Korrupsiyaya bulaşmış Avropa Parlamenti

Bu nüfuzdan düşmüş beynəlxalq təşkilatın Azərbaycana qarşı qərəzli münasibəti, ermənipərəst mövqeyi dəyişmir ki, dəyişmir

İkinci Qarabağ müharibəsindəki qələbəmizdən sonra Avropa Parlamentinin Azərbaycana qarşı qərəzli yanaşmasının, ədalətsiz, əsassız qətnamələrinin şahidi oluruq. Humanizmdən, ədalətdən danışan AP-nin özü bu dəyərləri açıq-aşkar heçə sayır. Bu təşkilat həqiqətən də Hayastanın oyuncağına çevrilib, hayların göstərişləri, müraciətləri əsasında hərəkət edir. Bununla da ermənipərəst mövqeyini ortaya qoyur.

Avropa Parlamentinin növbəti dəfə Azərbaycana qarşı obyektivlikdən və reallıqdan uzaq, böhtan xarakterli qətnamə qəbul etməsi təşkilatın riyakar siyasətindən bir daha xəbər verdi. Qərəzli qətnaməsi ilə AP Azərbaycanın sülhə nail olmaq səylərini qəsdən gözdən salmağa, Cənubi Qafqazda təhlükəsizliyin təmin olunmasına əngəl törətməyə çalışır.

Amma həqiqət budur: qərəzli mövqeyə əsaslanan əsassız kağız parçaları Avropa Parlamentini nüfuzdan salmaqdan başqa bir işə yaramır.

Avropa Parlamenti Hayastanın himayəçisi kimi davranır

Milli Məclisin deputatı Fəzail Ağamalı qəzetimizə açıqlamasında qeyd edib ki, Avropa Parlamenti xristian klubu kimi uzun illərdir Azərbaycana qarşı qərəzli, böhtan xarakterli əməllər sərgiləyir. Burada moderator kimi Fransa çıxış edir. Son dövrlərdə dünya mətbuatını zəbt edən korrupsiya halı Avropa Parlamentinin imicinə ağır zərbə vurub.

Deputat vurğulayıb ki, AP belə biabırçı fakta görə bütün Avropa, eləcə də Azərbaycan xalqından üzr istəmək və qəbul etmiş olduğu qərəzli qətnamələrdən dolayı ölkəmizə qarşı münasibətini obyektiv və ədalətli şərtlər üzərində yenidən qurmaqdansa, hələ də öz çirkin mərəzini davam etdirir və Hayastanın himayəçisi kimi fəaliyyətinə son qoymaq istəmir: "Onların qəbul etdiyi qətnamələr qərəzlidir. Parlamentin fəaliyyətində islamofobiya, türkofobiya var. Avroparlamentarilər Hayastanı - vandal ölkəni himayə edərək Azərbaycana qarşı barışmaz mövqe nümayiş etdirirlər. Bu qətnamələr kağız parçasından başqa bir şey deyil. Bu, Azərbaycanın Avropa İttifaqı ölkələri və digər Avropa dövlətləri ilə yüksəksəviyyəli münasibətlərinə hər hansı təsir göstərmək gücündə deyil".

Prezident İlham Əliyevin xarici siyasətində Avropa amilinin xüsusi yer tutduğunu vurğulayan Fəzail Ağamalı deyib ki, istər Aİ-nin təmsilçiləri, istərsə də ayrı-ayrı dövlətlərin prezidentləri, baş nazirləri səviyyəsində münasibətlərimiz yüksək səviyyədə qurulub. Avropa ölkəsi ilə aramızda ciddi sənədlər imzalanıb. Bu gün Azərbaycan Avropanın enerji təhlükəsizliyinin təmin edilməsində olduqca mühüm rol oynayır və bu, Avropa dövlətləri tərəfindən də təsdiqlənir. Belə bir zamanda müxtəlif Avropa ölkələrini təmsil edən AP-nin deputatları tərəfindən bu cür qətnamənin qəbul edilməsi təəssüf doğurur.

