Bakı növbəti mötəbər tədbirə evsahibliyi etdi

Ölkəmiz qlobal problemlərin müzakirə olunduğu mərkəzdir

Martın 9-dan başlayan "Dünya bu gün: Çağırışlar və ümidlər" mövzusunda X Qlobal Bakı Forumu uğurla başa çatdı. Forum çərçivəsində panel iclaslarında yeni dünya nizamına təhdid yaradan amillərə, o cümlədən təhlükəsizlik məsələsinə və sülhün təmin olunması üçün perspektivlərə nəzər salındı. Eyni zamanda qarşıda duran çağırışların həlli yolları müzakirə olundu, dünyanı sarsıdan münaqişələrə, o cümlədən iqlim, qida və nüvə təhlükəsizliyi məsələlərinə toxunuldu, postpandemiya dövründə görüləcək işlər, yeni səhiyyə sisteminin formalaşdırılması barədə fikir mübadiləsi aparıldı.

Prezident İlham Əliyev qlobal ümidləri doğrulda bilən platforma formalaşdırıb

Milli Məclisin deputatı Bəhruz Məhərrəmov qəzetimizə açıqlamasında X Qlobal Bakı Forumunun əhəmiyyətinin elə öz adında ifadə olunduğunu bildirib. Bu gün dünyada müasir çağırışları cavablandıran və ümidləri doğrultmağa istiqamətlənən beynəlxalq platformaların mövcudluğundan söz açan deputat qısa müddət əvvəl Münhendə və Davosda nəhəng və uğurlu siyasi müstəviyə şahidlik etdiyimizi xatırladıb: "Amma bu platformalar sülh və təhlükəsizliyə yönəlik fəaliyyət ortaya qoya bilirmi, yaxud belə niyyət, ümumiyyətlə, mövcuddurmu? Təəssüf ki, bu gün qlobal müstəvidə dialoq platformalarının hamısı qütbləşmə siyasətinə qurban gedib. Elə Münhendə də, Davosda da konkret olaraq bir qütbün müdafiəsi və digər tərəfə doğru ittiham ritorikası hakim idi. Həmçinin təşəbbüslər daha çox qarşı tərəflə sülhə yox, onun məğlub edilməsi üçün səylərin birləşdirilməsinə yönəlmişdi".

B.Məhərrəmov vurğulayıb ki, fəaliyyət dairəsinə əsasən iştirakçıların sayının ildən-ilə artması fonunda Prezident İlham Əliyev Bakı Qlobal Forumunun timsalında dünyada çağırışları cavablaya, qlobal ümidləri doğrulda bilən, ehtiyac duyulan platforma formalaşdırıb. Digər tərəfdən, Bakı Forumunda özünü doğrultmuş, qlobal müstəvidə qəbul edilən insanların - sabiq dövlət və hökumət rəhbərlərinin və hazırda dövlət və hökumət başçıları olan, xarici siyasətə, parlamentə rəhbərlik edən şəxslərin cəmləşməsi, əslində, bu müstəvini çağırış və ümidləri təhlil etmək üçün ən doğru beyin mərkəzinə çevirir. Prosesə Azərbaycanın öncüllük etməsinə gəlincə, bu məqam heç kimdə sual doğurmur. "Reallıqdır ki, Azərbaycan dövləti özü bir nümunə yaratmış beynəlxalq subyektdir. Biz BMT-nin Təhlükəsizlik Şurasının qətnamələrini cənab İlham Əliyevin rəhbərliyi altında özümüz hərbi-siyasi yolla icra etmişik. Habelə dövlət başçımız Qoşulmama Hərəkatını ətalətdən qlobal təşkilatlanmaya doğru aparan ciddi və nüfuzlu liderdir. Sirr deyil ki, Prezident İlham Əliyevin rəhbərlik dönəminə qədər dünyanın ikinci böyük təsisatı olmasına baxmayaraq, Qoşulmama Hərəkatının fəaliyyətində hansısa fövqəladə, çevik qərarların şahidi olmamışdıq".

Deputat əlavə edib ki, Hərəkat pandemiya ilə mübarizədə qlobal səyləri birləşdirib, postpandemiya və qütblərin toqquşması dövründə isə yeni çağırışlara liderlik edən və təşkilatlanmaya doğru gedən təsisata çevrilib. Təbii ki, ortaya belə bir siyasi-diplomatik təcrübə qoyan ölkənin evsahibliyi etdiyi Qlobal Bakı Forumuna marağın artması, gözləntilərin olması başadüşüləndir.

Azərbaycanın beynəlxalq arenada böyük gücə malik olmasının növbəti təsdiqi

Milli Məclisin deputatı Rəşad Mahmudov qeyd edib ki, Prezident İlham Əliyevin mükəmməl diplomatik gedişləri ölkəmizin həm regional, həm də dünya miqyaslı nüfuzunu artırmaqdadır.

