Qəri Counz: Azərbaycan enerji sahəsində geniş təcrübəyə malikdir

Ulu Öndər Heydər Əliyevin yaratdığı bir çox dəyərli ənənələr bu gün də yaşayır, xalqımıza faydalar gətirir və zamanın tələbi ilə daha da inkişaf edir.

Nümunə kimi ilk dəfə 1994-cü ilin mayında Ümummilli Liderin təşəbbüsü və təşkilatçılığı ilə keçirilən Beynəlxalq Xəzər Neft və Qaz Sərgisini də göstərmək olar. Ötən illər ərzində bu tədbir genişlənmiş, yeni-yeni sahələri əhatə etmiş və çoxsaylı iştirakçı toplamışdır. Buna müvafiq olaraq adını da dəyişmiş və artıq ikinci ildir "Bakı Enerji Həftəsi" adlansa da, məkanını və məramını dəyişməmişdir.

Tədbirin bir yeniliyi də yekunda ona evsahibliyi edən Azərbaycanın paytaxtından regionlarına da üz tutmasıdır. Belə ki, keçən il həftənin yekun tədbiri Şuşa şəhərində keçirilmişdir. Bu il 31 may-3 iyun tarixlərində keçirilən tədbirlər isə sonuncu gün Naxçıvan şəhərində xüsusi sessiya ilə tamamlanmışdır.

"Bakı Enerji Həftəsi"nin bu diyara "səfər"i təsadüfi deyildi. Tədbirin təşkilatçıları burada keçirilən sessiyanı "Heydər Əliyev İli"nə həsr etdilər. Bu da böyük məntiqi məna daşıyırdı. Çünki Naxçıvan Ulu Öndərimizin dünyaya göz açdığı məkandır. İştirakçılar və təşkilatçılar onu da yaxşı bilirdilər ki, Azərbaycanın yeni neft strategiyasının müəllifi Heydər Əliyevdir, o cümlədən sözügedən sərgi də onun yadigarlarındandır.

Bunları ölkəmizdə ən iri neft, qaz və ixrac layihələrinin əməliyyatçısı olan bp şirkətinin Azərbaycan, Gürcüstan və Türkiyə üzrə regional prezidenti Qəri Counz da vurgulamışdır. 2017-ci ilin əvvəlində Azərbaycana gəldiyi vaxtdan indiyədək bu gözəl ölkənin bir çox görməli yerləri və guşələri ilə tanış olduğunu demişdir. Naxçıvana ilk dəfədir səfər etdiyini və buralara valeh olduğunu bildirmişdir: "Sanki dünya sivilizasiyasının yarandığı yerlərdən birinə səfər etmişəm. Naxçıvanın qədim tarix və memarlıq abidələri haqqında çox eşitmişəm. Naxçıvanın çox qədim tarixi və özünəməxsus simvolikası var. O, həm də nadir təbiəti və zəngin mədəni irsi olan bir bölgədir. Azərbaycanın bir çox böyük mütəfəkkirləri, şairləri və yazıçıları əslən buradandırlar".

Naxçıvanın bu il bütün ölkədə anadan olmasının 100 illik yubileyi geniş qeyd edilən Ümummilli Lider Heydər Əliyevin doğulduğu yer kimi böyük bir irsin daşıyıcısı olduğunu vurğulayan Qəri Counz sözügedən sessiya üçün bu diyardan daha münasib yer təsəvvür edə bilmədiyini də diqqətə çatdırmışdır. bp rəsmisinin Azərbaycana və Heydər Əliyevə həsr etdiyi həmin çıxışından ayrı-ayrı hissələrlə oxucuları da tanış etmək istərdik.

Q.Counz: "Heydər Əliyevin liderliyi və fədakarlığı bu ölkədə öz silinməz izini qoyub. Onun xatirəsi Azərbaycan xalqı tərəfindən böyük ehtiramla yad edilir. Biz də bp-də bu böyük şəxsiyyəti dərin hörmət və minnətdarlıqla anırıq. Azərbaycanın müasir tarixi və yeni neft strategiyası Heydər Əliyevin uzaqgörənliyi sayəsində formalaşıb. O, haqlı olaraq hesab edirdi ki, ölkənin nəhəng karbohidrogen ehtiyatları onun iqtisadi və sosial inkişafında əsas amilə çevrilə bilər. O, həmin ehtiyatların işlənməsi üçün xarici investisiyaların və təcrübənin cəlb edilməsinin vacibliyini də bilirdi. "Azəri-Çıraq-Günəşli", Bakı-Tbilisi-Ceyhan və "Şahdəniz" kimi dünya səviyyəli enerji layihələrinin uğurla həyata keçirilməsi Heydər Əliyevin şəxsən iştirakı və güclü dəstəyi ilə mümkün oldu. Bu gün biz Ulu Öndərin öz xalqı üçün cızdığı strateji baş planının möhtəşəm nəticələrinin şahidiyik. Həmin meqalayihələrin fenomenal iqtisadi inkişaf üçün necə zəmin yaratdığını və Azərbaycanı müasir enerji mərkəzinə çevirdiyini görürük".

Bəli, bu gün Azərbaycan qlobal enerji oyunçusudur. Ölkəmizdə yeni enerji dövrünə keçid üçün də geniş imkanlar yaranıb. Yeri gəlmişkən qeyd edək ki, bp-nin regional prezidenti bunları da vurğulamışdır: "Ölkənin nəhəng neft və qaz ehtiyatları enerjiyə artan tələbatı qarşılamağa və təchizatın təhlükəsiz və əlçatan olmasını təmin etməyə imkan verir. Prezident İlham Əliyevin və Azərbaycan hökumətinin dəstəyi sayəsində ölkənin böyük enerji layihələri bütün maraqlı tərəflərə fayda gətirməkdə davam edir. İnanırıq ki, Azərbaycan yeni enerji dövrünə keçid prosesində də irəlidə gedə bilər. Çünki bunun üçün münasib olan hər cür şəraiti var. Azərbaycan qabaqcıl infrastruktura, güclü tərəfdaşlıq əlaqələrinə və enerji sahəsində geniş təcrübəyə malikdir. Ölkənin həmçinin zəngin bərpaolunan enerji resursları var. Xüsusən də Naxçıvan və Şərqi Zəngəzur kimi bölgələrdə. Bu ərazilər böyük günəş, geotermal, hidroenergetika və külək potensialı ilə seçilir. Bu rəngarənglik tam xalis sıfır enerji sistemi üçün ideal imkan yaradır. Azərbaycan da bu əraziləri nümunəvi "yaşıl zona"ya çevirmək niyyətindədir".

bp-nin indiyədək Azərbaycanın möhtəşəm enerji tarixinin bir hissəsi olmağından böyük qürur duyduğunu bildirən Qəri Counz demişdir: "Bundan sonra isə biz ölkənin enerji gələcəyinin formalaşmasına da dəstək verməyə hazırıq".

Flora SADIQLI,

Azərbaycan.-2023.- 26 iyun.- S.13.