Haqqı haqsızlığa qurban verənlər

Kanada xarici işlər nazirinin anti-Azərbaycan mövqeyi təmsil etdiyi ölkənin adına ləkədir

Son 30 il ərzində ermənilərin Azərbaycana qarşı savaşa qalxmasının bir nəticəsi də o oldu ki, əhalisinin sayı bir neçə dəfə azaldı. Yəni ermənilər növbəti dəfə dünyaya səpələnməyə başladılar. Təəccüblü deyilmi?

Axı "böyük Ermənistan" yaratmaq istəyən ölkədən yerli əhali didərgin düşməli deyildi. Belə çıxır ki, ermənilərin dədədən-babadan məqsədləri "böyük Ermənistan" yaratmaq olmayıb. Onlara sadəcə bu ideyanı sırıyıblar və qucaq-qucaq pul ayırıblar. Ermənilər də bu gərəksiz ideyalar üçün ayrılan böyük pulları həzmdən keçiriblər. Sən demə, "böyük Ermənistan" yaratmaqdansa, "böyük köç" etmək daha sərfəli imiş.

Ona görə də bu gün Kanada siyasilərinin beynəlxalq münasibətlər sistemində haylara hayan durması 100 il ərzində davam edən siyasi oyunların bir qədər kanadalaşdırılmış variantıdır. Kanada xarici işlər nazirinin Azərbaycanla Türkiyəyə hikkə nümayiş etdirib körüklənməsi erməni diasporunun Kanadada qol açıb yallı getməsinin nəticəsidir. Yəni əsas səbəb odur ki, ermənilərin bu ölkədə də güclü diasporu var. Ona görə də kanadalı nazirin səsləndirdiyi cəfəng fikirlər reallıqları yox, onun adi çoğrafi biliklərdən məhrum olmasından xəbər verir. Kanada kimi soyqırımları törədən bir dövlətin Azərbaycanı etnik təmizləmədə ittiham etməsi bizim "adımı sənə qoyum, səni yana-yana qoyum" məsələni xatırladır. Onu da qeyd edək ki, tarixən Azərbaycana qarşı qərəzli, birtərəfli fikirlər səsləndirən ölkələrin belə məkrli mövqeləri həmişə həqiqət qarşısında iflasa uğramışdır. Kanada da bu aqibəti yaşamaqdan sığortalanmayıb.

Azərbaycan bu gün regionda böyük söz sahibidir, onun imzası olmadan bölgədə heç bir layihə həyata keçirilmir. Ermənistan artıq anlamalıdır ki, onun saxta, həqiqətin hətta yanından keçməyən "ittiham"ları artıq heç nəyə yaramır. Əgər Paşinyan sülhə sarı getmək niyyətindədirsə, Fransa və Kanada kimi dövlətlərin ədalətsiz çağırışlarına bel bağlamamalıdır. Fransa və Kanada isə Azərbaycanı hədələmək əvəzinə, Cənubi Qafqazda barışın bərqərar olmasına çalışmalıdırlar, daha... özgənin gözündə tük axtarmamalıdırlar.

Başa düşürük ki, əgər əvvəl Kanadada ermənilərin sayı 2 min nəfərə yaxın idisə, indi bu rəqəm 100 min nəfərə çatmaqdadır. Onu da anlayırıq ki, 1930-cu ildən Sant Katerins şəhərində erməni kilsəsi fəaliyyət göstərir (Bu gün isə Kanadada erməni kilsələrinin sayı daha çoxdur). Üstəlik, bu şimal bölgəsində Aykazyan kolleci və Zoryan institutu açılmış, Kanada parlamenti ermənilərin genosidə məruz qalmasını təsdiqləyən qərar qəbul etmişdir. Ermənilər bu gün Kanadanın müxtəlif siyasi, iqtisadi və mədəni həyatına soxula bilmişlər. Bu ölkədə hansı keyfiyyətləri ilə deyə bilmərik, tanınmış ermənilər də çoxdur. Amma bütün bunlar əsas vermir ki, dünyanın sayılıb-seçilən, özünü demokratik sayan bu ölkə ağa qara, düzə əyri, haqqa haqsız desin.

Elə ona görə də Kanadanın xarici işlər naziri Meloni Jolinin Azərbaycanla bağlı səsləndirdiyi məlum bəyanat artıq neçə gündür ki, ekspertlər tərəfindən sərt tənqid olunur. Beynəlxalq münasibətlər sistemində tanınmış pakistanlı analitik Xalid Teymur Əkrəm kanadalı nazirin Azərbaycanın ünvanına səsləndirdiyi fikirlərin reallıqdan uzaq olduğunu, sanksiyaların tətbiqinə çağırmasını isə erməni diasporunun təsiri altında səsləndirdiyini bildirir. Digər politoloqlar da Kanadanın xarici işlər nazirinin bəyanatını qərəzli və onun səthi məlumatlara malik olması ilə bağlayır, sanki nazir kürsüsündən yox, daşnaksütyun partiyasının tribunasından çıxış etdiyini söyləyirlər.

Ekspertlər belə hesab edirlər ki, Kanadanın Qafqaz addımları bir neçə fakta bağlıdır: birincisi, bu ölkənin Fransa ilə məxfi müqaviləsi mövcuddur. İkincisi, bu, sadəcə 44 günlük müharibədən sonra Kanadanın Türkiyənin siyasətinə qarşı atdığı addımdır. Etiraf edək ki, bu iki amilin hər ikisində həqiqət payı var. Belə olmasaydı kanadalı nazir ermənilərin azərbaycanlılara qarşı apardığı etnik təmizləmələrə göz yummaz, "Ay Dat" adlı radikal erməni təşkilatının qarşısında çıxış etməzdi.

Bahadur İMANQULİYEV,

Azərbaycan.-2023.- 4 noyabr, № 242.- S.6.