Türk dövlətləri beynəlxalq siyasətdə də ortaq mövqeyə sahibdirlər

"Türk Dövlətləri Təşkilatının (TDT) 10-cu Zirvə toplantısı türk dünyası üçün mühüm əhəmiyyətə malikdir. Bu sammit əvvəlki illərdə həyata keçirilən vacib işlərlə yanaşı, gələcək prioritetləri müəyyənləşdirmək baxımından da xüsusi önəm daşıyır. Zirvə toplantısında bütün türk dövlətlərinin liderlərinin bir araya gəlməsi həm də onlar arasında dostluq və qardaşlıq münasibətlərinin inkişafından xəbər verir. Bunda Azərbaycan və Türkiyənin böyük rolu var. Çünki iki qardaş ölkənin bütün sferalarda inkişafda olan münasibətləri digər türk dövlətlərinin də təşkilata cəlb edilməsinə imkan yaradıb".

Bu fikirləri "Azərbaycan" qəzetinə açıqlamasında Milli Məclisin deputatı Məlahət İbrahimqızı deyib. Deputat bildirib ki, Türk Dövlətləri Təşkilatının 10-cu Zirvə toplantısı türk dünyası tarixinin əlamətdar hadisələrindəndir: "Zirvə toplantısında TDT-yə üzv olan, eləcə də müşahidəçi qismində iştirak edən bəzi ölkələrin prezidentləri və ya baş nazirlərinin iştirakı mühüm əhəmiyyət kəsb edir. Bu sammitin şüarının da "Türk Əsiri" adlandırılması təsadüfi deyil. Bu, həqiqətən də türk xalqlarının həyatında yeni bir mərhələnin başlayacağına işarədir".

Deputat Prezident İlham Əliyevin sammitdəki çıxışına diqqət çəkərək bildirib ki, dövlət başçısı Zirvə toplantısında bir daha türk dövlətlərinin birliyinin və əməkdaşlığının önəmini vurğulayıb və Azərbaycanın Türk Dövlətləri Təşkilatına üzv olan ölkələrlə ikitərəfli və çoxtərəfli əməkdaşlığına xüsusi diqqət ayırdığını qeyd edib: "Dövlət başçısı həmçinin yaxın keçmişə qiyabi ekskursiya edərək Azərbaycanın beynəlxalq aləmdə artan nüfuzu, 30 il ərzində üzləşdiyimiz işğal problemi, eləcə də 44 günlük Vətən müharibəsində qazandığımız parlaq qələbəmiz barədə söz açıb. Prezident İlham Əliyevin dediyi kimi, bu gün baş verən qlobal təhlükələr fonunda türk dövlətlərinin daha sıx birləşməsi, daha sürətli və çoxtərəfli inkişaf etməsi vacibdir".

Məlahət İbrahimqızının sözlərinə görə, bu sammit eyni zamanda türk dövlətlərinin artıq beynəlxalq siyasətdə də ortaq mövqe sərgilədiklərindən xəbər verir. Dəyişkən geosiyasi mühitdə bu həmrəyliyin nümayiş etdirilməsi mütləqdir. Deputat hesab edir ki, türk xalqları məhz bu təşkilatın atdığı lazımi addımlar nəticəsində dünyanın güc mərkəzlərindən birinə çevriləcək.

Nəzrin QAFARZADƏ,

Azərbaycan.- 2023.- 5 noyabr, № 243.- S.6.