Deputatın sözlərinə görə, bu gün dövlətlər, müxtəlif siyasi qurumlar, beynəlxalq təşkilatlarla qurulan yüksək münasibətlər və Prezident İlham Əliyevin dünyada qəbul olunan yüksək nüfuzu Azərbaycanı bütövlükdə dünya siyasətinin reallaşmasında mühüm iştirakçıya çevirib. Bütün bunların nəticəsidir ki, Bakı ardıcıl olaraq bir neçə beynəlxalq tədbirə evsahibliyi edir. Qoşulmama Hərəkatının son sammitindən sonra Nizami Gəncəvi Beynəlxalq Mərkəzinin təşkilatçılığı ilə martın 9-da keçirilən "Dünya bu gün: Çağırışlar və ümidlər" mövzusunda X Qlobal Bakı Forumu da bu baxımdan mühüm önəm daşıyır.

Prezidentin forumda çıxışından söz açan Rəşad Mahmudov bildirib ki, dövlət başçısı haqlı olaraq həmsədrlərin, bütün idarə heyətinin düşünülmüş və səmərəli fəaliyyətinin nəticəsi kimi Bakı Qlobal Forumunun iştirakçılarının təmsilçilik səviyyəsinin və intellektual potensialının aparıcı beynəlxalq konfranslara uyğun olduğunu qeyd edib: "Cənab Prezident həmçinin qeyd etdi ki, dünya hazırkı şəraitdə soyuq müharibənin bitməsindən sonra Şərq-Qərb qarşıdurmasına şahidlik edir. Bütün problemlərin fonunda Qoşulmama Hərəkatı münaqişələrin həllində, yeni yanaşmaların formalaşdırılmasında mühüm rol oynaya bilər. Ölkə rəhbəri münaqişələrin yaranmasından, onun həlli yollarından danışaraq diqqəti Ermənistanın ölkəmizə qarşı həyata keçirdiyi hərbi təcavüzə yönəltdi və işğal nəticəsində Azərbaycanda humanitar fəlakətin yarandığını, bir milyondan artıq azərbaycanlının öz ölkəsində qaçqın və məcburi köçkünə çevrildiyini, rəsmi İrəvanın azərbaycanlılara qarşı etnik təmizləmə siyasəti apardığını vurğuladı. Prezident həmçinin münaqişəni sülhlə aradan qaldırmağı və erməni silahlılarının Azərbaycan ərazilərindən dərhal, tam və qeyd-şərtsiz çıxarılmasını tələb edən BMT-nin Təhlükəsizlik Şurasının qətnamələrinə işğalçı ölkənin məhəl qoymamasını, beynəlxalq hüquqa nümayişkaranə şəkildə hörmətsizlik etdiyini də diqqətə çatdırdı".

R.Mahmudov Prezident İlham Əliyevin Nizami Gəncəvi Beynəlxalq Mərkəzinin bundan əvvəl reallaşan forumundan ötən müddətdə bir sıra önəmli iqtisadi hadisələrin baş verdiyini, Azərbaycan və Avropa Komissiyası arasında enerji sahəsində imzalanan anlaşma memorandumunun hazırda uğurla icrasından söz açdığını xatırladıb: "Prezident İlham Əliyev çıxışında ötən ilin dekabrında Buxarestdə Azərbaycan, Gürcüstan, Macarıstan və Rumıniyanın Avropa Komissiyası sədrinin iştirakı ilə "yaşıl enerji"nin ötürülməsinə dair saziş imzalandığını da bildirdi. Ölkə rəhbəri həmin saziş əsasında Azərbaycandan Avropaya dənizdəki külək enerjisi stansiyalarından xəttin çəkiləcəyini, həmin ötürmə xəttinin bir hissəsinin Qara dənizin dibi ilə aparılacağını və bununla bağlı hazırda respublikamızda texniki əsaslandırma prosesinin reallaşdırıldığını iştirakçıların diqqətinə çatdırdı".

O qeyd edib ki, X Qlobal Bakı Forumu Azərbaycanın həm iqtisadi, həm də siyasi baxımdan beynəlxalq arenada böyük gücə malik olduğunu bir daha təsdiqlədi. Prezident İlham Əliyevin həm bu mötəbər tədbirdə çıxışı, həm də forum iştirakçısı olan nüfuzlu siyasətçiləri qəbul edərkən söylədiyi fikirlər ölkəmizin öz maraqlarını təmin etmək gücündə olduğunu göstərdi.

Əsmər QARDAŞXANOVA,

Azərbaycan.- 2023.- 12 mart.- S.6.