Qaliblər məktəbi

8 Mart Beynəlxalq Qadınlar Günüdür

…Özümü başqa bir aləmdə hiss edirdim. Sanki sözün sehrinə düşmüşdüm. Südabə müəllim danışdıqca xəyalım məni uşaqlığıma, əlimə ilk dəfə çanta alıb məktəbə getdiyim günlərə aparır. Atadan, anadan sonra yalnız müəllim şagirdinin uğuruna belə sevinə bilər. Yeganə peşə sahibləri müəllimlərdir ki, övladları qədər də şagirdləri ilə fəxr edirlər. Şagirdlərinin uğurunu öz uğurları bilirlər.

Ürəyimdən yalnız bir hiss keçirdi, kaş ki, Südabə müəllim söhbətini kəsməyəydi. Almayaydı məni uşaqlığımın əlindən… O, danışdıqca bir Şərq müdrikinin "elə adamlar axtarın ki, onlarla söhbət yaxşı kitaba bərabər olsun. Elə kitablar da axtarın ki, mütaliəsi filosoflarla söhbətə dəysin" kəlamını xatırlayıram.

Özündən, övladlarından, uşaqlığından, gəncliyindən danışmırdı Südabə müəllim... Qəndabdan danışırdı... O, Qəndabdan ki ABŞ-nin Texas Ştatıının Houston şəhərində keçirilən Fizika və Astronomiya fənləri üzrə Global Copernicus Olimpiadasının Azərbaycandan yeganə təmsilçisi, dünya üzrə öz kateqoriyasına görə top üçlüyə düşərək vətənimizə qızıl medal gətiribdi.

Südabə müəllim deyir ki, fizika müəllimiyəm. Qəndab özümün yetişdirməmdir. Onun uğurlarını yalnız 279 saylı məktəbin uğuru hesab etmirəm. Bu, Azərbaycanımızın uğurudur, müasir gəncliyin uğurudur. Məktəbimizdə Qəndab kimi gənclərin sayı çoxdur. Məzunlarımız hər il respublikamızın və dünyanın ən nüfuzlu məktəblərinə qəbul olunmaqla bizi sevindirirlər. Təsədüfi deyil ki, ali məktəbə qəbul göstəricisinə görə hər il respublika üzrə ilk üçlüyə düşürük. Bu göstəricilərə heç də asanlıqla nail olmamışıq. Gərgin əmək, ciddi nizam-intizam, tələbkarlıq, müəllimlərimizin öz üzərlərində ciddi çalışmaları və ən başlıcası da inamın hesabına əldə olunub. Məktəbimizdə çox gözəl bir mühit var. Müəllim-şagird tandemi yarada bilmişik. Müəllimlərimiz şagirdlərə ilk növbədə özünə inam hissi aşılayırlar. Özünə inanan şagird müəlliminə güvənər, onu elmin zirvəsinə apara bilər.

Südabə Abdullayeva (Şərifova) illərin pedaqoqudur. 60 illik ömrünün 38 ilini pedaqoji fəaliyyətə həsr edib. Südabə müəllim deyir ki, insan gərək öz peşəsini sevsin: "Nəsrəddin Tusi adına ADPU-nin Fizika fakültəsini bitirmişəm. 1985-ci ildən müəllim işləyirəm. Hər gün əlimə jurnal alıb sinifə girəndə ilk dərs dediyim günün həyəcanını yaşayıram. Dərsdən əvvəl mövzuya ciddi hazırlaşıram. 2018-ci ildən 279 saylı məktəbdə direktor işləyirəm. Rəhbərlik etdiyim kollektivin müəllimlərinə də deyirəm ki, müəllim gərək daim axtarışda olsun, yeniliklərə qapı açmağı bacarsın".

Südabə İbrahim qızı Abdullayeva 1963-cü ildə Bakının Əmircan kəndində çoxuşaqlı ailədə anadan olub. Anası evdar qadın, atası neftçi idi.

