Dövlət büdcəsinə edilən dəyişikliklər Böyük qayıdışı sürətləndirəcək

Xəbər verildiyi kimi, cari ilin dövlət büdcəsinin gəlir və xərcləri artırılır. Bunun əsas səbəbi cari ilin 4 ayında daxilolmaların həcminin proqnozlaşdırılandan daha çox olmasıdır. Bu, dövlət büdcəsinin gəlirlərinin dayanıqlı olmasından xəbər verir.

Cari ilin dövlət büdcəsinin gəlirləri 33 milyard 779,5 milyon manat proqnozlaşdırılıb. Bu, əvvəl təsdiq olunmuş göstəricilərdən 9,8 faiz çoxdur. Əldə olunan əlavə vəsaitin çox hissəsinin ölkənin müdafiə qabiliyyətinin və təhlükəsizliyinin gücləndirilməsinə, eləcə də Böyük Qayıdışa dair I Dövlət Proqramının icrasına yönəldilməsi nəzərdə tutulub.

Büdcə gəlirləri proqnozlaşdırılandan çox olacaq

Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov qəzetimizə açıqlamasında bildirib ki, bu ilin 4 ayında dövlət büdcəsinə 2 milyard 400 milyon manat əlavə vəsait daxil olub: "Büdcəyə kifayət qədər böyük məbləğdə əlavə vəsaitin daxil olması ondan xəbər verir ki, cari ilin sonuna qədər büdcə gəlirləri proqnozlaşdırılandan daha çox olacaq. Belə ki, əlavə 3 milyard 5 milyon manat gəlir gözlənilir. Bu da təbii olaraq dövlət büdcəsinin gəlirlərinə yenidən baxılmasına və xərclərin artırılmasına zəmin yaradır. Əlavə vəsait büdcə xərclərinin də artırılmasına imkan verir".

Deputatın dediyinə görə, yenidən baxılmış cari ilin dövlət büdcəsinin gəlirlərinin 52,5 faizi neft, 47,5 faizi isə qeyri-neft sektorunun payına düşür. Görünən odur ki, geoiqtisadi və geosiyasi proseslər, xüsusilə enerji daşıyıcılarındakı qiymət artımı ölkə iqtisadiyyatına təsirsiz ötüşməyib.

Ölkəmizin müdafiə qabiliyyətinin daha da gücləndirilməsi diqqət mərkəzindədir

Vüqar Bayramov bildirib ki, büdcəyə ediləcək dəyişikliklərdə işğaldan azad olunmuş Qarabağ və Şərqi Zəngəzurda bərpa və quruculuq işlərinin intensivləşdirilməsinə əlavə 2 milyard 260 milyon manat vəsaitin ayrılması planlaşdırılıb. Beləliklə, dövlət büdcəsindən Qarabağ və Şərqi Zəngəzurun bərpası işlərinə 2023-cü il üzrə ümumilikdə 5 milyard 260 milyon manat vəsait ayrılacaq. Bu, Böyük qayıdışı sürətləndirəcək və 2024-cü il üçün nəzərdə tutulmuş kütləvi qayıdışın reallaşmasına imkan yaradacaq.

Deputat deyib ki, büdcə dəyişikliklərində digər mühüm məqam ordumuzun fəaliyyətinin gücləndirilməsi ilə bağlıdır: "Ölkənin müdafiə qabiliyyətinin daha da gücləndirilməsinə 1 milyard 105 milyon, xüsusi müdafiə təyinatlı layihələr və tədbirlər üzrə isə 1 milyard manat vəsaitin ayrılması proqnozlaşdırılıb. Bu, milli təhlükəsizliyimizin gücləndirilməsi baxımından çox vacibdir. Dəyişikliklər Azərbaycanın dövlət büdcəsinin gəlirləri baxımından dayanıqlı olduğunu göstərir. Bu dayanıqlılıq büdcədən prioritet istiqamətlərə daha çox vəsaitin ayrılmasına imkan yaradır. Bu, həmçinin ölkəmizin iqtisadi gücünü göstərən vacib faktorlardandır".

İqtisadi islahatların səmərəliliyinin təsdiqi

Deputat Arzu Nağıyev qeyd edib ki, 2023-cü ilin dövlət büdcəsinə dəyişikliklər müzakirə edilib və birinci oxunuş üçün Milli Məclisin plenar iclasına tövsiyə olunub: "Müzakirələr zamanı büdcə gəlirlərinə yenidən baxılıb, xərclər artırılıb, ilin qalan dövrü üçün neftin bir barelinin orta ixrac qiyməti 60 dollar götürülüb. Bu və ya digər istiqamətlərdə dinləmələr baş tutub. Müzakirələrin əsas məqsədi büdcəyə daxil olan əlavə vəsaitin prioritet istiqamətlər üzrə yönləndirilməsinə nail olmaqdır".

Deputat vurğulayıb ki, büdcə xərclərinin artırılması üçün üç əsas istiqamət müəyyən edilib: "Birinci əsas istiqamət sosial məsələlər, işsizliyin aradan qaldırılması, həssas təbəqəyə yönəldilən xərclər və sairdir. İkincisi, ölkəmizin müdafiə qabiliyyətinin artırılması, üçüncüsü isə, işğaldan azad olunmuş ərazilərə qayıdışın sürətləndirilməsi ilə bağlıdır. Yəni büdcəyə daxilolmalara yenidən baxılması bu 3 meyarla sıx bağlıdır. Hesab edirəm ki, bu məsələlər plenar iclasda daha geniş müzakirə olunacaq".

Arzu Nağıyevin dediyinə görə, bütün bunlar Azərbaycanda aparılan iqtisadi islahatların səmərəliliyini sübut edir. Əlavə daxilolmaların 47 faizdən çoxunun qeyri-neft sektorunun payına düşməsi də xüsusi əhəmiyyət kəsb edir.

Nəzrin QARDAŞXANOVA,

Azərbaycan.-2023.- 4 iyun.- S.4.