Türkiyə güclənir, müttəfiqlərini də gücləndirir

Türkiyənin ən böyük aviasiya, kosmos və texnologiya festivalı olan "TEKNOFEST" bu il də İstanbulda uğurla təşkil olunmuşdu.

Bu tədbir qardaş ölkənin Avrasiyanın ticarət, enerji, nəqliyyat, siyasi mərkəzinə çevrildiyini, gündən-günə beynəlxalq önəminin daha da artdığını göstərdi. Malik olduğu güclü sənayenin Türkiyəni gücləndirdiyi kimi bu qüdrətli dövlətin müttəfiqlərinin, o cümlədən strateji müttəfiqi olan Azərbaycanın da gücünə güc qatdığını nümayiş etdirdi.

Azərbaycan Prezidenti İlham Əliyev bu məqamı çıxışında xüsusi vurğuladı: "Türk Ordusu bu gün dünya çapında ən öndə olan orduların sırasındadır. Türkiyənin müdafiə sənayesi bu gün bütün dünya tərəfindən qəbul edilir. Ən inkişaf etmiş, ən çağdaş, ən modern müdafiə sənayesi həm Türkiyəni, həm bizi gücləndirir və uzun illər bundan sonra Türkiyənin təhlükəsizliyini təmin edəcəkdir".

Son 20 il ərzində Türkiyə misilsiz inkişafa nail olub. Qətiyyətli və məqsədyönlü qərarların verilməsi sayəsində Türkiyə dünya miqyasında lider ölkələrdən birinə çevrilib. Bir çox qlobal məsələdə rəsmi Ankaranın mövqeyi mütləq nəzərə alınır, dünya gücləri bu dövlətlə hesablaşır, Türkiyənin söz sahibi olduğu hər məqamda görünür. Bu baxımdan Türkiyə bölgədə sülhün, sabitliyin, təhlükəsizliyin mühüm qarantıdır.

Qardaş ölkə türk dünyasının birləşməsi istiqamətində də mühüm addımlar atır. Türkdilli ölkələrin birliyi, müxtəlif sferalarda qarşılıqlı əməkdaşlığı, bir-birinə dəstəyi istiqamətində görülən işlərlə son onilliklərdə Azərbaycan və Türkiyə türk dünyasının əsas birlik və əməkdaşlıq mərkəzlərinə çevrilib. Türk dünyası geniş coğrafiyanı, yüksək potensialı, zəngin təbii qaynaqları, eləcə də böyük hərbi gücü özündə birləşdirir. Bu ölkələr arasında əldə olunmuş əməkdaşlıq mühiti inkişaf etdirilərsə, daha da dərinləşdirilərsə, dünyamızda sülhün, təhlükəsizliyin, inkişafın, insanların rifah və xoşbəxtliyinin təmin olunması üçün çox böyük bir imkan yaranar. XXI əsrin türk əsrinə çevrilməsi, Türk Dövlətləri Təşkilatının bəşəriyyətin gələcəyi ilə ali niyyətlərinin reallaşması zaman-zaman münaqişələrdən, müxtəlif ziddiyyətlərdən əziyyət çəkən dünyamızda xoş bir nizam yaradar.

Azərbaycan və Türkiyə müdafiə sənayesi sahəsində yeni əməkdaşlıqlara imza atır

Dövlət rəhbərimiz Azərbaycanda "Bayraktar" mərkəzinin yaradılması haqqında razılığın əldə olunduğunu bildirdi. Yaxın gələcəkdə ölkəmizdə belə bir mərkəz təşkil ediləcək və burada təhsil və xidmətlə yanaşı, istehsal da həyata keçiriləcək.

Builki "TEKNOFEST"in bir özəlliyi də bunda idi ki, burada "Baykar" şirkətinin öz imkanları hesabına inkişaf etdirdiyi ''Bayraktar Kızılelma'' pilotsuz milli döyüş təyyarəsi, "Anadolu" adlı çoxfunksiyalı amfibiya tipli döyüş gəmisi, həmçinin Türkiyə istehsalı olan yeni nəsil "Altay" tankı və qardaş ölkənin bu yaxınlarda istehsalına başladığı "Togg" avtomobilləri də nümayiş etdirilirdi. Azərbaycan Prezidenti bu məqama xüsusi diqqət yönəldərək ümid etdiyini bildirmişdi ki, yaxın gələcəkdə "Kızılelma" Azərbaycanın səmasında da olacaq: "Kızılelma" havada, "Altay" və "Togg" quruda, "Anadolu" dənizdə - bugünkü Türkiyə budur", - deyə dövlət rəhbərimiz xüsusi vurğulamışdı.

