Möhtəşəm yüzillik

Azərbaycan-Türkiyə əlaqələri özünün qızıl dövrünə qədəm qoyub

Mayın 28-də - 105 il əvvəl qazandığımız müstəqillik gününü təntənəli şəkildə qeyd etdiyimiz tarixdə türk dünyası adına daha bir sevincli və qürurlu xəbər aldıq. Qardaş Türkiyədə keçirilən prezident seçkilərinin ikinci turunda da böyük siyasi lider Rəcəb Tayyib Ərdoğan qalib gəlmişdi və bu qalibiyyət həm türk dünyası birliyinin daha da güclənəcəyi və möhkəmlənəcəyinin, həm də tarixən var olan Azərbaycan-Türkiyə sarsılmaz birliyinin daha da dərinləşəcəyinin qarantı idi. Məhz buna görə idi ki, milli iradə nümayiş etdirərək ölkələrinin gələcəyi üçün düzgün seçim edən Türkiyə xalqı ilə bərabər, bu qələbə Azərbaycan xalqının da sevincinə səbəb olmuşdu.

Yeni yüksəliş dövrü

Türkiyə Cümhuriyyətinin 100-cü ildönümündə və yeni möhtəşəm yüzilliyin başlanğıcında qazandığı qələbə ilə türk əsrinin, Türkiyənin yeni yüksəliş dövrünün qapılarının açıldığını deyən Rəcəb Tayyib Ərdoğan növbəti beş il ərzində qardaş ölkənin şanını və şərəfini qorumaq, etibarını artırmaq və adını dünyada daha da ucaltmaq üçün var gücü ilə çalışacaqlarını bildirdi.

Türkiyədəki seçkilərdən sonra Rəcəb Tayyib Ərdoğanı ilk təbrik edən lider məhz Azərbaycan Prezidenti İlham Əliyev oldu. Prezident İlham Əliyev bu qələbəni Türkiyə xalqının Rəcəb Tayyib Ərdoğanın həyata keçirdiyi siyasətə göstərdiyi etimad kimi dəyərləndirdi və əmin olduğunu bildirdi ki, növbəti illərdə də Türkiyənin hərtərəfli inkişafı davam edəcək.

Ardınca qardaşı Rəcəb Tayyib Ərdoğana təbrik məktubu ünvanlayan İlham Əliyev deyirdi: "Sizin tarixi missiyanızın əsas qayəsini təşkil edən qüdrətli və nüfuzlu Türkiyə Respublikasının uğurları qardaş ölkə olaraq bizi də olduqca qürurlandırır". Tarixən qırılmaz tellərlə bir-birinə bağlı olan xalqlarımızın iradəsindən qaynaqlanan Azərbaycan-Türkiyə əlaqələrinin bu gün dünyada bənzəri olmadığını bildirən Prezident İlham Əliyev həm də qeyd edirdi ki, sarsılmaz dostluq və qardaşlığımız, qarşılıqlı faydalı əməkdaşlığımız, birgə gerçəkləşdirdiyimiz irimiqyaslı layihələr strateji müttəfiqliyimizi səciyyələndirən mühüm amillər olmaqla yanaşı, eyni zamanda regional əməkdaşlığın, təhlükəsizliyin və sabitliyin onurğa sütununu təşkil edir.

Örnək dostluq, sarsılmaz qardaşlıq

İkinci Qarabağ müharibəsində sona qədər Azərbaycanın, yəni haqlı və ədalətli tərəfin yanında mövqe tutaraq ona siyasi və mənəvi dəstək olan Türkiyə əyani şəkildə nümayiş etdirdi ki, regionda sabitliyin və əməkdaşlığın tərəfdarıdır. Misal olaraq deyə bilərik ki, məhz Vətən müharibəsindəki zəfərdən sonra regionda kommunikasiyaların açılması ilə bağlı məsələlər də sülh müqaviləsinin gündəliyinə daxil edilib və bu, ümumilikdə region ölkələrinin hamısının marağına xidmət edir.

