ərazidə müasir səviyyədə yanğınsöndürmə sistemi də qurulub. Ətraf mühitin mühafizəsi məqsədilə stansiyada əksosmos qurğusu, xüsusi ekoloji monitorinq sistemi, sənaye və çirkab sularının təmizlənməsi avadanlıqları quraşdırılıb.

Alman şirkətinin rəsmisi öz söhbətində Xəzərdən suyu götürüb təmizləyən həmin qurğulardan danışdı, maraqlı bir misal göstərdi:

- Biri var ki, mağazadan hazır paltar alırsan. Biri də var ki, dərziyə sifariş verib məhz özün istədiyin ölçüdə, formada paltar tikdirirsən. Biz "Azərenerji" ilə bax belə işləyirik. Təvazökarlıqdan kənar çıxmasın, bizim şirkətimiz klassik bir şirkətdir. Biz anbar üçün işləmirik. Unikal avadanlıq buraxdığımıza görə daim sifarişlər alırıq. Çünki alman keyfiyyətini işimizdə göstəririk.

Oleq Kalabuxov bildirdi ki, əgər bu avadanlıqlara istər Azərbaycanın, istərsə də digər ölkələrin müəssisələrində tələbat olarsa, onlar sifarişləri məmnuniyyətlə yerinə yetirərlər.

"DÜXTİNQ PUMPEN" neft-qaz və energetika sərgilərində məhsulları haqqında geniş məlumat təqdim edib. Məhsullar isə müxtəliftəyinatlıdır. Məsələn, dəm qazlarını təmizləyən nasoslar yeni unikal və innovativ texnologiyalarla hazırlandığından Avropada getdikcə böyük populyarlıq qazanır.

Daha bir məhsul dağ-mədən sənayesində istifadə olunan nasosdur ki, onun istehsalına hələ keçən əsrin 50-ci illərindən başlanıb. Sutəmizləyici, o cümlədən dəniz suyunu saflaşdıran avadanlıqlar isə 90-cı illərdən istehlakçılar tərəfindən rəğbətlə qarşılanıb. İstehsalçılar hər layihəyə fərdi münasibət göstərdiklərindən bu məhsullar dünya bazarında yüksək mövqe tutur.

"DÜXTİNQ PUMPEN"nin nasosları öz keyfiyyətinə görə eyni etimad və etibarı neft və kimya sənayelərində də əldə edib. Qaldı ki, sərgilərin təşkilinə, həmsöhbətimiz bu tədbirlərə marağın böyük olduğunu müşahidə etdiyini bildirdi.

- Diyarınız günəşli, insanlarınız gözəldir, - dedi. - Bu gözəllik, bu işıq sanki "Bakı"Ekspo" Mərkəzinin pavilyonlarına da inteqrasiya edib.

Flora SADIQLI,

Azərbaycan.-2023.- 3 iyun.- S.8.