İlham Əliyevdən Şərqi Zəngəzura böyük töhfə

Bölgənin ilk istehsalat müəssisəsi olan "Avto Lizinq Azərbaycan" azad olunmuş ərazilərin bərpası prosesinə mühüm texniki dəstək göstərəcək

Vətən müharibəsində işğaldan azad edilən Qarabağ və Şərqi Zəngəzur sürətlə bərpa olunur, bu torpaqlarda həyat canlanmağa başlayır. Artıq keçmiş məcburi köçkünlərin Zəngilanın Ağalı və Tərtərin Talış kəndlərinə, o cümlədən Laçın şəhərinə qayıdışı təmin edilib, bir sıra nəhəng infrastruktur layihələrinin icrası başa çatdırılıb.

Böyük qayıdışa dair müvafiq dövlət proqramına əsasən, 2023-cü il ərzində müxtəlif layihələrin icrası başa çatacaq, doğma evlərinə geri dönənlərin sayı daha da artacaq.

Prezident, Müzəffər Ali Baş Komandan İlham Əliyevin xüsusi diqqəti və nəzarəti ilə azad edilmiş ərazilərin bərpası prosesində diqqətçəkən bir məqam da ondan ibarətdir ki, quruculuq işləri məhdud sfera ilə kifayətlənməyərək kompleks xarakter daşıyır. Bu mənada işğaldan azad edilmiş ərazilərin iqtisadi potensialından səmərəli istifadə olunması və məşğulluğun təmin edilməsi məsələləri də diqqət mərkəzində saxlanılır. Bunun ən böyük nümunələrindən biri Cəbrayıl rayonu "Araz Vadisi İqtisadi Zonası" Sənaye Parkının yaradılmasıdır.

"Araz Vadisi İqtisadi Zonası" Sənaye Parkının ən böyük rezidenti isə "Avto Lizinq Azərbaycan" MMC-dir. Azərbaycan və Rusiya birgə müəssisəsi olan "Avto Lizinq Azərbaycan" MMC "KamAZ" ASC ilə "Gəncə Avtomobil Zavodu" İstehsalat Birliyinin əməkdaşlığının nəticəsi kimi ərsəyə gəlib.

Mövzu ilə bağlı "Gəncə Avtomobil Zavodu" İstehsalat Birliyinin Müşahidə Şurasının sədri Xanlar Fətiyevlə söhbətləşdik. Xanlar Fətiyevin sözlərinə görə, Müzəffər Ali Baş Komandan, Prezident İlham Əliyevin rəhbərliyi ilə işğaldan azad edilmiş ərazilərimizdə aparılan dinamik bərpa və quruculuq prosesi texniki xidmətlərə tələbatı da artırıb. Bu baxımdan bərpa işlərində yük avtomobilləri, habelə kənd təsərrüfatı texnikaları üçün "Araz Vadisi İqtisadi Zonası" Sənaye Parkında "KamAZ" ASC ilə "Gəncə Avtomobil Zavodu" İstehsalat Birliyinin birgə servis mərkəzinin yaradılması xüsusi əhəmiyyət daşıyır.

Xanlar Fətiyev qeyd etdi ki, Azərbaycanla Rusiya arasında münasibətlər iqtisadi sahədə də uğurla inkişaf edir. Azərbaycanın Rusiyanın ayrı-ayrı regionları, o cümlədən Tatarıstan Respublikası ilə səmərəli qarşılıqlı əməkdaşlıq münasibətləri var. Yük maşınlarının istehsalı üzrə dünyanın aparıcı şirkətlərindən olan "KamAZ"ın Cəbrayılda "Gəncə Avtomobil Zavodu" İstehsalat Birliyi ilə birgə servis mərkəzinin yaradılması bunun bariz göstəricisidir. Layihə 2021-ci ilin iyul ayında Rusiya şirkətləri nümayəndələrinin Azərbaycana işgüzar missiyası çərçivəsində "Gəncə Avtomobil Zavodu" İstehsalat Birliyi ilə "KamAZ" ASC arasında imzalanmış anlaşma memorandumuna uyğun olaraq "KamAZ" avtomobil zavodu ilə birlikdə həyata keçirilib.

Birgə servis mərkəzinin təməlinin 2021-ci il oktyabrın 4-də Prezident İlham Əliyevin iştirakı ilə qoyulduğunu deyən Xanlar Fətiyev bildirdi ki, həmin vaxtdan etibarən müəssisənin yaradılması istiqamətində intensiv işlər görülüb: "Serviz mərkəzi 3 hektarlıq ərazini əhatə edir. Mərkəz yük avtomobilləri və kənd təsərrüfatı texnikalarına xidmət göstərilməsi sahəsində hab rolunu oynayacaq. Mərkəzdə işğaldan azad olunmuş ərazilərimizdə istifadə olunan 1500-dək avtomobilə, həmçinin yüklərin daşınmasını həyata keçirəcək tranzit avtomobillərə və digər texnikalara peşəkar xidmət göstəriləcək".