Verilən məlumatlara görə, bu gün Türkiyə NATO üzvü olan ölkələr arasında ABŞ Silahlı Qüvvələrindən sonra ən böyük ikinci hərbi gücdür və NATO-nun nüvə paylaşma siyasətinin bir hissəsi olan beş ölkədən biridir. Hazırda ölkənin müdafiə sənayesinin inkişafı, hərbi qüdrətinin artırılması istiqamətində mühüm proqramlar uğurla həyata keçirilir. Qardaş ölkə müdafiə imkanlarını 80 faiz öz məhsulları ilə təmin edir. Türkiyə öz SİHA-ları (silahlı pilotsuz uçuş aparatları) ilə dünyada ilk üç dövlətdən biridir. Bu isə böyük güc, qüdrət deməkdir.

Prezident İlham Əliyev xalqımızın Ümummilli Lideri, müasir Azərbaycan dövlətinin banisi və qurucusu Heydər Əliyevin Türkiyə və Azərbaycan münasibətləri haqqında məşhur kəlamını yada salmışdı: "Heydər Əliyev demişdir: Türkiyə və Azərbaycan bir millət, iki dövlətdir. Bu gün biz bunu sübut edirik. Bu gün bütün atalarımızın, əcdadlarımızın ruhu şaddır. Çünki Türkiyə və Azərbaycan bir yerdədir. Atam demişkən, "Bir millət, iki dövlət", əlavə də etmək istəyirəm, "Bir yumruq!"

Münasibətlərdə yeni səhifə

Azərbaycan Prezidentinin bu fikirləri tarixi reallıqlara əsaslanır. Ölkələrimiz xoş günlərdə də, sınaq anlarında da daim bir-birinin yanındadırlar, bir-birinə həyandırlar. Türkiyə Azərbaycanın haqq mövqeyini daim dəstəkləyib. Qlobal nüfuzu, qüdrəti ilə bizə ruh verib. Bunu

44 günlük Vətən savaşında bir daha duyub hiss etdik. İkinci Qarabağ savaşının ilk dəqiqələrindən son dəqiqələrinə qədər qardaş ölkə hər an bizim yanımızda oldu. Verilən açıqlamalarla, mesajlarla Azərbaycanı birmənalı dəstəklədi. Azərbaycanın tək olmadığını, Türkiyənin yanımızda olduğunu göstərdi və bu, müxtəlif üsullarla bizim haqq savaşımızı əngəlləmək istəyənlərə, yolumuzdan döndərməyə cəhd edənlərə mesaj olmaqla xalqımıza əlavə güc verdi, böyük ruh bəxş etdi.

Vətən müharibəsindən az sonra, iki il əvvəl Qarabağın tacı Şuşada Azərbaycan və Türkiyə arasında Şuşa Bəyannaməsinin imzalanması isə münasibətlərimizdə yeni bir səhifə açdı. Azərbaycan və Türkiyə münasibətləri rəsmən strateji müttəfiqlik səviyyəsinə yüksəldi. "O tarixi bəyannamənin Qarabağın tacı olan Şuşada imzalanmasının xüsusi önəmi var. Şuşa Azərbaycan xalqının əziz şəhəridir, türk dünyasının əziz şəhəridir. Şuşanın işğaldan azad edilməsi nəticəsində Azərbaycan öz ərazi bütövlüyünü bərpa etmişdir. Türkiyə, onun Cümhurbaşqanı, qardaş türk xalqı daim bizim yanımızda idi", - deyə Azərbaycan Prezidenti çıxışında bəyan etdi.

Azərbaycan xalqı dostluğun və qardaşlığın nə demək olduğunu göstərdi

Bu ilin fevralında Türkiyənin ayrı-ayrı bölgələrində baş vermis dəhşətli zəlzələ zamanı Azərbaycanın qardaş ölkəyə yardıma tələsməsi, Türkiyəyə ilk və ən çox kömək göstərən ölkələrdən olması, bu təbii fəlakətin Azərbaycan cəmiyyətində yaratdığı narahatlıq, təşkil edilən yardım kampaniyaları, vətəndaşlarımızın o ağır günlərdə qardaş Türkiyəyə kömək üçün nələrsə etmək istəyi ilə atdıqları addımlar Azərbaycan-Türkiyə qardaşlığının bütün rəsmi səviyyələri, siyasi-diplomatik münasibətləri də adlayaraq ruh səviyyəsinə keçdiyini, Azərbaycan-Türkiyə sevgisinin hər iki qardaş ölkədə insanların içindən, qəlbindən gəldiyini göstərir. Bu mənada Azərbaycan dövlətinin zəlzələnin baş verdiyi Kahramanmaraş vilayətində min evdən, məktəb, məscid və digər infrastruktur obyektlərindən ibarət şəhər kompleksinin inşasına qərar verməsi, "TEKNOFEST" çərçivəsində onlayn rejimdə kompleksin təməlinin qoyulması ürəyimizdən xəbər verdi.

Azərbaycan Prezidentinin "TEKNOFEST" festivalında iştirakının, dövlət rəhbərimizin çıxışının Türkiyə mediasında geniş işıqlandırılması da qardaş ölkədə Azərbaycana olan xoş münasibətdən, Prezident İlham Əliyevin lider kimi şəxsiyyətinə, gələcəyə baxışına böyük maraqdan irəli gəlir.

