Londonda III Çarlzın tacqoyma mərasimi keçirilib

Londondakı Vestminster Abbatlığında III Çarlzın, eləcə də kraliça - konsort Kamillanın tacqoyma mərasimi çərçivəsində tədbirlər keçirilib.

Rəsmi olaraq III Çarlz 2022-ci il sentyabrın 8-də anası Kraliça II Elizabetin ölümündən bir gün sonra kral oldu.

Mayın 6-da yerli vaxtla saat 06:00-dan başlayaraq kral kortejinin Bukingem Sarayından Vestminster Abbatlığına gedən marşrutu boyunca müşahidə platformaları açılıb. Yolun uzunluğu 2,29 km təşkil edib.

Abbatlığa gedən korteji müşayiət etmək, əsasən saray süvarilərindən olan 200 əsgərə həvalə edilib. Ümumilikdə, tacqoyma günü təhlükəsizliyin təmin edilməsinə dörd minə yaxın hərbçi cəlb olunub.

Kral korteji Bukingem Sarayından Vestminster Abbatlığına yola düşüb.

Bundan sonra bir neçə mərhələdən ibarət iki saatlıq tacqoyma mərasimi başlayıb.

Birinci mərhələdə III Çarlz öz təbəələri ilə tanış olub: o, dünyanın dörd bir tərəfinə üz tutduqdan sonra "şübhəsiz kral" elan edilib. Orada olanlar ona sədaqətlə xidmət edəcəklərinə and içiblər.

III Çarlz daha sonra kral andı içib və 1300-cü ildə hazırlanmış tacqoyma kürsüsündə (Müqəddəs Edvard kreslosunda) oturub.

Arxiyepiskop onu müqəddəs yağla məsh edərək monarxın alnına, sinəsinə və qollarına xaç çəkib. Mərasimin bu hissəsi ən müqəddəs hesab edildiyi üçün ictimaiyyətdən gizlədilib. Növbəti, ən təntənəli mərhələdə III Çarlz Müqəddəs Edvardın tacını taxıb və koronasiya prosesi kulminasiya məqamına çatıb.

Kral təntənəli libas geyinib və ona monarx reqaliyaları təqdim olunub.

Sonra arxiyepiskop III Çarlzın başına tac qoyub, abbatlığın zəngləri çalınıb, trubalar səsləndirilib və atəşfəşanlıq olub.

Mərasimin son mərhələsində kral taxta çıxıb.

Beləliklə, III Çarlz 1066-cı ildən bəri Vestminster Abbatlığında tac taxan 40-cı hökmdar monarx olub.

Bundan sonra Kamilla üçün daha sadə tacqoyma mərasimi baş tutub, kraliça and içməyib.

Vestminster Abbatlığında keçirilən tacqoyma mərasiminə kral ailəsinin üzvləri, 203 ölkənin nümayəndələri, həmçinin ictimai və xeyriyyə xadimləri də daxil olmaqla 2,3 minə yaxın adam dəvət olunub.

Mərasimdə 100-ə yaxın dövlət başçısı iştirak edib.

Rizvan CƏFƏROV

Azərbaycan.- 2023.-7 may.- S.1; 16.