Ürəkləri böyük arzularla dolu gənclər

İlk dəfə onları Türkiyədə zəlzələdən zərərçəkənlərə yardım kampaniyası zamanı Bakı Əl Oyunları Sarayında görmüşdüm. Çalışqanlıqları, davranışları, insanlarla xoş ünsiyyət qurmaq qabiliyyətləri ilə tamamilə fərqlənirdilər. El yardımı gətirənlərə xüsusi diqqət və həssaslıqla yanaşan bu iki gənc həm də bir-birinə olan doğma münasibətləri ilə də seçilirdilər. O zaman Kamranla İmkanın doğma qardaş olduğunu zənn etmişdik.

Növbəti dəfə bizi Bakı Dövlət Universitetinin nəzdində İqtisadiyyat və Humanitar kollecdə "Heydər Əliyev İli" çərçivəsində keçirilən tədbirdə qarşılayan yenə də Kamranla İmkan oldu. Öyrənirik ki, Kamran təhsil aldığı kollecin Yaradıcılıq Mərkəzinin rəhbəridir. Bu mərkəz tələbələrin bilik və bacarıqlarının inkişaf etdirilməsi, eləcə də dünyagörüşünün artırılması məqsədi ilə yaradılıb. İmkan isə dərs əlaçısıdır, təhsil aldığı humanitar kollecin ictimai fəalıdır. Hər iki gənc Azərbaycan Könüllülər İttifaqının üzvüdür. Onlar məktəbdə keçirilən tədbirin də əsas təşkilatçılarıdırlar.

Söhbət zamanı öyrəndik ki, Kamran Eyubov Bakı şəhərində anadan olub. Nərimanov rayonunda 178 nömrəli məktəbdə 9-cu sinfi bitirdikdən sonra Bakı Dövlət Universitetinin nəzdində İqtisadiyyat və Humanitar Kollecinə daxil olub. Hazırda maliyyə ixtisası üzrə üçüncü kursda oxuyur. Kamran deyir ki, kiçik yaşlarından ictimai işlərə maraq göstərir: "Valideynlərim məni yeniyetmələrin yaradıcılıq mərkəzində keçirilən tədbirlərə aparırdılar. Məktəbdə oxuduğum müddətdə Uşaq Gənclər İnkişaf Mərkəzinin keçirdiyi bütün tədbirlərdə yaxından iştirak edirdim. Məktəbin 9-cu sinfini bitirdikdən sonra kollecə daxil olmaq qərarına gəldim".

Kamran əlavə edir ki, kollecə daxil olmaqda əsas məqsədim yaşıdlarımdan daha tez ictimai həyata atılmaq olub. Çalışacağam ki, tələbə həyatının bütün mərhələlərindən keçim. Qarşıda kollecdən magistraturaya qədər gedəcək bir yol var. Belə düşünürəm ki, yaşıdlarım universitetin birinci kursunda oxuyanda mən artıq onlardan tələbəlik təcrübəsi daha çox fərqlənən biri olacağam. Bu, həm də mənim dünyagörüşümün formalaşmasında və bacarığımın inkişaf etməsində istisna rol alacaq.

Kamran bir yerdə dayanmağı sevmir. Daim axtarış və fəaliyyətdədir. Hamı onu ictimai fəal kimi tanıyır. Abşeron Rayon İcra Hakimiyyəti yanında ictima şuranın könüllüsüdür. Gənclər Fondu, eyni zamanda Gənclər və İdman Nazirliyinin təşkil etdiyi Ulu Öndər Heydər Əliyev "Azərbaycan deyəndə…" gənclər konfransında Abşeron rayonunu təmsil edib. Azərbaycan Respublikası Elm və Təhsil Nazirliyinin Ulu Öndər Heydər Əliyevin yubileyinə həsr etdiyi respublika ifa müsabiqəsində şeir nominasiyası üzrə ilk yerlərdən birini tutub. İctimai fəaliyyətinə görə, dəfələrlə fəxri fərmanlara layiq görülüb. Gələcək planlarından danışan Kamran Eyubov deyir ki, ən böyük arzum layiqli vətandaş olmaq, vətənimə ləyaqətlə xidmət etməkdir. Çalışıram ki, ali təhsilimi Bakı Dövlət Universitetinin İqtisadiyyat fakültəsində davam etdirim. İstəyirəm ki, YAP-a üzv qəbul olaraq ölkəmizin ictimai-siyasi həyatında daha yaxından iştirak edim.

Söhbətimizi Bakı Dövlət Universitetinin nəzdində İqtisadiyyat və Humanitar kollecin digər tələbəsi İmkan Bayramov ilə davam etdiririk. İmkan Quba rayonunun Zizik kəndində ziyalı ailəsində anadan olub. Kollecdə biliyi, bacarığı ilə seçilən ictimai fəallardandır. Təhsil aldığı məktəbdə hamı onu informasiya texnologiyası üzrə mütəxəssis kimi tanıyır. İctimai fəaliyyəti ilə seçilən İmkan dəfələrlə təhsil aldığı məktəb tərəfindən xüsusi sertifikata layiq görülüb. O, informasiya texnologiyası üzrə beynəlxalq sertifikat da alıb.

İmkan deyir ki, insan gərək biliyi, bacarığı ilə vətəninə, dövlətinə xidmət etsin: "Çalışıram ki, dövlətimiz üçün əsl vətandaş olum. Valideynlərimin, müəllimlərimin etimadını doğruldum. Təkcə valideynlərimin yox, həm də vətənimin oğlu ola bilim. İnsan çalışanda arzularını reallaşdıra bilir. Sevinirəm ki, həyatda ilk uğurlu debütümü etmişəm. Mayın 11-də 7 saylı Bakı "ASAN xidmət" mərkəzində "Kiber cinəyatkarlığa Qarşı Mübarizə" adlı təlim toplantısı keçirdim".

İmkanın incəsənət sahəsinə də böyük marağı var. Bu yaxınlarda ADA Universitetindən rəqslə bağlı təklif alıb, orada keçirilən tədbirin fəal iştirakçısı olub.

Kolleci bitirdikdən sonra Bakı Dövlət Universitetinin İqtisadiyyat fakültəsində təhsil almaq niyyətindədir. YAP-a üzv olmağı da qərarlaşdırıb. İmkan fürsətdən istifadə edib Ulu Öndər Heydər Əliyevin təməlini qoyduğu gənclər siyasətini layiqincə davam etdirən Prezident İlham Əliyevə gənclərə ayırdığı diqqət üçün təşəkkür etməyi də unutmadı.

Ürəkləri arzularla dolu gəncləri dinlədikcə Azərbaycanın işıqlı sabahını görüb sevinməmək olmur. Onlar vətən üçün çalışan layiqli gənclərimizdir.

E.QƏNİYEV,

Azərbaycan.-2023.- 21 may.- S.7.