Qeyd edək ki, mərkəzdə inşa edilən korpusda yük maşınlarına və kənd təsərrüfatı texnikalarına texniki xidmət sahəsi və ikimərtəbəli inzibati bina yerləşir. Texniki xidmət sahəsində 4 ədəd texniki baxış quyusu və asma kran var. Eyni zamanda təmir emalatxanasında çilingər, mühərriklərin, ötürücülər qutusunun, elektrik və akkumulyatorların, kompressorların, təkərlərin və digər detalların təmiri bölmələri yaradılıb. Burada pnevmatik və hidravlik qurğuların təmiri sahələri, daxili yanma mühərriklərinin yuyulması məntəqəsi fəaliyyət göstərəcək. Emalatxana müasir havalandırma sistemi ilə təchiz olunub.

Bununla yanaşı, mərkəzdə mobil təmir və texniki servis briqadaları da fəaliyyət göstərəcək ki, bu da işğaldan azad olunmuş ərazilərimizdə istifadə olunan bütün texnikalara yerində xidmət göstərməyə imkan yaradacaq.

Əsas korpusun daxilində ikimərtəbəli inzibati bina da tikilib. Binanın birinci mərtəbəsində qəbul şöbəsi, ehtiyat hissələri mağazası və anbarı, eləcə də yeməkxana fəaliyyət göstərir. Mərkəzdə avtotexnikaların təmirini gözləyən sürücülər də diqqətdən kənarda qalmayıb. Belə ki, inzibati binanın ikinci mərtəbəsində sürücülərin gecələməsi üçün mehmanxana tipli 10 otaq var. Otaqlar müasir havalandırma sistemi ilə təchiz olunub.

Servis mərkəzində, habelə qazanxana, su anbarı, nasosxana və avtoyuma məntəqəsi yaradılıb. Mərkəzdə 16100 kvadratmetr əraziyə asfalt örtük döşənib, istehsalat korpusunun ətrafına 1050 pm səki daşı düzülüb. Ərazidə yaşıllıq da yaradılıb, ağaclar əkilib. Mərkəzin ərazisində suvarma, isti və soyuq su, həmçinin yanğından mühafizə xətləri də çəkilib.

Xanlar Fətiyev onu da əlavə etdi ki, ümumi investisiya həcmi 10,2 milyon manat olan müəssisənin inşasına artıq 9,4 milyon manatdan çox investisiya yatırılıb. Müəssisənin fəaliyyətə başlaması məşğulluğun təmin edilməsinə də töhfə verəcək.

Xatırladaq ki, servis mərkəzinin təməlinin qoyulması mərasimində Rusiya Federasiyası Tatarıstan Respublikasının Baş nazirinin keçmiş müavini, hazırda Rusiyanın sənaye və ticarət nazirinin müavini vəzifəsində çalışan Albert Kərimov və "KamAZ" ASC-nin baş direktorunun müavini Rüstəm Şamsutdinov da iştirak edirdilər. Onların Cəbrayıla gəlişi həm də Füzuli Beynəlxalq Hava Limanında ilk xarici nümayəndə heyətinin qarşılanması kimi yadda qalmışdı.

Xanlar Fətiyevin sözlərinə görə, Azərbaycan dövləti və xalqımız Prezident İlham Əliyevin rəhbərliyi ilə özünün tarixi və şərəfli günlərini yaşayır və sözsüz ki, Qarabağın və Şərqi Zəngəzurun bərpası ilə bağlı qarşıya qoyulan vəzifələrin hər biri vaxtında icra olunacaq: "O cümlədən azad olunmuş bütün ərazilərimizin iqtisadiyyatı da bərpa ediləcək. "Avto Lizinq Azərbaycan" da bu istiqamətdə özünün töhfələrini verəcək".

Xatırladaq ki, "KamAZ" ASC-nin "Gəncə Avtomobil Zavodu" İstehsalat Birliyi ilə birgə layihəsinə 2014-cü ildə start verilib. Gəncədə "KamAZ"ın ilk partiyası 2015-ci ildə buraxılıb. İndiyədək Gəncədə 1000-dən çox "KamAZ" yığılıb.

Rəşad CƏFƏRLİ,

Azərbaycan.-2023.- 22 iyun.- S.1;4.