Deputat hesab edir ki, bu ədalətsizliyə, haqsızlığa, böhtana qarşı fəaliyyətimizi, mübarizəmizi təkcə daxili deyil, həm də Avropa auditoriyası üçün genişləndirməliyik: "Ən müxtəlif bəhanələrlə Azərbaycana qarşı əsası olmayan növbəti qətnamə qəbul edildi. BMT-nin Təhlükəsizlik Şurasında və onun müxtəlif qurumlarında fiaskoya uğrayan Fransa indi də Avropa Parlamentində ölkəmizə qarşı təhdidlərini davam etdirir. Gözlərindəki qara eynəyi götürərək həqiqəti dərk edib başa düşməlidirlər ki, ekofəallar Azərbaycan ərazisində ölkəmizin təbii sərvətlərini vəhşicəsinə talayıb dünya bazarına çıxarıb pul əldə edərək separatizmi maliyyələşdirən, ekologiyamıza ciddi zərbə vuran faşist rejimin əməllərinə son qoymaq üçün böyük fədakarlıq göstərirlər. Onların əlində silah yoxdur. Sadəcə olaraq bu vandallığa qarşı öz etirazlarını bildirir və yataqlarda monitorinqin aparılmasını tələb edirlər".

Deputat qeyd edib ki, dünyanın müxtəlif ölkələrindən gələn jurnalistlərin də gözü önündən Laçın-Xankəndi yolunda humanitar xarakter daşıyan müxtəliftəyinatlı avtomobillərin sərbəst keçidi müşahidə olunur. Yəni Ermənistanla Xankəndi arasında humanitar əlaqələr bu gün də mövcuddur, hər hansı məhdudiyyət yoxdur. Bu, ən müxtəlif platformalarda təsdiq olunmuş faktdır.

"44 günlük Vətən müharibəsində kağız parçalarına əhəmiyyət vermədən haqqı, ədaləti bərpa etdik, ərazi bütövlüyümüz təmin olundu. Avropa Parlamenti kimi qurumların qəbul etdiyi bu cür kağız parçaları bizim üçün son dərəcə əhəmiyyətsizdir. Azərbaycan öz haqqını reallaşdırmaq üçün beynəlxalq hüquq normalarına söykənərək addımlar atacaq", - deyə F.Ağamalı əlavə edib.

Azərbaycan Prezidentinin müstəqil siyasəti məkrli qüvvələrin planlarını pozur

Milli Məclisin deputatı Kamilə Əliyeva qeyd edib ki, Avropa Parlamenti zaman-zaman Azərbaycana qarşı qərəzli qətnamələr qəbul edir. Bu gün Avropa Parlamentinin korrupsiyaya bulaşmış rüsvayçı quruma çevrildiyini deyən deputat parlamentdə təmsil olunan bir sıra dövlətlərin nümayəndələrinin Qərb ölkələrində fəaliyyət göstərən erməni milyarderlərin əlində oyuncağa çevrildiyini bildirib: "Vaxt keçdikcə istər Avropa Parlamentinin rəhbər vəzifələrindəki şəxslər, istərsə də bir sıra deputatlar rüşfətxorluqda ittiham olunurlar. Məlum olur ki, onlar erməni lobbisinin çirkli pullarının yuyulmasında iştirak ediblər", - deyə K.Əliyeva əlavə edib.

Deputat vurğulayıb ki, Avropa Parlamentinin Azərbaycana qarşı qəbul ediyi əsassız qətnaməyə dövlətimiz kağız parçası kimi yanaşır. Prezident İlham Əliyevin yürütdüyü müstəqil siyasət bu qüvvələrin planlarını heçə endirir: "Bir neçə gün əvvəl ölkəmizə qarşı qəbul edilən qərəzli qətnamə əvvəldən məlum idi. Belə ki, ölkə rəhbərimiz də bu qətnamənin qəbul edilməsinin Azərbaycan üçün heç bir əhəmiyyət kəsb etmədiyini vurğulamışdı".

Əsmər QARDAŞXANOVA

Azərbaycan.- 2023.-18 mart.- S.6