Hayastan iflasın astanasındadır

Korrupsiya cinayətləri artır, əhalinin yaşayış səviyyəsi getdikcə daha da ağırlaşır

Postmüharibə dövründə yaranan mövcud sosial-iqtisadi durum Hayastanda əhalinin yaşayış səviyyəsinin daha böyük sürətlə pisləşməkdə olduğunu göstərir. O da xüsusi olaraq vurğulanır ki, mövcud problemlərin həlli üçün son 5 ildə hakimiyyət hər hansı konsepsiya va ya tədbirlər planı həyata keçirməyib. Əksinə, iqtidarda təmsil olunanlar sələfiləri kimi, yalnız öz şəxsi mənafelərini güdür, qanunsuz yolla daha çox varidat toplamaq barədə düşünürlər.

Məhz elə bu səbəbdən həddən artıq kasıb olan, əhalisinin böyük hissəsi ifrat yoxsulluq həddində yaşayan bu kiçik ölkədə sürətli inkişaf mərhələsi yaşayan yeganə sahə korrupsiyadır. Korrupsiya Hayastanın bütün həyat sferalarında kifayət qədər dərin kök salıb və artıq ölkənin milli təhlükəsizliyinə də böyük təhdid yaradır. Belə vəziyyət sadə vətəndaşların hakimiyyətdən narazılıqlarının daha kəskin xarakter almasına, hətta sosial partlayış həddinə qədər yüksəlməsinə gətirib çıxarır. Ancaq Hayastanın, tutduğu vəzifənin böyük və ya kiçikliyindən asılı olmayaraq demək olar ki, bütün məmur ordusu korrupsiya piramidasında yer aldığından, bu problemə qarşı mübarizə yalnız kağız üzərindədir və vaxtaşırı verilən quru vədlərdən ibarətdir.

Ermənistanda bu ilin 9 ayı ərzində qeydə alınan korrupsiya cinayətlərinin sayı ötən ilin müvafiq dövrü ilə müqayisədə 482 hadisə artıb. Bu barədə Hayastanın Korrupsiyaya Qarşı Mübarizə Komitəsinin sədri Sasun Xaçatryan parlamentdə çıxışı zamanı bildirib. Onun sözlərinə görə, 2023-cü ilin 9 ayında ölkədə 1088 korrupsiya cinayəti qeydə alınıb. Ötən ilin analoji dövründə bu göstərici 606 olub. Yəni korrupsiya hadisələrinin sayı 79,5 faiz artıb. Bu müddət ərzində 286 şəxs barəsində 134 cinayət işi ittiham aktı ilə məhkəməyə göndərilib. Ötən ilin eyni dövründə bu rəqəm 166 nəfərə qarşı 68 cinayət işi olub. Məhkəməyə göndərilmiş 286 işdən 52 nəfər rüşvətalma, 117 nəfər rüşvətvermə, 14 nəfər vəzifə səlahiyyətlərindən sui-istifadə və ya başqasına ötürmə maddəsi ilə ittiham olunub. 15 nəfər vəzifə saxtakarlığında, 3-ü çirkli pulların yuyulmasında, 18-i korrupsiya cinayətlərində, 58 nəfər sui-istifadədə suçlanıb.

Müxtəlif təşkilatlar tərəfindən Hayastanda aparılan sorğular göstərir ki, son illər ölkədə korrupsiyanın həcmi xeyli artıb. Rəyi soruşulanların əksəriyyəti bütün məmurların istisnasız olaraq rüşvət və korrupsiyaya qurşandığını düşünür. Hayastanda daha çox korrupsiyalaşmış sahələr kimi təhsil, səhiyyə, ordu, polis və məhkəmə sistemləri göstərilir.

Bütün bunlar Hayastanı kifayət qədər narahat günlər gözlədiyindən, ölkənin üzləşdiyi ümumi böhranın daha da dərinləşəcəyindən xəbər verir.

Elçin CƏFƏROV,

Azərbaycan.-2023.- 4 noyabr, № 242.- S.12.