Neokolonialist Fransa hansı haqla başqasını ittiham edir

Paris rəsmiləri ölkədəki iqtisadi böhran səbəbindən yaranan narazılıqlardan, müstəmləkəçilik siyasətində son zamanlar üzləşdikləri uğursuzluqlardan həm vətəndaşlarının, həm də dünya ictimaiyyətinin diqqətini yayındırmaq məqsədilə özlərinə hər mənada uzaq olan Cənubi Qafqazda oyunlar qurmaq fikrindədirlər. Bu müstəmləkəçi dövlətin Ermənistana "qayğıkeşliyi" də sevgisindən irəli gəlmir. Görünür, Cənubi Qafqazda məskunlaşmağa çalışan Fransa Ermənistandan yalnız vasitə kimi istifadə etmək niyyətindədir.

Məsələni o həddə çatdırıb ki, özü məğlubiyyətini boynuna almış, Qarabağın Azərbaycan ərazisi olduğunu etiraf etmiş Ermənistan rəsmilərinin yerinə də düşünməyə, fikirlər səsləndirməyə səy göstərir. Fransa unudur ki, özü barədə başqa bir xalqın canıyananı kimi təsəvvür yarada bilməsi mümkünsüzdür. Əksinə, bununla işğalçı və saxtakar olduğunu bir daha təsdiq edir.

Azərbaycanın ərazilərinin 20 faizini işğal altında saxlamış, minlərlə vətəndaşını evindən, yurdundan didərgin salmış, girov götürmüş, xəsarət yetirərək sağlamlığını əlindən almış, şəhid etmiş Ermənistanın müdafiə ediləcək heç bir tərəfi yoxdur. Əgər Fransa dövləti doğrudan da demokratikdirsə, ədalət tərəfdarıdırsa, o zaman işğalçılıq, terrorçuluq etmiş Ermənistanın əməllərinə görə beynəlxalq səviyyədə məsuliyyətə cəlb olunmasına, layiq olduğu şəkildə cəzalandırılmasına çalışmalıdır. Haqq da, ədalət də o vaxt təsəlli edər. Paris rəsmiləri isə buna nəinki cəhd etmirlər, hətta edilməməsi üçün əllərindən gələni əsirgəmirlər. Səbəbi də hər kəsə bəllidir...

Həqiqət göz önündədir. Özü əsrlərdir işğalçılıq edən, müstəmləkə əsarətində saxladığı xalqları işgəncələrə məruz qoyan Fransa hansı haqla özü kimi işğalçını ittiham etsin? Bu, əlbəttə, məsələnin bir tərəfidir. Başqa səbəblər də var ki, onların ən əsaslarından biri rəsmi Parisin Cənubi Qafqazda münaqişə alovunun sönməsindən, sülhün bərqərar ola biləcəyindən narahatlığıdır.

Azərbaycan dövlətinin isə məqsədi sülhə nail olmaqdır. Həm də yalnız ölkəsində, yerləşdiyi regionda deyil, bütün dünyada sülhün, əmin-amanlığın bərqərar olmasının tərəfdarıdır və buna səy göstərir.

Oktyabrın 20-də Bakıda keçirilən "Neokolonializm: İnsan Hüquqlarının Pozulması və Ədalətsizlik" mövzusunda beynəlxalq konfransın iştirakçılarına müraciətində Prezident İlham Əliyev bəyan etdi ki, Azərbaycan XXI əsrdə neokolonializmin artmasından olduqca narahatdır. Dövlətimizin başçısı qeyd etdi ki, Bandunq Konfransından 70 ilə yaxın dövrün keçməsinə rəğmən neokolonializmi hələ də davam etdirən ölkələr var, belə ölkələrdən biri və birincisi Fransadır. Müraciətdə Afrika, Cənub-Şərqi Asiya, Sakit okean, Latın Amerikasında onlarla ölkəni işğal və sərvətlərini talan edən, xalqlarını uzun illər əsarətdə saxlayan Fransanın həmin ərazilərdə hərbi və bəşəriyyət əleyhinə çoxsaylı cinayətlər törətdiyini, fransız silahlı qüvvələrinin etnik və dini mənsubiyyətinə görə yüz minlərlə dinc sakini soyqırıma məruz qoyduğu vurğulanıb: "XX əsrdə 30 il ərzində fransız Polineziyasında Fransa tərəfindən 200-ə yaxın, 6 il ərzində isə Əlcəzairdə 17 nüvə sınağı həyata keçirilmişdir. Həmin nüvə sınaqlarının ağır fəsadları Polineziya və Əlcəzair xalqı tərəfindən bu gün də yaşanmaqdadır. Bir çox təşkilatın etdiyi çağırışlara uyğun olaraq nüvə sınaqlarının vurduğu ziyan qiymətləndirilməlidir və Fransa tərəfindən müvafiq təzminatlar ödənilməlidir".

