Əbədi dalğalan, ey şanlı Bayraq!

Qürurla dalğalan, Azərbaycan Bayrağı! Sənə qürurla dalğalanmaq yaraşır!

Sən ucaldığın gündən tarixin çox qovğasına, siyasi çəkişmələrinə şahid oldun. Rəmzi olduğun müstəqil Azərbaycan dövləti 1920-ci il aprelin 28-də süquta uğradıldı. Dalğalandığın yerləri bolşeviklər işğal etdi. Səni göylərdən yerə endirməyə çalışanlar məqsədlərinə çatdıqlarını düşündülər. Yetmiş il Azərbaycan azadlığına, müstəqilliyinə həsrət qaldı. Sən də həmin illərdə gün işığı görmədin.

1990-cı illərdə Azərbaycanın müstəqilliyinə qovuşması ilə sənin də işıqlı, nurlu günlərin yenidən başladı. Ancaq sevincin qubarlı, səadətin yarımçıq oldu. Çünki həmin illərdə qəsbkar ermənilər Azərbaycandan yeni ərazilər qoparmaq niyyətindəydilər. Qarabağda quldur ermənilər azərbaycanlılara silahlı hücumlar edir, qətlə yetirirdilər.

Sovet hökuməti dağılır, ittifaqa daxil olan respublikaların iqtisadiyyatı çökürdü. Azərbaycan da iqtisadi böhran içərisində ağır günlər keçirirdi. Nə milli ordusunu qura bilmişdi, nə də Vətən naminə könüllü döyüşən igidlərinə verməyə silah-sursatı vardı.

Qəddar, qatil ermənilər isə xarici havadarlarından hər cür yardım alırdılar. Dövrün müasir silahları ilə silahlandırılırdılar, ərzaq korluğu çəkmirdilər. Düşmən güclənəndə daha da amansız, daha da qəddar olurmuş. Bunu Azərbaycan xalqı 1990-cı illərin əvvəllərində Qarabağda, Zəngəzurda gördü. Erməni vandalları körpəsindən qocasına, şikəstinədək əllərinə keçən heç bir azərbaycanlıya rəhm etmədilər, aman vermədilər. Günahsız insanlara o qədər dəhşətli işgəncələr verdilər ki, onlar ölümü qurtuluş bildilər.

Qarabağda, Zəngəzurda təcavüzkar ermənilər kütləvi qırğınlar, soyqırımları törətdilər. Həmin ərazilərdə yaşayan azərbaycanlıları dədə-baba yurdlarından didərgin saldılar. Evlərini yağmaladılar, od vurub yandırdılar.

İşğal etdikləri o yerlərdə otuz ilə yaxın meydan suladı ermənilər. Qarabağda, Zəngəzurda yurd yerləri əsl sakinlərinin yolunu həsrətlə gözlədi. Göylər isə sənin üçün darıxdı, qubarlandı, Azərbaycan Bayrağı...

2020-ci ilin payızında baş verən Vətən müharibəsində Müzəffər Azərbaycan Ordusu işğalçı Ermənistanın silahlı qüvvələrini məğlub etdi. Döyüş meydanlarında igid Azərbaycan döyüşçüləri hünər göstərərək otuz ilə yaxın davam edən işğala son qoydular. Düşməndən geri alınan yaşayış yerlərimizdə, strateji yüksəkliklərimizdə Azərbaycan Bayrağını ucaltdılar.

Amma işğalçılar Vətən müharibəsində aldıqları dərslərdən nəticə çıxarmadılar. Qarabağ bölgəsindən gözlərini çəkmədilər. Ermənistan silahlı qüvvələrinin birləşmələri Azərbaycan Ordusunun mövqelərini müxtəlif çaplı silahlardan sistemli şəkildə atəşə tutdular, ərazilərimizi minalamaqda, döyüş mövqelərini mühəndis cəhətdən təkmilləşdirməkdə, səngər və sığınacaqlarının sayını çoxaltmaqda davam etdilər.

Üçtərəfli Bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərk-silah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, eləcə də bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının Konstitusiya quruluşunun bərpa edilməsi məqsədilə sentyabrın 19-da bölgədə lokal xarakterli antiterror tədbirlərinə başlanıldı. Və düşmən 23 saat 43 dəqiqə ərzində məğlub oldu.

Sentyabrın 20-də Prezident İlham Əliyev xalqa müraciətində lokal antiterror tədbirlərinin başlandığı anlardan hərbçilərimizin böyük qəhrəmanlıq, şücaət və peşəkarlıq göstərərək qısa müddət ərzində bütün istiqamətlərdə əhəmiyyətli dərəcədə hərbi uğurlara nail olduqlarını bəyan etdi.

Oktyabrın 15-i Azərbaycan xalqı üçün tarixi bir gün oldu. Xankəndi şəhərində Azərbaycan Respublikasının Dövlət Bayrağını ucaldan Pezident İlham Əliyev bu münasibətlə bütün Azərbaycan xalqını ürəkdən təbrik etdi: "Əziz həmvətənlər, bu meydanda bu gün durmaq böyük xoşbəxtlikdir, böyük fərəhdir, qürur mənbəyidir. Mən qürur hissi ilə Azərbaycan Bayrağını bu gün qaldırmışam və doğma xalqıma bir daha demək istəyirəm ki, biz bu Qələbəyə layiqik. Azərbaycan xalqı bu Qələbəni öz qanı, canı bahasına əldə etmişdir. Bu gün burada qaldırdığım Bayraq burada əbədi dalğalanacaq və biz burada əbədi yaşayacağıq. Qarabağ bizimdir, Qarabağ Azərbaycandır!"

Rəmzi olduğun Azərbaycan dövləti suverenliyini tam bərpa etdi. Bu gün Azərbaycan bütün dünyada müstəqil siyasət yürüdən dövlət olaraq tanınır. Gündən-günə inkişaf edir. Sən durduğun ucalıqda arxayın-arxayın dalğalan, şanlı Azərbaycan Bayrağı!

Zöhrə FƏRƏCOVA,

Azərbaycan.-2023.- 5 noyabr, № 243.- S.10.