Müzəffər ordum mənim

Azərbaycan Silahlı Qüvvələri

Azərbaycan Ordusu - Vətənimizin xilaskarı! Çətin günlərdə elimizin arxası, xalqımızın güvənci! Azərbaycan Ordusu - müstəqilliyimizin etibarlı təminatçısı, xoşbəxt günlərimizin dayağı! Azərbaycan Ordusu - xalqımızın qüruru, zəfərimizin simvolu! Azərbaycan Ordusu - qələbəyə gedən yolun yorulmaz yolçusu! Azərbaycan Ordusu - xalqımızın görən gözü, vuran qolu! Azərbaycan Ordusu - xalqımızın heç vaxt sönməyən, şölələndikcə şölələnən sevgi ünvanı, işğal olunmuş torpaqlarımıza gedən qələbə karvanı!

Azərbaycan Ordusu, sən dərin-dərin səngərlərdə, qanlı-qadalı döyüşlərdə cəsarətinlə, hünərinlə, qəhrəmanlığınla erməni işğalçılarının qalın-qalın beton sədlərini dağıtdın, illərdən bəri əsirlikdə saxladıqları Qarabağa və Şərqi Zəngəzura gedən yolları açdın.

Azərbaycan Ordusu, sənin sıralarındakı Babək qeyrətli, Cavanşir hünərli, Nəbi cəsarətli, Koroğlu qüvvətli hərbçilərimiz 2020-ci ilin ilıq payız günlərində Müzəffər Ali Baş Komandanın rəhbərliyi altında 28 ildən çox davam edən işğala 44 gün ərzində son qoydular. Zabit və əsgərlərimiz döyüşlər zamanı dəqiq və sarsıdıcı zərbələrlə düşməni diz çökdürdü. "Vətən, torpaq, qələbə" - deyib döyüşə atılan şir biləkli oğullar düşmənin topundan, tüfəngindən qorxmadan mövqelərində möhkəm dayandı, qəsbkarlara güclü zərbələr vurduqca vurdu, işğalçını iti qovan kimi qovduqca qovdu.

Azərbaycan Ordusu, sənin sıralarındakı torpağını, yurdunu sevən və qoruyan hərbçilərimiz erməni işğalçılarının hücumlarının qarşısını almaq üçün: "Vətən, səni düşməndən azad edəcəyik!" - kəlmələrini hayqıra-hayqıra döyüşlərə atıldılar. Atıldılar ki, illərdən bəri işğalda qalmış yurdumuzu ermənilərdən azad etsinlər, uzandıqca uzanan qan qoxulu qəsbə son qoysunlar. Qələbə ovqatı ilə savaşa atılan döyüşçülərimizin hayqırtıları bir an içində yeri-göyü titrətdi, dünyanı lərzəyə saldı.

Azərbaycan əsgəri, Azərbaycan zabiti torpaqlarımızın azadlığı uğrunda döyüşlərə yollanarkən təkcə avtomatla, pulemyotla silahlanmamışdı. Bizə zəfər sevinci yaşadan döyüşçülərimiz qəhrəman babalarımızın ölməz ruhu ilə silahlanmışdı! Təntənəli surətdə içdiyi hərbi andla silahlanmışdı. Həmişə mənəvi güc-qüvvət aldığı hərbi marşlarla silahlanmışdı! Qəlbini parçalayan qisas, intiqam hissi ilə silahlanmışdı! 28 ildən çox ürəyini didib-parçalayan nifrətlə silahlanmışdı! Qaradağlı hirsi ilə, Xocalı, Bağanıs-Ayrım, Ağdaban, Başlıbel qəzəbi ilə, Şuşa naləsi ilə, "Qarabağ şikəstəsi" ilə, Xarıbülbül kədəri ilə, könülləri odlayan Vətən həsrətiylə, torpaq nisgiliylə silahlanmışdı! Şəhidlərin həsrəti ilə, qara yaylıqlı anaların, bacıların gözyaşları ilə silahlanmışdı. Zəfər, uğur, qələbə ovqatı ilə silahlanmışdı. Müzəffər Ali Baş Komandan İlham Əliyevin "Qarabağ Azərbaycandır!" kəlamı ilə silahlanmışdı! Cəsarət, hünər, əzmkarlıq, rəşadət, qəhrəmanlıq və vətənpərvərliklə silahlanmışdı! Müqəddəs amalla, pak vicdanla silahlanmışdı! Nəhayət, dönməzlik, məğlubedilməzlik, yenilməzliklə silahlanmışdı!

