Birliyə, tərəqqiyə, əməkdaşlığa doğru inamlı addımlarla

Türk Dövlətləri Təşkilatının Zirvə görüşü əlaqələrin daha da möhkəmləndirilməsi niyyətinin növbəti nümunəsidir

Noyabrın 3-də Qazaxıstanın paytaxtı Astanada keçirilmiş Türk Dövlətləri Təşkilatının (TDT) "Türk Əsri" çağırışı altında 10-cu yubiley Zirvə görüşü türk birliyini, bu birliyin məram və məqsədlərini bir daha ortaya qoydu.

Zirvə görüşü türk dünyasında əlaqələrin daha da genişləndirilməsi və möhkəmləndirilməsi niyyətinin növbəti nümunəsi olmaqla yanaşı, türk birliyinin dünyada sülhə, əmin-amanlığa, təhlükəsizliyə nail olmaq istiqamətində arzu və istəklərinin bir daha bəyan edildiyi sammit idi.

Görüşdə çıxış edən Prezident İlham Əliyev türk dövlətləri ilə münasibətlərin möhkəmləndirilməsinin Azərbaycanın xarici siyasətinin əsas prioritetlərindən biri olduğunu vurğuladı. Dövlət başçısı qeyd etdi ki, etnik və mədəni köklərimiz, dilimiz, ortaq keçmişimiz münasibətlərimizin təməlini təşkil edir: "2009-cu ildə Naxçıvan Zirvə görüşündən ötən müddət ərzində müxtəlif sahələrdə əməkdaşlığımız təsisatlanıb, Türk Dövlətləri Təşkilatı uğurlu inkişaf yolu keçib. Bu gün təşkilatımız beynəlxalq səviyyədə böyük siyasi çəkiyə və nüfuza malikdir".

Ölkə rəhbəri çıxışında böyük türk dünyasının bir hissəsi olduğumuzu bildirərək, dostluğumuzun, qardaşlığımızın əbədi olacağına əminliyini ifadə etdi.

Zirvə görüşündə çıxış edən digər türk dövlətləri rəhbərləri Azərbaycanı ərazi bütövlüyünün təmin olunması münasibətilə təbrik edərək, regionda sabitliyə nail olunması istiqamətində göstərdiyi səylərdə Prezident İlham Əliyevə uğurlar arzuladılar.

Sammitin sonunda Astana aktı və Astana Zirvə görüşünün Bəyannaməsi imzalandı.

Milli Məclisin deputatı Aydın Mirzəzadə TDT-nin Zirvə görüşü ilə bağlı "Azərbaycan" qəzetinə açıqlamasında deyib ki, təşkilatın 10-cu yubiley sammiti bir çox faktorla diqqəti çəkib. Ötən illər ərzində türk dövlətlərinin həmişə birlikdə olmaq, mövqelərini yaxınlaşdırmaq, dünyada sülhə və tərəqqiyə nail olmaq istəkləri bir daha ortaya qoyuldu: "Təsadüfi deyil ki, sammitin şüarı "Türk Çağırışı", "Türk Əsri" idi. Türk faktoru bu gün dünyada vacib məsələlərdən biridir. Türk dövlətlərində əmin-amanlıq, mehriban qonşuluq, istənilən məsələnin gərginliyə çatdırılmadan beynəlxalq hüquq normaları əsasında həll edilməsi təşəbbüsü və praktikası var".

A.Mirzəzadə vurğulayıb ki, bu sammitdə türk dövlətləri birgə hərəkət etmək, imkanlarını birləşdirmək, bütün sahələrdə əməkdaşlıq etmək istəklərini bir daha ortaya qoydular. Bunu təsdiqləyəcək kifayət qədər nümunələr var. Təkcə Azərbaycan bu il türk dövlətləri ilə xarici ticarət dövriyyəsini 40 faizə qədər artırıb. Ölkəmiz türk dövlətlərinə 20 milyard ABŞ dollarına qədər investisiya qoyub və bu rəqəm artmaqda davam edir.

Prezident İlham Əliyevin Zirvə görüşündəki çıxışında türk dövlətlərinin ümumi tarixinə, dil, din və ənənələr faktoruna toxunduğunu xatırladan deputat bildirib ki, Azərbaycanın türk dövlətləri ilə əməkdaşlığı hər zaman genişləndirmək istəyi özünü göstərir: "Dövlət başçımız türk həmkarlarına Azərbaycanda gedən proseslərdən, ölkəmizin ərazi bütövlüyünü təmin etmək üçün apardığı mübarizədən də danışdı. Bütün bu məlumatlar digər türk liderləri tərəfindən çox maraqla, razılıqla qarşılandı. Türk Dövlətləri Təşkilatının hər sammitini tərəqqiyə, əməkdaşlığa, birliyə doğru daha böyük və inamlı addım hesab etmək olar".

Əsmər QARDAŞXANOVA,

Azərbaycan.-2023.- 5 noyabr, № 243.- S.6.