- Ailədə 10 uşaq idik. Atam bizə həmişə ədalətli olmağı, halal yaşamağı bacarmağı, vicdanlı, ədalətli olmağı tövsiyə edərdi. Atam deyərdi ki, vicdan insanın ruhudur, Allahıdır. Elə yaşayın ki, sizi barmaqla göstərsinlər. Başqalarına nümunə ola biləsiniz. Fizikanı isə bizə böyük qardaşım Mövsüm sevdirib. Hamımız Mövsümə oxşamağa, onun yolu ilə getməyə çalışmışıq. Elə bu səbəbdən də bütün bacı- qardaşlarımız fizika və riyaziyyat müəllimi olub.

Suraxanı rayonunun Yeni Günəşli qəsəbəsində yerləşən 279 saylı məktəbdəyik. Məktəbdəki səliqə-sahman, gözəllik gözoxşayır. Bura orta məktəbdən çox botanika bağına bənzəyir. Məktəbin dəhlizini insanın qəlbinə riqqət, könlünə gözəllik gətirən müxtəlif növ güllər bəzəyir. Məktəbdə müəllim və şagirdlərin yetişdirdiyi 2 mindən çox dibçək gülü var. Divarlara şagirdlərin çəkdikləri rəsmlər isə bir ayrı gözəllik verir. Məktəbdə "kitab mənim dostumdur" layihəsi həyata keçirilir. Öyrənirik ki, 279 saylı məktəb bu il Elm və Təhsil Nazirliyinin yaratdığı T-Netvorq Təhsil İşçilərinin İnformasiya və Kommunikasiya platformasının keçirdiyi "Təhsilin Ulduzu" müsabiqəsinin qalibi olub. Diqqətçəkən daha bir məqam dəhlizlərin divarlarında kitabxanaya yeni daxil olmuş ədəbiyyatların şəkilləri yerləşdirilməsidir. Şagirdlər oxuduqları kitablardakı personajların şəkillərini divarlara çəkir, texnologiya dərslərində yun saplarla toxunub hazırlanmış əşyalar dəhlizin divarlarında "Sagirdlərimizin əl işləri" guşəsində yerləşdirilir. Məktəbdə "Mütaliə otağı" yaradılıb, otağın divarlarında əsər qəhrəmanlarının şəkilləri, "Düşünən oxucu" guşəsi, "Kitab oxumaq qaydaları", "Hansı formada oxumaq lazımdır?" tabloları yerləşdirilib.

279 saylı məktəbdə şagirdlərin vətənpərvərlik ruhunda böyümələri üçün vətənpərvərlik tərbiyəsinə ciddi önəm verilir, buna olduqca həssas yanaşılır. Dəhlizlərdə Zəfər guşəsi, Laçın guşəsi, milli dəyərlərimiz, adət- ənənələrimiz başlığı altında guşələr yaradılıb. 2020-ci ildən məktəbin ənənəvi zəngi dəyişdirilərək Xudayar Yusifzadənin təsnifi ilə əvəz edilib.

Suraxanı rayonundan Qarabağ savaşında 61 nəfər qəhrəmancasına döyüşərək şəhidlik zirvəsinə yüksəlib. Bütün siniflərdə şəhidlər haqqında xüsusi guşələr yaradılıb, siniflərə şəhidlərimizin adları verilib. Məktəbin şagirdləri şəhidlərin anım və doğum günlərində məzarlarını ziyarət edib, ailələri ilə əlaqə saxlayırlar.

Südabə müəllim deyir ki, pedaqoji kollektiv olaraq üzərimizə düşən yükün ağırlığını yaxşı dərk edirik. Çalışırıq ki, daha bacarıqlı nəsillər yetişdirmək üçün fərdi müxtəliflikləri nəzərə alan təhsil mühiti yaradaq. Siyahıda birinci olmaq bütün bacarıqlara sahib olmaq demək deyil. Məktəblərdə keçirilən imtahanlarda əldə edilən nəticələr qiymətləndirmə standartlarında nəzərdə tutulan bacarıqları əks etdirməlidir. Məktəb müəllimlərin enerjisini və motivasiyasını qiymətləndirmə fəaliyyətindən çox, keyfiyyətli təlimə istiqamətləndirməlidir. Məktəb keyfiyyətli tədrisin məsuliyyətini daşıyan bir qurumdur. Öncə tədrisin keyfiyyəti, sonra isə ölçmə gəlir. Əsaslı bir təhsil sistemində yetişmiş fərdlər bütün imtahanlardan uğur əldə edir. Bütün bunlara şagirdlərin şəxsiyyətyönlü formalaşması ilə nail olmaq olar. Məqsədimiz budur ki, milli şüura malik, tədqiqatçı, dərin düşüncəli, yaradıcı və innovativ, akademik biliyi bacarığa çevirə bilən, hər bir işin faydalı iş əmsalını tapa bilən, kreativ düşüncəli fərdlər yetişdirə bilək. Bununla da cəmiyyətin texnoloji, sosial-iqtisadi və mədəni səviyyəsinin yüksəldilməsinə töhfə verək.

