Bakıda keçirilən kitab festivalına gənclər daha çox maraq göstərirlər

Xəbər verildiyi kimi, Milli Elmlər Akademiyasının parkında Beynəlxalq Türk Müəllifləri Birliyinin, Azərbaycan Yazıçılar Birliyi, Azərbaycan Respublikası Mədəniyyət Nazirliyi, Milli Məclisin Mədəniyyət komitəsi, Azərbaycan Milli Elmlər Akademiyası, Bakı Şəhər İcra Hakimiyyəti, Beynəlxalq Türk Mədəniyyəti və İrsi Fondu, Beynəlxalq Türk Akademiyası, TÜRKSOY, TÜRKPA, Yunus Əmrə İnstitutu, İLESAM və digər qurumların dəstəyi və təşkilatçılığı ilə Türk Dünyası Ədəbiyyat və Kitab Festivalı (II LitBookFest) keçirilir.

Tədbirdə ziyalılar, mədəniyyət və incəsənət xadimləri, ictimaiyyət nümayəndələri, ali və orta ixtisas məktəblərində təhsil alan gənc nəslin nümayəndələri fəal iştirak edirlər.

Tədbirin təşkilatçılarından Milli Məclisin Mədəniyyət komitəsinin sədri Qənirə Paşayeva, AMEA-nın prezidenti, akademik İsa Həbibbəyli, AMEA-nın Tarix İnsitutunun direktoru Kərim Şükürov, Xalq yazıçıları Anar, Çingiz Abdullayev, Xalq şairi Sabir Rüstəmxanlı, AMEA-nın vitse-prezidenti, akademik Dilqəm Tağıyev, AMEA-nın Məhəmməd Füzuli adına Əlyazmalar İnstitutunun baş direktoru, akademik Teymur Kərimli və başqaları çıxış edərək festivalın böyük söz bayramı olduğunu, türk xalqları arasında ədəbi-mədəni əlaqələri daha da gücləndirəcəyi və gənc nəslin türk dünyasının böyük şəxsiyyətlərini tanımasına yardım edəcəyini vurğuladılar.

Festival iştirakçısı - BDU-nun Psixologiya fakültəsinin üçüncü kurs tələbəsi Zərnişan Babayeva bizimlə söhbətində dedi: "Ölkəmizdə musiqi festivallarının, idman yarışlarının, eləcə də digər kütləvi tədbirlərin keçirilməsinə şahidlik etmişdim. Açığını deyim ki, ilk dəfədir belə möhtəşəm kitab festivalına qatılıram. İnanıram ki, Türkiyə Cümhuriyyətinin qurulmasının Ümummilli Lider Heydər Əliyevin anadan olmasının 100-cü ildönümlərinə təsadüf edən festivalın türk dünyasının sarsılmaz birliyinə, eyni mədəniyyətə, ədəbiyyata, tarixə malik olan türk dövlətlərinin əlaqələrinin daha da möhkəmlənməsinə öz töhfəsini verəcək, xalqlarımız arasında əlaqələri daha da möhkəmləndirəcək".

Bu isə Memarlıq və İnşaat Universitetinin birinci kurs tələbəsi Aqil Şıxəliyevin ürək sözləridir: "Tədbirə tələbə yoldaşlarımla birlikdə qatılmışam. Bunu tələbəlik həyatımın önəmli hadisəsi hesab edirəm. Festivalın keçirilməsi Türkiyə-Azərbaycan dostluq və qardaşlıq münasibətlərinin daha da möhkəmlənməsinə müstəsna təsiri olacağı şübhəsizdir. Eyni zamanda qeyd etməliyəm ki, belə tədbirlər gənclərin kitaba olan marağını daha da artırır. Mən və tələbə yoldaşlarım faydalana biləcəyimiz kitablar aldıq, respublikamızda və dünyada tanınan şair və yazıçılarla tanış olmaq imkanı qazandıq. Bir məsələni də qeyd edim ki, bura kitab almağa gələnlərin böyük əksəriyyəti gənclərdir. Bu da onu deməyə əsas verir ki, gənclərimizin kitaba marağı çoxdur".

İyunun 11-dək davam edəcək festival çərçivəsində təşkil olunan kitab yarmarkasında müxtəlif nəşriyyatlar iştirak edirlər. Festival hər gün bir ölkənin adı ilə - Azərbaycan, Türkiyə, Qazaxıstan, Qırğızıstan, Türkmənistan, Özbəkistan və Macarıstan günü kimi adlandırılır. Eyni zamanda müxtəlif elmi konfranslar, simpoziumlar, şeir saatları, imza günləri təşkil olunur. Builki festivalda ilk dəfə olaraq yay kinoteatrı formatında filmlərin nümayişi də gözlənilir.

E.QƏNİYEV,

Azərbaycan.-.- 8 iyun.- S.8.