Azərbaycan əsgəri ürəyindəki aşıb-daşan Vətən sevgisi ilə ilıq bir payız günündə düşmən təxribatının qarşısını almaq üçün döyüşlərə zəfər əzmi ilə girdi, savaşa xalqına qələbə müjdəsi vermək yanğısı ilə qatıldı. Müharibə başlayan ilk anlardan, ilk günlərdən xalq sevimli ordusunun yanında oldu, ona arxa durdu. Bildi ki, Vətən bu sarsılmaz birliyin qüdrətindən qüvvət ala-ala azad olunacaq. Vətən xalqın gücü ilə Vətən olacaq, zəfər bu birlikdən doğulacaq. Vətənin azadlığı naminə xalq-ordu, xalq-Ali Baş Komandan birliyi daha da möhkəmlənəcək. Bu monolit birlik sel kimi kükrəyərək erməni işğalçılarını qabağına qatıb Qarabağdan və başqa ərazilərimizdən silib atacaq.

Qələbə əzmi ilə döyüşə girən Azərbaycan əsgəri qısa vaxtda üstünlüyü ələ alaraq torpaqlarımızı kənd-kənd, şəhər-şəhər erməni işğalçılarından azad etdi! Qəsbkarlar ordumuzun güclü əks-hücumları qarşısında çox dayana bilmədilər, canlı qüvvələrini, texnikalarını ataraq, ağır itkilər verərək qaçdılar. İşğalçıların məhv ediləcəyi, işğalın sona yetəcəyi gün qapımızı döyürdü. Çünki ordumuzun güclü əks-hücumlarından başını itirən düşmən nə edəcəyini, hara gedəcəyini, harada gizlənəcəyini bilmirdi.

İkinci Qarabağ müharibəsinin elə ilk günlərindən zabit və əsgərlərimiz döyüşlərdə böyük hünər və rəşadət göstərərək Cəbrayıla, Füzuliyə, Zəngilana, Qubadlıya qalibiyyət bayrağını sancdılar. Noyabrın 8-də isə şanlı Azərbaycan Ordusunun qəhrəman hərbçiləri cəsarət və hünərləri ilə tarix yazaraq üçrəngli bayrağımızı mədəniyyət beşiyimiz olan Şuşadan asdılar! O anları görmək, o anları yaşamaq necə də qürurverici idi.

Azərbaycan döyüşçüsü hünəri və cəsarəti ilə düşməni məğlubiyyət aktına imza atmağa məcbur etdi. Bu hünər, bu rəşadət, bu qəhrəmanlıq qarşısında duruş gətirməyib, çarəsiz duruma düşən qəsbkarın məğlubiyyət rəmzi olan ağ bayraq qaldırmaqdan başqa yolları qalmadı. Məhz şanlı Azərbaycan Ordusunun bütün cəbhəboyu qazandığı bir-birindən uğurlu zəfərlər sayəsində yağılar Ağdamdan, Kəlbəcərdən, Laçından döyüşsüz, bir güllə atmadan çıxmağa məcbur oldular.

Azərbaycan əsgəri bu qələbəni qanı, canı və qəhrəmanlığı ilə qazandı. İndi yavaş-yavaş illərdən bəri həsrətini çəkdiyimiz torpaqlarımıza qayıtmaq üçün ciddi hazırlıq işləri görülür. Böyük quruculuq işləri aparılır. Bu qayıdış əbədi-əzəlidir, həmişəlikdir.