Gələcəyə doğru birlikdə

Gələcək texnoloji inkişafdan çox asılıdır. Belə bir reallığı və perspektivi hər birimiz gündəlik həyatımızda duyub hiss edirik. Bu baxımdan "TEKNOFEST" sadəcə Türkiyə üçün deyil, regional və beynəlxalq təsirləri ilə Azərbaycan və digər ölkələr üçün də çox böyük önəm daşıyır. Bu, bütün dünyada aerokosmik və texnologiya sahələrinin inkişafına və texnologiya tətbiqlərinə həsr olunmuş dünyanın ən böyük festivalıdır. Bu festival Türkiyədə hər il keçirilir və dünya texnologiya sektorunun ən maraqlı yeniliklərini bir araya gətirir.

"TEKNOFEST" ölkələr üçün texnologiya inkişafını müzakirə və tətbiq etmək baxımından bir platformadır. Gənclərin texnologiyaya həvəsləndirilməsi və bu sahədə qabaqcıl təcrübələrini təqdim etməsi də festivalın əsas üstünlüklərindəndir.

"TEKNOFEST" öz məqsədinə uyğun olaraq tələbələr, mütəxəssislər, texnologiya sənayesində fəaliyyət göstərənlər və şirkətlər arasında əlaqələrin qurulmasına imkan yaradır. Həmçinin bütün dünyada texnologiya sahəsində inkişaf etmək istəyən startaplar və şirkətlər üçün geniş üfüqlər açır.

Möhtəşəm tədbir texnologiya və aerokosmik sahələrdə inkişaf etmək istəyən hər kəs üçün mühüm bir platformadır. Festival inkişaf etmiş texnologiya sənayesinə sahib ölkələr arasında təcrübə mübadiləsini və inkişaf sahələrində əməkdaşlığı mümkün etməklə, texnologiya dünyasında fəaliyyət göstərən insanlar arasında əlaqələrin qurulmasına imkan verir, onları bir araya gətirir. Beləliklə, iştirakçılar texnologiya sahəsində məlumatlı olur, yenilikləri izləyir və texnoloji inkişafları izləyən ölkələr sırasında olmağa çalışırlar.

Bir fakt xüsusi qeyd olunmalıdır ki, Türkiyədə hər il keçirilən "Teknofest" festivalında müdafiə sənayesi yeni silahlar, texnikalar təqdim edir. İstanbul şəhərində, Atatürk Hava Limanında Türkiyənin Havaçılıq, Kosmos və Texnologiya Festivalı - "Teknofest-2023"də də bu hal yaşandı. 102 fərqli kateqoriyada 41 yarış üzrə

1 milyondan çox layihənin iştirak etdiyi festivalda "Bayraktar Kızılelma", "Bayraktar Akıncı" və ilk dəfə olaraq "Bayraktar-TB3" pilotsuz uçuş aparatları ziyarətçilərə təqdim olundu. Ölkənin quru qoşunları da hər cür müasir müdafiə sistemləri ilə təchiz edilib. Belə ki, quru qoşunlarının bazasına milli imkanlarla istehsal edilən "Yeni Altay" tankları daxil olub. Bu tank ilk prototipindən fərqli olaraq müasir döyüş şərtlərinə uyğun olaraq yenilənib.

Bu festival xüsusilə gənclərə və tələbələrə texnologiya sahəsində karyera qurmaq fürsətləri yaradır. Müsabiqələr, seminarlar və digər belə tədbirlər iştirakçılara öz bacarıqlarını artırmağa və texnoloji inkişafın önündə irəliləməyə yol açır.

Beləliklə, "TEKNOFEST" Azərbaycan və digər ölkələr üçün texnoloji inkişaf proseslərini yaxından izləmək və öz texnoloji inkişaflarını müasir trendlərə uyğunlaşdırmaq, bu sahədə əməkdaşlıqları inkişaf etdirmək üçün çox mühüm imkandır.

Onu da qeyd edək ki, ötən il mayın 26-29-da "TEKNOFEST" ilk dəfə Türkiyədən kənarda - Azərbaycanda keçirildi. "TEKNOFEST Azərbaycan"ın açılış mərasimində Nobel mükafatı laureatı Əziz Səncər də iştirak edirdi. "TEKNOFEST Azərbaycan" festivalını ümumən 300 minə yaxın insan ziyarət etmiş, festival çərçivəsində üç beynəlxalq tədbir və səkkiz texnoloji müsabiqə təşkil olunmuşdu. Həmin müsabiqələrdə 5 mindən çox gəncin formalaşdırdığı 1000-dən çox komanda yarışmışdı.

İstanbulda keçirilən "TEKNOFEST" festivalı da Azərbaycan və Türkiyənin hər zaman bir yerdə olduğunu, bütün dünya üçün birliyin, bərabərliyin mükəmməl örnəyini yaratdığını, ortaq keçmişdən ortaq gələcəyə doğru böyük yolda bərabər irəlilədiyini növbəti dəfə sərgilədi.

İradə ƏLİYEVA,

Azərbaycan.-2023.- 21 may.- S.5.