Kanada sülhə əngəl törətməyə çalışır

Azərbaycanın 23 saatlıq antiterror tədbirlərindən sonra ərazi bütövlüyünü və suverenliyini tam bərpa etməsi Ermənistanın havadarlarını narahat edib.

Bədnam qonşumuza hamilik edən bir sıra dövlətlərin rəsmi nümayəndələrinin İrəvana səfər edərək ölkəmiz əleyhinə əsassız ittihamlar səsləndirmələri bunu təsdiqləyir. Bir neçə gün əvvəl Ermənistanda səfərdə olan Kanadanın xarici işlər naziri Melani Colinin obyektivlikdən tamamilə uzaq, qərəz dolu açıqlamaları bunun bariz nümunəsidir.

Mövzu ilə bağlı qəzetimizə danışan Milli Məclisin deputatı Ceyhun Məmmədov deyib ki, bir sıra Avropa ölkələri ilə yanaşı, regionla heç bir coğrafi yaxınlığı olmayan Kanada dövləti də Qafqazda cərəyan edən proseslərə müdaxilə edir və Azərbaycanın daxili işlərinə qarışmağa cəhd göstərir: "Kanadanın xarici işlər naziri Melani Colinin İrəvan səfəri zamanı səsləndirdiyi fikirlər də bu dövlətin Cənubi Qafqazda sülhün bərpasına mane olduğunu sübuta yetirir. Ümumiyyətlə, regionla coğrafi yaxınlığı olmayan bir ölkənin hökumət nümayəndəsinin bir neçə dəfə Qafqaza gəlməsi, burada absurd açıqlamalar verməsi, sülhü və birgəyaşayışı təhdid etməsi həqiqətən də anlaşılan deyil".

Deputatın sözlərinə görə, Kanadanın Aİ-nin Ermənistandakı missiyasına qoşulması da sual doğurur. Gedişat onu göstərir ki, Kanadanın bu prosesdə iştirakı ABŞ-nin oyunundan başqa bir şey deyil. "Ölkəmizə qarşı bu cür qərəzli, ədalətsiz bəyanatlar vermək mənasız bir işdir. Azərbaycan hansısa ölkələrin sanksiya hədələrindən çəkinmir. Nəzərə almaq lazımdır ki, bizim bütün addımlarımız beynəlxalq hüququn norma və prinsiplərinə əsaslanır. Zənnimizcə, bu həqiqətləri bütün dünya, eləcə də Kanada gözəl bilir. Yox, əgər doğrudan da bilmirsə, onda öyrənsin. Və bilsin ki, Qarabağ Azərbaycandır, bu torpaqlar bizimdir və ona nəzarəti də dövlətimiz həyata keçirir. Azərbaycan öz ərazi bütövlüyünü və suverenliyini bərpa edib. Ona görə də xüsusilə bununla bağlı mövqe bildirərkən hər bir dövlət diqqətli olmalıdır", - deyə müsahibim bildirib.

Ceyhun Məmmədov əlavə edib ki, Ermənistanın havadarlarının cəfəng fikirləri bizi heç zaman narahat etməyib: "Onların bəyanatları boş kağız parçasından başqa heç nə deyil. Həm də 30 il ərzində erməni daşnaqlarının vəhşiliyi ucbatından öz doğma el-obasından didərgin düşmüş 1 milyona yaxın azərbaycanlının vaxtında dərdinə şərik olmayan dövlətlərin bu gün ermənilərin guya etnik təmizlənməsindən narahatlıq keçirmələri absurddur. Şübhəsiz ki, bu ölkələr öz maraqları naminə regionda gərginliyin dərinləşməsində maraqlıdırlar. Ona görə də İrəvandan oyuncaq kimi istifadə edirlər".

Nəzrin QAFARZADƏ,

Azərbaycan.-2023.- 2 noyabr, № 240.- S.6.