Qürurverici faktlardan biri də odur ki, Vətən müharibəsində vuruşmuş zabit və əsgərlərin əksəriyyəti 1993-1994-cü illərdə doğma ocaqlarından didərgin düşmüş valideynlərin qolları üstündə çıxardıqları gənclərdir. Artıq onlar böyümüş, güclənmiş və qüvvətlənmişdilər, hərbi biliklərə və döyüş vərdişlərinə dərindən yiyələnmişdilər. Yurdumuzu işğal etmiş düşmənlə vuruşmağa, savaşmağa, ona qalib gəlməyə hazır və qadir idilər.

Onlar İkinci Qarabağ müharibəsində güclərini, bacarıqlarını düşmənlərə yaxşıca göstərdilər. Döyüşlərdəki zəfərləri, uğurları ilə qəsbkarları məhv etdilər. İşğalçılara heç vaxt yaddan çıxarmayacaqları məğlubiyyət dərsi keçdilər. Zabit və əsgərlərimiz hərb tariximizə yeni qəhrəmanlıq səhifələri yazdılar. Doğma torpaqlara zirehli texnikaların belində, əllərində silah qayıtdılar. Cəsarət və hünərləri ilə bütün dünyaya göstərdilər ki, bu ərazilər ermənilərin deyil, onların doğma torpaqlarıdır, illərdən bəri həsrətilə yaşadıqları ata-baba yurdlarıdır.

İnanırıq ki, Azərbaycan əsgərinin zəfərlə başa çatdırdığı döyüşlərdə qazandığı uğurlardan, göstərdiyi qəhrəmanlıqlardan yeni və daha abad, daha firavan, daha müasir Qarabağ və Şərqi Zəngəzur doğulacaq. Zaman keçdikcə bu əsrarəngiz yerlər cənnətə dönəcək. Şərqi Zəngəzurun, Qarabağın gözü qönçə-qönçə açılacaq, daim qaynayıb-coşan buz bulaqlardan torpaqlarımıza damcı-damcı nur saçılacaq, doğma ata-baba yurdlarında yeni-yeni zəfər gülləri açılacaq.

Bu gün Müzəffər Ali Baş Komandanımız məğrurdan məğrur, xalqımız və ordumuz qalibdən qalibdi. Bu gün ordumuz zamanın azadlıq və qəhrəmanlıq karvanına bənzəyir. Əminik ki, ümid və güvənc yerimiz olan bu karvan mənzil başına uğurla və sona qədər gedəcək. Heç yerdə ayaq saxlamayacaq, heç yerdə büdrəməyəcək. Erməni işğalında qalmış bütün tarixi torpaqlarımızı cəsarət və rəşadətlə azad edəcək. Qələbələri ilə xalqımızı daim sevindirəcək.

Bu gün xalqımız fərəhlə, qürurla deyir: "Mənim rəşadətli ordum, müzəffər ordum, sən hünərinlə düşmənin gözünü oydun, qəhrəmanlığınla tarixin səhifəsində dərin və pozulmaz izlər qoydun. Guya ki, məğlubedilməz hesab olunan erməni qəsbkarlarını cəsarətinlə, şücaətinlə diz çökdürdün. Dərin səngərlərdən keçərək, qanlı-qadalı döyüşlərdə ermənilərdən şəhidlərin intiqamını aldın. Göstərdiyin bu qəhrəmanlığa görə sən tarix durduqca yaşayacaqsan! Sən buna layiqsən, Azərbaycan Ordusu! Sən bunu cəsarətinlə, hünərinlə, qorxmazlığınla qazanmısan! Yaşa, Azərbaycan Ordusu, yaşa! Həmişə var ol! Xalqa sevinc bəxş edən qələbə, zəfər karvanın daim yollarda olsun!"

Vahid MƏHƏRRƏMOV

Azərbaycan.-2023.- 26 iyun.- S.7.