Fransa öz sərhədlərini müstəmləkəçilik məqsədilə aşmağı, işğal etdiyi ölkələrin təbii sərvətlərini talayıb varlanmağı özünün məkrli ənənəsinə çevirib. Görmək istəmir ki, artıq əvvəlki vaxtlar deyil. Fransanın dünya ictimaiyyətindən, beynəlxalq qanunlardan belə çəkinmədən işğal etdiyi, illər, əsrlər boyu qarət etdiyi ölkələrin sakinləri bu gün artıq haqq səslərini ucaldırlar. Müstəmləkəsi altında saxlamaq üçün onlara dəhşətli işgəncələr vermiş, kütləvi qırğınlar, soyqırımları həyata keçirmiş Fransadan haqlarını tələb edirlər. Rəsmi Parisin isə həmin xalqlara deməyə sözü, özünə haqq qazandırmağa üzü yoxdur.

Fransanın müstəmləkə siyasətindən ən çox əziyyət çəkən ölkələrdən olan Əlcəzairin ali təhsil və elmi-tədqiqatlar nazirinin müşaviri Youcef Hourinin "Neokolonializm: İnsan Hüquqlarının Pozulması və Ədalətsizlik" mövzusunda keçirilən konfransda söylədiyi bu fikirlər olduqca ibrətamiz oldu: "Fransa hər kəsə insan hüquqları, beynəlxalq hüquq sahəsində dərs vermək istəyir. Lakin Fransa bizim planetimizdə dərs verə biləcək ən son ölkədir. İnsan haqları sahəsində onun dərs verməyə haqqı yoxdur".

Təəssüf ki, Paris rəsmiləri bu həqiqəti "yaddan çıxarırlar". Oktyabrın 27-də Fransa prezidenti Emmanuel Makron Avropa İttifaqı Şurasının Brüsseldə keçirilmiş iclası çərçivəsində Azərbaycana qarşı səsləndirdiyi əsassız və qərəzli iddialarla bunu bir daha təsdiq etdi.

Azərbaycan Xarici İşlər Nazirliyinin bu barədə açıqlamasında bildirildiyi kimi, onilliklər ərzində vasitəçi olarkən ölkəmizin 20 faiz ərazisinin Ermənistan tərəfindən işğalına göz yuman və ərazilərimizdə separatizmi təşviq edən Fransanın Azərbaycan tərəfini Ermənistanın ərazi bütövlüyü və suverenliyinə təhdid yaratmaqda ittiham etməsi gülünc və qəbuledilməzdir. Fransa heç vaxt uğurlu vasitəçilik səyləri aparmayıb və onun keçmiş Ermənistan-Azərbaycan münaqişəsinin həlli üzrə vasitəçiliyi Minsk qrupu ilə birlikdə başa çatıb.

Bildirildi ki, məhz Fransanın iştirak etdiyi vasitəçilik səylərinin nəticə verməməsi və Ermənistanın işğalçı siyasətinin qarşısının alınmaması Azərbaycanı öz torpaqlarını hərbi yolla azad etməyə sövq edib: "Bu xüsusda, Fransanın mövqeyi onun keçmiş müstəmləkə bölgələrindəki mövcud vəziyyətdən dərs almaqdan imtina etdiyini nümayiş etdirir. Bunun əksinə, Fransa inadkarcasına Afrika və digər regionlardakı uğursuzluqlarını bölgəmizə əvvəlcədən uğursuzluğa məhkum olmuş müdaxiləsi ilə kompensasiya etməyə çalışır. Əgər Fransa keçmiş müstəmləkələrindəki kövrək mövcudluğundan irəli gələn məsələləri daha az ağrısız həll etmək istəsə, Azərbaycan bu istiqamətdə vasitəçilik xidmətlərini təqdim edə bilər".

Zöhrə FƏRƏCOVA,

Azərbaycan.-2023.- 2 noyabr, № 240.- S.6.