Müharibənin başladığı ilk günlərdən Rəcəb Tayyib Ərdoğan verdiyi açıqlamalarda bütün dünyaya bəyan etdi ki, Azərbaycan bu haqq savaşında tək deyil, onun Türkiyə kimi arxa-dayağı var. Təsadüfi deyil ki, 2020-ci il dekabrın 10-da Azadlıq meydanında keçirilən təntənəli Zəfər paradında qardaş ölkənin Prezidenti də iştirak etdi və iki qardaş ölkə qələbə qürurunu birlikdə yaşadı.

Postmüharibə dövründə də Azərbaycan-Türkiyə əlaqələri bütün sahələrdə yüksələn xətt üzrə inkişaf edir. 2021-ci il iyunun 15-də - Milli Qurtuluş Günündə Prezident İlham Əliyev və Türkiyə Prezidenti Rəcəb Tayyib Ərdoğanın mədəniyyət paytaxtımızda tarixi Şuşa Bəyannaməsini imzalamaları isə iki qardaş ölkənin tarixən mövcud olan əlaqələrini müttəfiqlik səviyyəsinə yüksəltdi. Rəcəb Tayyib Ərdoğanın azad edilmiş torpaqlarımıza, Qarabağ və Şərqi Zəngəzura müxtəlif zamanlarda üç dəfə səfər etməsi, Şuşada, Füzulidə, Zəngilanda və Cəbrayılda olması, xalqımıza dəstəyin əyani təzahürüdür.

Xoş gündə də, dar gündə də bir yerdə

Bu il fevralın 6-da baş verən iki ardıcıl dəhşətli zəlzələ zamanı Türkiyəyə ilk beynəlxalq yardımı Azərbaycan göstərdi. Prezident İlham Əliyevin tapşırığına əsasən, zəlzələ bölgəsinə dərhal yardım göstərilməsi ilə bağlı təxirəsalınmaz tədbirlər həyata keçirildi.

Türkiyədə baş vermiş dəhşətli zəlzələ ilə əlaqədar Prezident İlham Əliyevin təşəbbüsü ilə martın 16-da Ankarada Türk Dövlətləri Təşkilatının dövlət başçılarının fövqəladə Zirvə görüşü baş tutdu. Türkiyənin dünya texnika nəhəngi olduğunu sübut edən və bu il növbəti dəfə aprel ayında keçirilən "TEKNOFEST" çərçivəsində Azərbaycan dövlətinin zəlzələnin baş verdiyi Kahramanmaraş vilayətində inşa edəcəyi 1000 ev, məktəb, məscid və digər infrastruktur obyektlərindən ibarət yaşayış kompleksinin onlayn rejimdə təməlinin qoyulması da Azərbaycan və Türkiyə həmrəyliyinin növbəti nümunəsi oldu.

İyunun 3-də Ankarada Türkiyə Prezidenti Rəcəb Tayyib Ərdoğanın səlahiyyətlərinin icrasına başlama mərasimində Azərbaycan Prezidenti İlham Əliyev və birinci xanım Mehriban Əliyeva da iştirak etdilər. İnaqurasiya mərasimində diqqətçəkən vacib nüanslardan biri isə Rəcəb Tayyib Ərdoğanın Prezident İlham Əliyevə xüsusi diqqət və ehtiram göstərməsi oldu. İstər mərasim zalına daxil olan Rəcəb Tayyib Ərdoğanla ön cərgədə əyləşən Prezident İlham Əliyevin zalda alqışlarla qarşılanan səmimi görüşü, istərsə də Rəcəb Tayyib Ərdoğanın çıxışı zamanı "Dəyərli qardaşım, Azərbaycan Prezidenti xoş gəldin, təşəkkür edirəm", - deməsi özü iki qardaşın bir-birinə olan hörmət və ehtiramı, həm də iki qardaş ölkənin - Azərbaycan və Türkiyənin həmrəyliyinin təntənəli nümayişi idi.

Bəli, Azərbaycan-Türkiyə dostluq və qardaşlığı dünya üçün örnəkdir və bu sarsılmaz birlik gücünü "Bir millət, iki dövlət" və "Bir yumruq" fəlsəfəsindən alır.

Yasəmən MUSAYEVA,

Azərbaycan.-2023.- 8 iyun.- S.1;7.