Naftalanla Xorvatiyanın İvaniç-Qrad şəhərləri qardaşlaşıb

Xorvatiya Respublikasının İvaniç-Qrad və Azərbaycanın Naftalan şəhərləri arasında əməkdaşlıq xartiyası imzalanmışdır.

"Şəhər günü"nə təsadüf edən tədbirdə öncə Azərbaycan nümayəndə heyəti tədbir iştirakçıları ilə birlikdə Xorvatiyada Vətən müharibəsində həlak olan şəhidlərin xatirəsinə ucaldılmış abidəni ziyarət edərək önünə əklil qoymuşlar.

Sonra İvaniç-Qrad Şəhər Şurasının böyük zalında tədbir işini davam etdirmişdir. Şəhər fəallarının və Naftalan nümayəndə heyətinin- ŞİH başçısı Vüqar Novruzovun və ŞİH-in sektor müdiri Ülfət Əliyevin, Azərbaycanın Xorvatiyadakı səfirinin birinci katibi Zaur Abbasovun iştirakı ilə dostluq və qardaşlıq haqqında xartiya imzalanmışdır. Sənədi Azərbaycan tərəfindən Naftalan Şəhər İcra Hakimiyyətinin başçısı Vüqar Novruzov və Xorvatiya tərəfindən İvaniç-Qrad şəhərinin meri Javor Bojan Les imzalamışlar.

Mərasimdə qeyd edilmişdir ki, xartiyanın imzalanması şəhərlər arasında humanitar, mədəni və turistik əlaqələrin inkişafına və hər iki dost ölkənin sakinləri arasında münasibətlərin qurulmasına töhfə verəcək. Sonra qarşlıqlı xatirə hədiyyələri təqdim olunmuşdur.

Günün sonunda keçirilən ikitərəfli görüşdə Naftalan Şəhər İcra Hakimiyyətinin başçısı, İvaniç-Qrad şəhərinin meri, Zaqreb regional əyaləti rəhbərinin müavini Ervin Kolarec, Zaqreb regional əyalətinin Səhiyyə, Sosial Rifah və Xorvat Veteranları üzrə inzibati Departamentinin rəhbəri xanım Ksenija Culyak iştirak etmişlər. Görüşdə vurğulanmışdır ki, xartiyanın imzalanması xalqlarımızın daha da yaxınlaşmasına, oxşar dəyərlərin paylaşılmasına geniş imkanlar yaradacaqdır. Həmçinin görüşdə Naftalan və İvaniç-Qradın oxşar şəhərlər olması, iki şəhər arasında turizm sahəsində davamlı və faydalı əlaqələrin yaradılmasının əhəmiyyəti qeyd olunmuşdur. Sonda İvaniç-Qrad şəhərinin meri və nümayəndə heyəti Azərbaycana - Naftalan şəhərinə dəvət olunmuşdur.

Sabir ƏLİYEV,

Azərbaycan.-2023.- 14 iyun.- S.12.