Tarixlə müasirliyi, təbiətlə mətbəxi birləşdirən nədir

Hər bir insan işləməklə bərabər, istirahət etməyi də düşünür. Təbii ki, bu onun haqqıdır. Məzuniyyətə çıxanların bir qismi əsasən xarici ölkələrdə dincəlməyə üstünlük verirlər. On bir aylıq fasiləsiz işdən sonra səyahətə çıxmaq, dünyanın gəzməli, görməli yerlərini ziyarət etmək həm yaxşı ruh dincliyi, həm də başqa ölkə, xalq haqqında məlumat əldə etməkdir.

Məlumdur ki, ikiillik karantin şərtləri azərbaycanlıların istirahətlərini məhdudlaşdırmışdı. Sərhədlər bağlı olduğu üçün insanların xaricə getmək imkanları sıfıra enmişdi. Amma hava yolları açılandan sonra gəzmək, dincəlmək üçün yenidən fürsət yarandı. Bununla yanaşı, ölkə daxilində dincəlməyə, müalicə almağa üstünlük verənlər də az deyil. Quba, Qusar, Lənkəran, Qəbələ, Şəki, Şamaxı, Şabran, Nabran, Qax, İsmayıllı, Astara və digər regionlarımızın təkrarsız təbiəti, yerli mətbəxi daxili turizmin "əlindən tutduğu" üçün həmin yerlərə səyahət edənlər xeyli çoxalıb. Yaxın vaxtlarda Qarabağ və Şərqi Zəngəzur da turizm marşrutlarına əlavə olunacaq. Artıq turizm şirkətləri həmin istiqamətlərdə turlar təşkil etmək haqqında fikirləşirlər.

Bəs xarici ölkə vətəndaşları turist kimi Azərbaycanı seçməkdə nə qədər maraqlıdırlar? Öncə onu deyək ki, xeyli vaxtdır turizm Azərbaycanda iqtisadiyyatın ayrıca bir sektoru kimi formalaşıb. Bu gün dünyada turizm üzrə 148 ölkə arasında 39-cu yerdə qərarlaşan Azərbaycana maraq həddən artıq çoxalıb. Maraqlıdır ki, bunun kökündə işğaldan azad edilmiş Qarabağ və Şərqi Zəngəzura səyahət etmək arzusu da var.

Bununla belə, turistləri Azərbaycana əsas cəlb edən milli mətbəximiz, təbiətimiz, tarixi abidələrimiz və turizm infrastrukturudur. Paytaxtımızın da dünyanın ən gözəl şəhərləri sırasında olduğunu heç kim inkar edə bilməz. Bakının qədimdən qədim tarixi abidələri, müxtəlif memarlıq üslubunda tikilmiş binaları, parkları, İçərişəhəri, bənzərsizliyi ilə diqqət çəkən Dənizkənarı bulvarı hər kəsi heyran edir. Bizə qalan onlara gülərüzlə "Xoş gəldiniz" demək və normal xidmət etməkdir.

Xidmət demişkən, xarici turistlərə göstərilən xidmətin səviyyəsi ilə bağlı suala həmsöhbət olduğumuz Bakıdakı turizm şirkətlərindən birinin əməkdaşı Samirə Məhərrəmova belə cavab verdi:

- Qonaqları hava limanında qarşılayıb hotellərə yerləşdirmək, gəzməli, görməli məkanlara aparmaq və səyahət günləri bitəndən sonra yenidən hava limanına qaytarmaq əsas xidmətimizdir. Onların istək və arzularına uyğun olaraq bölgələrimizdəki mədəni, tarixi abidələr və dağ turizmi ilə tanış etmək, eləcə də nəqliyyat, ekskursiyalar, yemək və hotellə təmin etmək həmin xidmətə daxildir.