Südabə Abdullayeva peşəkar rəhbər, mükəmməl pedaqoq, bacarıqlı təhsil təşkilatçısı olduğu kimi, həm də nümunəvi anadır. Bu vətən, dövlət üçün iki ləyaqətli övlad yetişdirib. Pedaqoji fəaliyyətdən başqa içtimai işlərdə də yaxından iştirak edir. Südabə müəllim deyir ki, ən yaxın dostum, köməkçim, sirdaşım, ömür-gün yoldaşım Vasifdir. Onun fikrincə, müəllim gərək bütün xüsusiyyətlərinə görə cəmiyyət üçün bir örnək olsun. Daxili dünyası, əxlaqı, milli-mənəvi xüsusiyyətləri ilə seçilsin. Tək bilikli olmaqla yaxşı müəllim, yaxşı vətəndaş olmaq mümkün deyil. Müəllimin ailəsi, övladları da gərək əxlaqi dəyərlərə verdiyi qiymətlə və ən başlıcası, davranışı ilə seçilsin.

Südabə müəllim ilə söhbət etdikcə ürəyi vətən üçün, xalq üçün döyünən bir insanın portreti, onun ürəyinin ən incə duyğuları gözlərimiz önündə canlanır. Vətənini, dövlətini fədakarcasına sevən, onun gələcəyi üçün gecəsini gündüzünə qatan, daim axtarışda olan, təşəbbüskarlığı ilə seçilən tam bir insan obrazı yaranır. O, danışdıqca sanki gələcəyimiz üçün döyünən bir ürəyin kaman naləsinə bənzər yanıqlı səsini dinləyirsən. Təcrübəli pedaqoq Südabə Abdullayeva düşünür ki, dünyada artan rəqabətə davam gətirə bilmək üçün iqtisadiyyatın uzunmüddətli inkişafı müasir və güclü təhsilə arxalanmalıdır. Məhz təhsil vasitəsilə insan kapitalının milli sərvətdə iştirak payı davamlı şəkildə artırılmalıdır. Strateji dövrdə kompetensiya, sosial vərdişlər və bacarıqların harmoniyada inkişafına əsaslanan "ömür boyu təhsil"ə xüsusi önəm verilməlidir. Erkən və məktəbəqədər təhsilin əhatə dairəsi genişlənməli və mərhələlərlə müvafiq yaşda olan bütün uşaqları əhatə etməlidir.

Südabə Abdullayeva bir pedaqoqun, bir müəllimənin ala biləcəyi bütün qiyməti, mükafatları alıb. Ən böyük mükafatı isə şagirdlərinin məktəbə gətirdikləri qızıl, gümüş medallar, qazandıqları uğurlar olduğunu deyir. "Məktəbimizin yetişdirmələri haradasa bir uğur qazananda, onların valideynləri, yaxınları zəng edib, məktəbimizə gəlib bizi təbrik edəndə bu illərimi boş yerə sərf etmədiyimə sevinirəm. Peşəmlə iftixar duyuram. Bir müəllim üçün məncə bundan böyük mükafat ola bilməz".

Biz 279 saylı məktəbdə olarkən bir ömür kitabının çox az bir hissəsini vərəqləyə bildik. Oxuduqca öyrəndik, dinlədikcə düşündük. Belə qənaətə gəldik ki, Tanrının verdiyi ömür payını belə yaşayarlar...

Elşən QƏNİYEV

Azərbaycan.- 2023.- 8 mart.- S.7.