Azərbaycan turizminin əsas məqsədi haqqında danışan Samirə xanımın bu fikirləri də maraqlıdır: "İnsanları əyləndirmək, onlara təbiəti və qədim abidələri göstərmək, ölkəmiz haqqında geniş məlumat vermək və yeni məkanlar kəşf etmək imkanlarını təqdim edib ən yaxşı şərait yaratmaq turizmin əsas məqsədidir. Bəzən insanlar səyahətlə istirahət etməyi eyniləşdirirlər. Əgər Azərbaycana gələn turist gəzib görmək əvəzinə vaxtının çox hissəsini hoteldə keçirirsə, bunun adı istirahətdir. Turizmin kökündə mədəni və tarixi abidələrin öyrənilməsi, ekoloji aləm haqqında məlumat əldə edilməsi, kulinariyanın növlərinə maraq göstərilməsi dayanır. Bizim şirkət Azərbaycana turist gətirilməsi ilə məşğul olur. Xaricilər ən çox Qəbələ, Şəki, Nabrana getmək istəyirlər. Yay fəsli olduğu üçün hazırda çimərlik turizminə böyük maraq var. Bu da Nabrana getmək istəyən turistlərin sayının artmasına təsir edir. Xüsusi vurğulamaq istəyirəm ki, son illər bölgələrə səyahət etmək istəyənlərin sayı durmadan artır. Çünki regionlarımızda turizm infrastrukturu təzələnir. Bir vaxtlar qaz, su, elektrik təchizatında problemi olan rayonlarda indi bu hallar demək olar yoxdur. "Şahdaq" qış-yay turizm kompleksi bir dəfəyə 5 min turisti qəbul edə bilir. Qəbələdəki qolf meydançasına görə ora gedən turistlərin də sayı çoxdur. Bakının tarixi yerləri isə hələ də turistləri özünə cəlb edir. Çox maraqlıdır ki, Yaxın Şərq ölkələrindən gələn turistlər Qəbələyə üstünlük verirlər. Şimal-Şərqi Asiya ölkələrindən gələn turistlər isə daha çox Şəkiyə üz tuturlar. Yeri gəlmişkən, onu da deyim ki, Azərbaycanın hazırkı sürətli inkişafı xarici iş adamlarında çox böyük maraq yaradıb. Onlar turist kimi gəlsələr də, ölkəmizə sərmayə qoymaq istəyirlər. Bilirlər ki, Azərbaycan iqtisadiyyatı durmadan güclənir. Hansı ölkənin iqtisadiyyatı güclüdürsə, ora maraq da çox olur. Bu səbəbdən də Azərbaycana bugünkü axın turizmin yaxın illərdə daha çox güclənəcəyinə imkan yaradacaq. Çünki vətənimizdə 11 iqlim tipindən 9-nun olması onu dünyanın başqa ölkələrindən fərqləndirir. Fərqlilik həm də bizdə qış xizək turizmindən tutmuş, çimərlik kurort turizminə kimi müxtəlif turizm növlərinin inkişaf etməsidir. Xarici turistləri cəlb edən Naxçıvanın duz dağı, Qobustanın qoruğu, Abşeronun Yanar dağı, palçıq vulkanları, Naftalanın nefti Azərbaycan turizminin üstünlükləridir".

Samirə xanımla söhbətimizdən məlum oldu ki, pandemiyadan sonra Azərbaycana səfər edən turistlərin sayında artım müşahidə olunur. Xüsusilə də Yaxın Sərq və Şimal-Şərqi Asiya ölkələri olan Birləşmiş Ərəb Əmirliklərindən, Türkiyə, İsrail, Misir, Yaponiya, Cənubi və Şimali Koreyadan gələnlər ilk sıralardadır.

"Turistlər tur paketlərlə gəlir, yoxsa fərdi gələnlər çoxdur?" sualımıza həmsöhbətimiz belə cavab verdi:

- Tur paketlə gələnlər üstünlük təşkil edirlər. Türkiyə, Kipr, İsraildən gələnlər əsasən ailə üzvləri və dostlarla səyahət etməyi xoşlayırlar. Yaponiya, Koreya, Rusiyadan olan turistlər isə, adətən, fərdi gəlirlər. Onu da deyim ki, birincilər daha çox pul xərcləyirlər. İkincilərin marağında isə mədəni irsimiz, tarixi abidələrimiz olduğu üçün birincilərdən fərqli olaraq nəqliyyat vasitəsi və gecələmə yeri onlar üçün prioritet deyildir. Təbii ki, belə halda çox pul xərcləməyə də gərək olmur.

Züleyxa ƏLİYEVA,

Azərbaycan.-2023.- 26 iyun.- S.15.